ນາຍົກລັດຖະມົນຕີມາເລເຊຍພົບທ່ານ ສີຈິ້ນຜິງ ຫວັງຈີນຊ່ວຍໜຸນໂຄງການລົດໄຟຄວາມໄວສູງ

ວັນທີ 31 ມີນາ, ທ່ານ ອັນວາ ອິບຣາຮິມ ນາຍົກລັດຖະມົນຕີມາເລເຊຍ ໄດ້ເຂົ້າພົບປະທານປະເທດ ສີຈິ້ນຜິງ ລະຫວ່າງການເດີນທາງຢ້ຽມຢາມຈີນຄັ້ງທໍາອິດໃນຖານະຜູ້ນໍາມາເລເຊຍ ເຊິ່ງສື່ຄາດວ່າ: ມາເລເຊຍເລັ່ງຈະຂໍການຊ່ວຍເຫລືອຈາກຈີນໃນການສ້າງໂຄງການລົດໄຟຄວາມໄວສູງທີ່ເຊື່ອມຕໍ່ລະຫວ່າງນະຄອນຫລວງກົວລາລໍາເປີ ແລະ ສິງກະໂປ.

ລາຍງານລະບຸວ່າ: ທ່ານ ອິບຣາຮິມ ໄດ້ເດີນທາງເຖິງນະຄອນຫລວງປັກກິ່ງແຕ່ວັນທີ 29 ມີນາ ພ້ອມຄະນະຜູ້ແທນຈາກກະຊວງການຕ່າງປະເທດ, ການຄ້າ, ການຄົມມະນາຄົມ, ເຕັກໂນໂລຊີ, ເຄຫາ ແລະ ການທ່ອງທ່ຽວ ໂດຍພາຍຫລັງພົບທ່ານ ສີຈິ້ນຜິງ ແລ້ວ, ທ່ານ ອິບຣາຮິມ ມີກໍານົດເຂົ້າພົບນາຍົກລັດຖະມົນຕີ ຫລີ່ສຽງ ໃນວັນທີ 1 ເມສາ ເຊິ່ງຄາດວ່າທັງສອງຈະມີການລົງນາມໃນບັນທຶກຄວາມເຂົ້າໃຈທີ່ກ່ຽວຂ້ອງກັບຂະແໜງກະສິກໍາ ແລະ ການຄ້າສູງເຖິງ 16 ສະບັບ.

ສໍາລັບການເດີນທາງຢ້ຽມຢາມຈີນຄັ້ງນີ້ມີການຄາດຄະເນວ່າ: ທ່ານ ອິບຣາຮິມ ຈະພະຍາຍາມຂໍການຊ່ວຍເຫລືອຈາກຈີນໃນການສືບຕໍ່ໂຄງການບາງສ່ວນຂອງເສັ້ນທາງລົດໄຟເຊື່ອມສິງກະໂປ-ຄຸນໝິງ (SKRL) ເຊິ່ງມີໄລຍະທາງ 6.617,5 ກິໂລແມັດ ແລະ ຕັດຜ່ານຫລາຍປະເທດ ລວມທັງໄທ, ກໍາປູເຈຍ ແລະ ສປປ ລາວ ໂດຍເປັນສ່ວນໜຶ່ງຂອງໂຄງການ Belt and Road Initiative ຂອງຈີນ.

ນັບແຕ່ປີ 2009 ຈີນຖືເປັນຄູ່ຄ້າລາຍໃຫຍ່ທີ່ສຸດຂອງມາເລເຊຍ ໂດຍຍອດການຄ້າລະຫວ່າງ 2 ປະເທດໃນປີ 2022 ເພີ່ມຂຶ້ນເຖິງ 15,6% ເມື່ອທຽບໃສ່ແຕ່ລະປີ ມີມູນຄ່າເຖິງ 4,87 ແສນລ້ານຣິງກິດ (1,1062 ແສນລ້ານໂດລາ).

ອ້າງອີງ:

https://www.pmo.gov.my/…/china-is-an-important-trade…/

https://asia.nikkei.com/…/Malaysia-s-Anwar-meets-Xi…