ປກສ ເມືອງສີໂຄດຕະບອງ ສ້າງບົດບັນທຶກສັນຍາປ້ອງກັນຄວາມສະຫງົບ ກັບ 80 ຫົວໜ່ວຍທຸລະກິດ
ວັນທີ 28 ມີນາ 2023 ຜ່ານມາ, ປກສ ເມືອງສີໂຄດຕະບອງ ນໍາພາໂດຍ ທ່ານ ພັທ ຈໍາປາ ແສງສຸລິຍາ ຫົວໜ້າກອງບັນຊາການ ປກສ ເມືອງສີໂຄດຕະບອງ ໄດ້ສ້າງບົດບັນທຶກສັນຍາປ້ອງກັນຄວາມສະຫງົບ ກັບບັນດາເຈົ້າຂອງຫົວໜ່ວຍທຸລະກິດ, ໂຮງແຮມ, ເຮືອນພັກ, ຮ້ານອາຫານ, ຮ້ານບັນເທີງ, ຄາລາໂອເກະ ຮ້ານກິນດື່ມ ແລະ ອື່ນໆ 80 ຫົວໜ່ວຍທຸລະກິດ ເພື່ອໃຫ້ເຂົ້າໃຈຕໍ່ແນວທາງນະໂຍບາຍພັກ-ລັດ, ຮັກສາໄດ້ຮີດຄອງປະເພນີ, ວັດທະນະທຳອັນດີງາມຂອງຊາດລາວເຮົາ ເຄື່ອນໄຫວທຸລະກິດຖືກຕ້ອງ ສອດຄ່ອງ ແລະປະຕິບັດເຂັ້ມງວດຕໍ່ຂໍ້ກຳນົດ, ແຈ້ງການຄຳສັ່ງດຳລັດຕ່າງໆຂອງຂັ້ນເທິງວາງອອກ; ເຊີ່ງໃຫ້ກຽດເຂົ້າຮ່ວມໂດຍ ທ່ານ ພັອ ພູພອນ ວົງພະໄຕ ຮອງຫົວໜ້າກອງບັນຊາການ ປກສ ນວ, ມີ ທ່ານ ອິນປອງ ທຸມມາ ຮອງເລຂາພັກເມືອງສີໂຄດຕະບອງ ພ້ອມດ້ວຍພາກສ່ວນກ່ຽວຂ້ອງ.
ໃນການສ້າງບົດບັນທຶກສັນຍາປ້ອງກັນຄວາມສະຫງົບຄັ້ງນີ້, ທ່ານ ພັທ ສຸລິໂຍ ສຸທຳມະວົງ ຮອງຫົວໜ້າກອງບັນຊາການ ປກສ ເມືອງສີໂຄດຕະບອງ ໄດ້ຜ່ານບົດບັນທຶກສັນຍາປ້ອງກັນຄວາມສະຫງົບ ໂດຍມີເນື້ອໃນສຳຄັນບາງຕອນວ່າ: ຜູ້ປະກອບການ ຕ້ອງຮັບປະກັນຄວາມສະຫງົບທາງດ້ານການເມືອງ ແລະຄວາມເປັນລະບຽບຮຽບຮ້ອຍທາງດ້ານສັງຄົມ ຮັບປະກັນບໍ່ໃຫ້ມີການປຸ້ນຈີ້, ຊີງຊັບ, ຄາດຕະກຳ, ຂີ້ລັກ-ງັດແງະ, ມົ້ວສຸມສິ່ງເສບຕິດ ແລະ ສິ່ງອື່ນໆ ທີ່ເຫັນວ່າຂັດກັບລະບຽບການຕ່າງໆ, ຫ້າມຫລິ້ນການພະນັນທີ່ຕ້ອງຫ້າມ, ອາລະວາດຕີກັນ, ຫວ່ານໃບປີວ-ເດີນຂະບວນການປະທ້ວງ, ແຈກບັດຊວນເຊື່ອບິດເບືອນແນວທາງນະໂຍບາຍຂອງພັກ-ລັດ, ຫ້າມລັກລອບວາງລະເບີດ ຫລື ກໍ່ໃຫ້ເກີດສຽງແຕກ; ເອົາໃຈໃສ່ຢ່າງຕັ້ງໜ້າຕໍ່ວຽກງານປ້ອງກັນຄວາມສະຫງົບ, ຕ້ອງກວດກາຄວາມເປັນລະບຽບຮຽບຮ້ອຍໃນຂອບເຂດບໍລິເວນຄວາມຮັບຜິດຊອບຂອງຕົນ ຕະຫລອດ 24 ຊົ່ວໂມງ ໃຫ້ຮັບປະກັນທາງດ້ານອັກຄີໄພ, ມີລະບົບອະນາໄມລະບາຍ-ບໍາບັດນໍ້າເປື້ອນ, ລະບົບເກັບມ້ຽນຂີ້ເຫຍື້ອ ແລະ ຄວາມສະຫງົບປອດໄພ 100%; ຊ່ວຍເປັນຫູເປັນຕາໃຫ້ເຈົ້າໜ້າທີ່, ຖ້າພົບເຫັນການກະທຳຜິດຕ່າງໆ ໃຫ້ຮີບຮ້ອນລາຍງານຕໍ່ເຈົ້າໜ້າທີ່ກ່ຽວຂ້ອງໂດຍດ່ວນ ເພື່ອສະກັດກັ້ນເຫດການໃຫ້ທັນເວລາ; ຫ້າມນຳເອົາສະຖານທີ່ຂອງຕົນເອງ ເປັນບ່ອນເອື້ອອຳນວຍຄວາມສະດວກໃຫ້ບຸກຄົນ ຫຼື ກຸ່ມຄົນທີ່ບໍ່ດີເປັນບ່ອນລີ້ຊ້ອນຢ່າງເດັດຂາດ ຫລື ຊຸກເຊື່ອງຊັບຜິດກົດໝາຍ ແລະ ສານສິ່ງເສບຕິດທຸກປະເພດ, ອຸປະກອນວັດຖຸປະກອບການກະທໍາຜິດ ( ບໍ່ວ່າທາງກົງ ຫລື ທາງອ້ອມ ); ເປັນເຈົ້າການຮ່ວມຂະບວນການປ້ອງກັນບັນດາກອງປະຊຸມຂອງພັກ-ລັດ, ວັນສຳຄັນຕ່າງໆຂອງພັກ-ຂອງຊາດ, ທີ່ຈັດຂຶ້ນຢູ່ ນວ ເພື່ອຕ້ານປະກົດການຫຍໍ້ທໍ້ໃນສັງຄົມໃນຂອບເຂດຄວາມຮັບຜິດຊອບຂອງຕົນຮັບປະກັນໃຫ້ຫລຸດໜ້ອຍຖອຍລົງ.
