ສະຫລອງປີໃໝ່ລາວ ໃຫ້ເປັນຈຸດຂາຍໃນການທ່ອງທ່ຽວ

ບົດທິດກໍ່າ

ຖ້າເຮົານັບຖອຍຫລັງກໍຍັງອີກບໍ່ພໍເທົ່າໃດວັນຈະຮອດເທສະການປີໃໝ່ລາວ ພສ 2566 ແລະ ຄສ 2023 ຄາດວ່າປີໃໝ່ປີນີ້ຈະເປັນປີໜຶ່ງທີ່ຍິ່ງໃຫຍ່ອາລັງການ ແລະ ມ່ວນຊື່ນທີ່ສຸດ. ອັນສາເຫດກໍຍ້ອນວ່າ ນັບແຕ່ການແຜ່ລະບາດຂອງພະຍາດໂຄວິດ-19 ມານີ້ ລາວເຮົາຍັງບໍ່ທັນມີເງື່ອນໄຂຈັດກິດຈະກໍາທາງການ ຫລື ທາງຮີດຄອງປະເພນີທີ່ໃຫຍ່ໂຕມະໂຫລານ ອັນໃດຫລວງຫລາຍ ເພາະວ່າທາງການເພິ່ນຍັງຈໍາກັດ, ບໍ່ທັນໄດ້ອະນຸຍາດໃຫ້ເຄື່ອນໄຫວຢ່າງເຕັມຮູບແບບເທື່ອ. ອີກປະການໜຶ່ງ ພະຍາດໂຄວິດ-19 ກໍຍັງບໍ່ທັນຫາຍຂາດໄປຈາກປະເທດເຮົາຢ່າງຊິ້ນເຊີງ. ມາຮອດໄລຍະປັດຈຸບັນ ກໍຍັງປາກົດມີໃຫ້ເຫັນ ແຕ່ບໍ່ມີໃຜຄ່ອຍເອົາຫົວໃສ່ໃຈຊາ ເພາະໃຜກໍອີ່ມໂຕ ແລະ ເຊັງມາເປັນສອງສາມປີແລ້ວ.

ແນວໃດກໍຕາມ, ນັບແຕ່ພັກ ແລະ ລັດຖະບານເຮົາໄດ້ຕັດສິນໃຈເປີດປະເທດມາແຕ່ເດືອນພຶດສະພາ 2022 ເປັນຕົ້ນມາ ສົມທົບກັບການເປີດເສັ້ນທາງລົດໄຟຄວາມໄວສູງ ລາວ-ຈີນ ເລີຍເຮັດໃຫ້ບັນຍາກາດທຸກສິ່ງທຸກຢ່າງລົງຕົວ ເຊິ່ງເຫັນວ່າອັນທີ່ໂດດເດັ່ນທີ່ສຸດກໍແມ່ນຜົນສໍາເລັດໃນການສ້າງສາພັດທະນາປະເທດຊາດ ເຊິ່ງໜຶ່ງໃນໂຄງການໃຫຍ່ໆຂອງຊາດກໍແມ່ນໂຄງການທ່າເຮືອບົກທ່ານາແລ້ງ ອັນເປັນສູນກາງໂລຈິສຕິກຂອງນະຄອນຫລວງວຽງຈັນ ກໍຄືຂອງປະເທດລາວເຮົາ ການທີ່ມີຜົນສໍາເລັດໃນການສ້າງສາພັດທະນາທີ່ກ່າວມານີ້ ຖືໄດ້ວ່ານັບແຕ່ມື້ນັ້ນມາ ລາວເຮົາໄດ້ປົດແອກຈາກປະເທດທີ່ບໍ່ມີທາງອອກສູ່ທະເລກາຍເປັນປະເທດເຊື່ອມໂຍງເຊື່ອມຈອດໃນພາກພື້ນ ແລະ ໃນໂລກຢ່າງເຕັມຕົວ. ໄປຄຽງຄູ່ກັບຂະບວນການທີ່ກ່າວມານີ້ ບັນຍາກາດທີ່ພົ້ນເດັ່ນໃຫ້ເຫັນອີກອັນໜຶ່ງກໍຄືມີນັກທ່ອງທ່ຽວຈາກພາຍໃນ ແລະ ຕ່າງປະເທດເລີ່ມທະຍອຍກັນເຂົ້າມາທ່ຽວລາວຜ່ານສາຍທາງລົດໄຟນັບມື້ເພີ່ມຂຶ້ນຈົນມາຮອດປັດຈຸບັນແຕ່ລະຖ້ຽວເຕັມອັ່ງອໍ ແລະ ບາງໄລຍະກໍຈົນໄດ້ເພີ່ມຖ້ຽວໂດຍສານທາງລົດໄຟຕື່ມ. ສໍາລັບທາງພາກກາງ ແລະ ພາກເໜືອ ເຊັ່ນເມືອງວັງວຽງກັບຫລວງພະບາງໄດ້ກາຍເປັນຈຸດຂາຍໃນການທ່ອງທ່ຽວຢ່າງໂດດເດັ່ນເຕັມຕົວ.

ຢ່າງໃດກໍດີ, ໂອກາດສະຫລອງບຸນປີໃໝ່ລາວ ພສ 2566 ທີ່ຈະມາເຖິງນີ້ ເປັນເວລາດີນາທີທອງທີ່ພວກເຮົາຕ້ອງມີວິທີການດຶງດູດເອົານັກທ່ອງທ່ຽວຈາກຕ່າງປະເທດເຂົ້າມາທ່ຽວລາວໃຫ້ມີໝາກມີຜົນ ແລະ ໃຫ້ປະສົບຜົນສໍາເລັດດ້ວຍສາເຫດ ແລະ ປັດໄຈຕ່າງໆຄື: ປີນີ້ໄດ້ພັກຍາວເຖິງ 5 ວັນເຕັມ. ອັນທີສອງ ຊ່ວງນີ້ເປັນຍາມແລ້ງ ອາກາດຮ້ອນການຫົດສົງ, ການຫລິ້ນນໍ້າໃນສະຖານທີ່ຕ່າງໆກໍຈະເປັນໄປດ້ວຍຄວາມມ່ວນຊື່ນຕາມອັດທະຍາໃສຢ່າງເຕັມທີ່. ອັນທີສາມ ພວກເຮົາມີສະຖານທີ່ທ່ອງທ່ຽວທໍາມະຊາດ, ມີແມ່ນໍ້າລໍ້າເຊ, ມີແກ້ງຕາດຫາດຊາຍ ແລະ ພູຜາປ່າໄມ້ທີ່ສວຍງາມໃນທົ່ວປະເທດ. ສ່ວນທາງດ້ານປະເພນີວັດທະນະທໍາອັນດີງາມຂອງຊາດນັ້ນ ການສະຫລອງບຸນປີໃໝ່ພວກເຮົາກໍມີຄວາມໂດດເດັ່ນດີງາມຢູ່ແລ້ວ.

ເພາະສະນັ້ນ ກ່ອນຈະຮອດບຸນປີໃໝ່ ໜ້າທີ່ຂອງພວກເຮົາທີ່ຕ້ອງເລັ່ງໃສ່ນັ້ນຄືຕັ້ງໜ້າໂຄສະນາຜ່ານສື່ໃນທຸກຮູບແບບໃຫ້ວ່ອງໄວທັນໃຈກາຍເປັນກະບອກສຽງໃຫ້ຂະແໜງການທ່ອງທ່ຽວ, ປັບປຸງ, ບຸກເບີກສະຖານທີ່ທ່ອງທ່ຽວທີ່ມີໃນແຕ່ລະທ້ອງຖິ່ນໃຫ້ຈົບງາມ ສາມາດຮອງຮັບນັກທ່ອງທ່ຽວໃນທຸກດ້ານບໍ່ວ່າໃນດ້ານທີ່ພັກອາໄສ, ການບໍລິການ ແລະ ການປັບຖະໜົນຫົນທາງໃຫ້ໄປມາສະດວກສະບາຍ. ຕາມທິດກໍ່າວ່າ, ບຸນປີໃໝ່ປີນີ້ຜູ້ປະກອບການທີ່ວັງວຽງ, ຫລວງພະບາງ ນັບທັງພາກໃຕ້ແຖວສາລະວັນ, ເຊກອງ, ປາກເຊແດນໃຕ້, ອັດຕະປືແດນງາມ ແລະ ແຂວງອື່ນໆໃນທົ່ວປະເທດຕ້ອງພາກັນຖົງຕຶ່ງ ແລະ ມ່ວນແບບ “ບໍ່ໃຫ້ເວົ້າ” ຢ່າງແນ່ນອນ.