ຄະນະປະຈໍາສະພາປະຊາຊົນແຂວງຈໍາປາສັກ ຄົ້ນຄວ້າຫາລືຫລາຍບັນຫາສໍາຄັນ

ກອງປະຊຸມຄະນະປະຈໍາສະພາປະຊາຊົນແຂວງຈໍາປາສັກ ປະຈໍາເດືອນມີນາ 2023 ໄດ້ເປີດຂຶ້ນວັນທີ 31 ມີນາ 2023 ຢູ່ທີ່ຫ້ອງປະຊຸມຂອງສະພາປະຊາຊົນແຂວງ, ໂດຍພາຍໃຕ້ການເປັນປະທານຂອງ ທ່ານ ສາຍທອງ ໄຊຍະວົງ ປະທານຄະນະປະຈໍາສະພາປະຊາຊົນແຂວງ.

ກອງປະຊຸມດັ່ງກ່າວ, ໄດ້ຄົ້ນຄວ້າຫລາຍບັນຫາສໍາຄັນຄື:

– ຮ່າງມະຕິຂອງຄະນະປະຈໍາສະພາປະຊາຊົນແຂວງຈໍາປາສັກ ວ່າດ້ວຍການຮັບ ແລະ ແກ້ໄຂຄໍາສະເໜີຂອງປະຊາຊົນ ທີ່ສະເໜີຜ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໃນໄລຍະລົງເຄື່ອນໄຫວພົບປະປະຊາຊົນ;

– ຮ່າງມະຕິຂອງຄະນະປະຈໍາສະພາປະຊາຊົນແຂວງຈໍາປາສັກ ວ່າດ້ວຍວຽກງານສາຍດ່ວນ;

– ຮ່າງມະຕິຂອງຄະນະປະຈໍາສະພາປະຊາຊົນແຂວງຈໍາປາສັກວ່າດ້ວຍການປະເມີນຄວາມໄວ້ວາງໃຈໃນການຈັດຕັ້ງປະຕິບັດໜ້າທີ່ຂອງບຸກຄະນະລາກອນ ທີ່ສະພາປະຊາຊົນແຂວງເລືອກຕັ້ງ ຫລື ຮັບຮອງເອົາການແຕ່ງຕັ້ງ;

– ຮ່າງມະຕິຂອງຄະນະປະຈໍາສະພາປະຊາຊົນແຂວງຈໍາປາສັກວ່າດ້ວຍການປະເມີນຕໍ່ຄວາມຮັບຜິດຊອບຂອງບຸກຄະລາກອນທີ່ລາຍງານ, ຊີ້ແຈງ ແລະ ຕອບຄໍາຊັກຖາມໃນກອງປະຊຸມສະພາປະຊາຊົນແຂວງ;

ຈາກນັ້ນ, ກອງປະຊຸມໄດ້ສືບຕໍ່ຮັບຟັງການລາຍງານຜົນການເຄື່ອນໄຫວເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ແລະ ສະພາປະຊາຊົນແຂວງຈໍາປາສັກ ຊຸດທີ II; ລາຍງານການສັງລວມຄໍາສະເໜີຂອງປະຊາຊົນ ທີ່ຮັບມາພິຈາລະນາແກ້ໄຂ, ຕິດພັນກັບຄວາມຮັບຜິດຊອບຂອງແຕ່ລະຄະນະກໍາມະການ ເພື່ອນໍາໄປຊຸກຍູ້ໃຫ້ພາກສ່ວນທີ່ກ່ຽວຂ້ອງແກ້ໄຂ;ນອກນີ້, ກໍໄດ້ຄົ້ນຄວ້າໜັງສືສະເໜີຂອງອົງການປົກຄອງແຂວງ, ຄົ້ນຄວ້າພິຈາລະນາ ຮັບຮອງເອົາການສະເໜີແຕ່ງຕັ້ງຫົວໜ້າໜ່ວຍງານ, ພະນັກງານຊ່ວຍວຽກຄະນະສະມາຊິກສະພາປະຊາຊົນແແຂວງ ປະຈໍາເຂດເລືອກຕັ້ງ 9 ເມືອງ, ນະຄອນ ແລະ ຄົ້ນຄວ້າປຶກສາຫາລືວຽກງານປິ່ນອ້ອມຈໍານວນໜຶ່ງ. ເຊິ່ງ ຄະນະປະຈໍາສະພາປະຊາຊົນແຂວງ ແລະ ຜູ້ແທນກອງປະຊຸມ ໄດ້ປະກອບຄໍາຄິດເຫັນຕໍ່ເນື້ອໃນທີ່ນໍາມາຄົ້ນຄວ້າພິຈາລະນາຢ່າງມີຈຸດສຸມ ບົນຟື້ນຖານສິດປະຊາທິປະໄຕ, ແນໃສ່ລະບຽບກົດໝາຍເປັນບ່ອນອີງ ເພື່ອເຮັດວຽກງານທີ່ນໍາເຂົ້າມາຄົ້ນຄວ້າພິຈາລະນາ ໄດ້ຮັບການຈັດຕັ້ງປະຕິບັດ ແລະ ແກ້ໄຂຢ່າງມີປະສິດທິພາບ, ຮັບປະກັນຄວາມຖືກຕ້ອງສອດຄ່ອງກັບລະບຽບກົດໝາຍ.