ແຂວງໄຊສົມບູນ ລົງວິໄນພະນັກງານສໍ້ລາດ ບັງຫລວງ 3 ຄົນ ຂັ້ນກ່າວເຕືອນ ແລະ ໃຫ້ທົດ ແທນຄ່າເສຍຫາຍ 72,9 ລ້ານກີບ
ທ່ານ ບຸນຜອງ ຄຳມະນີວົງ ຮອງປະທານ ຄະນະກວດກາພັກ-ອົງການກວດກາລັດແຂວງ ລາຍງານຕໍ່ກອງປະຊຸມ ສະຫຼຸບຕີລາຄາ ການເຄື່ອນໄຫວວຽກງານກວດກາ ປະຈຳປີ 2022 ແລະ ທິດທາງແຜນການ ປີ 2023 ວັນທີ 30 ມີນາ 2023 ຜ່ານມານີ້ວ່າ: ແຂວງໄຊສົມບູນ ໄດ້ຈັດຕັ້ງເຜີຍແຜ່ເຊື່ອມຊຶມເອກະສານ ກ່ຽວກັບວຽກງານສະກັດກັ້ນ, ຕ້ານການສໍ້ລາດບັງຫຼວງ, ການແຈ້ງຊັບສິນ ແລະ ລາຍຮັບຂອງພະນັກງານ-ລັດຖະກອນທົ່ວແຂວງ.
- ຕິດຕາມ, ກວດກາ-ຊຸກຍູ້ການເຄື່ອນໄຫວການຄຸ້ມຄອງບໍລິຫານລັດ ຂອງບັນດາພະແນກການ, ອົງການອ້ອມຂ້າງແຂວງ ແລະ ເມືອງ ໄດ້ 25 ເປົ້າໝາຍ.
- ກວດກາໂຄງການລົງທຶນຂອງລັດເລີ່ມແຕ່ຫົວທີຮ່ວມກັບສູນກາງທັງໝົດຈຳນວນ 4 ໂຄງການ, ມູນຄ່າລວມທັງໝົດ 830,809 ຕື້ກີບ.
- ກວດກາໂຄງການລົງທຶນຂອງລັດ ທີ່ມີມູນຄ່າ 10 ຕື້ກີບ ລົງມາ ຢູ່ແຂວງໄຊສົມບູນ ປີ 2022 ຈຳນວນ 80 ໂຄງການ, ມູນຄ່າ 187,247 ຕື້ກີບ.
- ກວດກາໂຄງການຕາມຜົນກວດສອບ ຈຳນວນ 7 ໂຄງການ, ມູນຄ່າທັງໝົດ 26,367 ຕື້ກີບ.
- ຕິດຕາມ, ກວດກາຕາມຄຳສັ່ງຂອງຄະນະພັກ, ຄະນະນໍາຂັ້ນເທິງ ດໍາເນີນເກັບກໍາຂໍ້ມູນການນຳໃຊ້ທີ່ດິນຂອງລັດ 2 ບ້ານເທດສະບານ ໄດ້ທັງໝົດ 18 ເປົ້າໝາຍ, 64 ຕອນ, ມີເນຶ້ອທີ່ທັງໝົດ 533,149 ຕາແມັດ.
- ໄດ້ແກ້ໄຂຄຳຮ້ອງທຸກ ແລະ ການສືບສວນ-ສອບສວນພະນັກງານ 1 ຄັ້ງ ພົບເຫັນພະນັກງານທີ່ມີພຶດຕິກໍາສໍ້ລາດບັງຫຼວງ ຢູ່ເມືອງຮົ່ມ ຈຳນວນ 3 ຄົນ, ມູນຄ່າເສຍຫາຍ 72.989.000 ກີບ, ຮູບການລົງວິໄນຂັ້ນກ່າວເຕືອນ ແລະ ທົດແທນຄ່າເສຍຫາຍ ເຊິ່ງປະຈຸບັນ ສາມາດເກັບຄືນໄດ້ແລ້ວ ຈຳນວນ 47.458.000 ກີບ.
ທ້າຍກອງປະຊຸມ ສະຫາຍ ພອຍຄຳ ຮຸ່ງບຸນຍວງ ໄດ້ມີຄຳເຫັນໂອ້ລົມຕໍ່ກອງປະຊຸມ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຈັດຕັ້ງປະຕິບັດໄດ້ໃນໄລຍະໜຶ່ງປີຜ່ານມາຂອງຄະນະກວດກາພັກ-ອົງການກວດກາລັດແຂວງ ພ້ອມທັງເນັ້ນໜັກໃຫ້ຍົກລະດັບການເຄື່ອນໄຫວຂອງຄະນະກວດກາພັກ, ອົງການກວດກາລັດຂັ້ນແຂວງ, ຂັ້ນເມືອງ ໃຫ້ມີຄຸນນະພາບພາຍໃຕ້ການນຳພາ-ຊີ້ນໍາເປັນເອກະພາບ ແລະ ເຂັ້ມແຂງຂອງຄະນະພັກແຕ່ລະຂັ້ນ, ສ້າງການຫັນປ່ຽນອັນຈະແຈ້ງ ແຂງແຮງໃນການຕີຖອຍ ແລະ ສະກັດກັ້ນປະກົດການຫຍໍ້ທໍ້ພາຍໃນການຈັດຕັ້ງ ແລະ ຖັນແຖວສະມາຊິກພັກ-ພະນັກງານ ໂດຍສະເພາະແມ່ນການແກ້ໄຂບັນຫາການສວຍໃຊ້ໜ້າທີ່ ເພື່ອສໍ້ລາດບັງຫຼວງທຸກຮູບແບບຂອງພະນັກງານ ເຊິ່ງເປັນໜຶ່ງໃນບັນດາເປົ້າໝາຍໂດຍກົງຂອງວຽກງານກວດກາທີ່ຕ້ອງໄດ້ເອົາໃຈໃສ່ສະເພາະໜ້າ ແລະ ຍາວນານ.
