ກະຊວງ ປກສ ຮ່ວມປູກຕົ້ນໄມ້ ເນື່ອງໃນໂອກາດວັນສ້າງຕັ້ງກຳລັງ ຄົບຮອບ 62 ປີ
ກະຊວງປ້ອງກັນຄວາມສະຫງົບ ຈັດພິທີປູກຕົ້ນໄມ້ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ (5 ເມສາ 1961-5 ເມສາ 2023) ຄົບຮອບ 62 ປີ ໃນວັນທີ 3 ເມສາ 2023 ຢູ່ວິທະຍາຄານການເມືອງປ້ອງກັນຄວາມສະຫງົບ, ເຂົ້າຮ່ວມພິທີປູກໂດຍ ພົອ ວິໄລ ຫລ້າຄຳຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງ ປກສ, ພ້ອມດ້ວຍບັນດາຮອງລັດຖະມົນຕີ, ຄະນະພັກກະຊວງ ແລະ ບັນດາກົມກອງອ້ອມຂ້າງ.
ຕົ້ນໄມ້ທີ່ນຳມາປູກໃນຄັ້ງນີ້, ມີປະເພດຕົ້ນໄມ້ດູ່, ຕົ້ນຈຳປາ, ຕົ້ນຄູນ ແລະ ຕົ້ນກາກະເລົາ ລວມທັງໝົດ 174 ຕົ້ນ; ເຊິ່ງເປັນການປະກອບສ່ວນຂອງແຕ່ລະກົມກອງອ້ອມຂ້າງກະຊວງ ແລະ ບັນດາ ປກສ ແຂວງໃນຂອບເຂດທົ່ວປະເທດ ແລະ ໃນມື້ນີ້, ຕົ້ນໄມ້ທີ່ປູກສຳເລັດແລ້ວມີຈໍານວນ 62 ຕົ້ນ. ສ່ວນຈໍານວນທີ່ຍັງເຫລືອແມ່ນຈະໄດ້ສືບຕໍ່ປູກຈົນກວ່າຈະສໍາເລັດ ໄດ້ມອບໃຫ້ແຕ່ລະກົມກອງເປັນຜູ້ບົວລະບັດຮັກສາຕໍ່ໄປຕາມການມອບໝາຍ ເພື່ອເຮັດໃຫ້ກາຍເປັນພື້ນທີ່ສີຂຽວໃນອານາຄົດ ພ້ອມທັງເປັນການສ້າງຂະບວນການສະເຫລີມສະຫລອງວັນສ້າງຕັ້ງ ກຳລັງປ້ອງກັນຄວາມສະຫງົບ ຄົບຮອບ 62 ປີໃຫ້ມີບັນຍາກາດຟົດຟື້ນ ແລະ ມີຄວາມໝາຍຄວາມສຳຄັນນຳອີກ.
ຂໍ້ມູນ+ພາບ: ຄວາມສະຫງົບ
