ແຂວງບໍ່ແກ້ວ ແຈ້ງການເຂັ້ມງວດຄຸ້ມຄອງລາຄາສິນຄ້າໃນໄລຍະບຸນປີໃໝ່ລາວ ບໍ່ໃຫ້ສວຍໂອກາດຂຶ້ນລາຄາຕາມລໍາພັງໃຈ

ເພື່ອເຮັດໃຫ້ລາຄາສິນຄ້າໃນທ້ອງຕະຫລາດມີສະຖຽນລະພາບ ໂດຍສະເພາະເພື່ອປົກປ້ອງສິດ ແລະ ຜົນປະໂຫຍດອັນຊອບທໍາຂອງຜູ້ຊົມໃຊ້ ພ້ອມທັງຫລີກເວັ້ນການສວຍໂອກາດຂຶ້ນລາຄາສິນຄ້າ ຕາມລໍາພັງໃຈ ຂອງຜູ້ປະກອບ ການ. ດັ່ງນັ້ນ, ພະແນກອຸດສາຫະກໍາ ແລະ ການຄ້າ ໄດ້ອອກແຈ້ງການເລກທີ 517/ພອຄ.ບກ ລົງວັນທີ 31 ມີນາ 2023 ວ່າ:

1. ໃຫ້ຫ້ອງການອຸດສາຫະກໍາ ແລະ ການຄ້າເມືອງ ເປັນເຈົ້າການປະສານສົມທົບກັບຫ້ອງການທີ່ກ່ຽວຂ້ອງພາຍໃນເມືອງ, ໂດຍສະເພາະຄະນະຊີ້ນໍາວຽກງານຄຸ້ມຄອງລາຄາສິນຄ້າ ແລະ ຄ່າບໍລິການຂັ້ນເມືອງ, ເອົາໃຈໃສ່ຄຸ້ມຄອງ ລາຄາສິນຄ້າປະເພດສະບຽງອາຫານ ເຊັ່ນ: ເຂົ້າກິນ, ຊີ້ນໝູ, ຊີ້ນງົວ, ຊີ້ນຄວາຍ, ໄກ່, ປາ ແລະ ປະເພດພືດຜັກ ຕ່າງໆ ລວມທັງສິນຄ້າອຸປະໂພກ-ບໍລິໂພກ ແລະ ສິນຄ້າທົ່ວໄປ ທີ່ມີຜົນກະທົບໄວ ຕໍ່ຊີວິດການເປັນຢູ່ຂອງປະຊາຊົນ ໃຫ້ມີຄວາມສະຫງົບ ແລະ ສາມາດສະຫນອງພຽງພໍກັບ ຄວາມຕ້ອງການຂອງສັງຄົມ, ພ້ອມທັງ ຕິດຕາມ, ກວດກາລາຄາສິນຄ້າ ແລະ ຄ່າບໍລິການ ໃຫ້ເປັນປົກກະຕິ ບໍ່ໃຫ້ມີການສວຍໂອກາດຂຶ້ນ ລາຄາສິນຄ້າ ຕາມລໍາພັງໃຈ;
2. ໃຫ້ຫ້ອງການອຸດສາຫະກໍາ ແລະ ການຄ້າເມືອງ ເປັນເຈົ້າການໃນການເຜີຍແຜ່ ແນະນໍາຜູ້ປະກອບການໃຫ້ເຂົ້າໃຈຕໍ່ແນວທາງນະໂຍບາຍ ກໍຄືລະບຽບການ ທີ່ລັດວາງອອກໃນແຕ່ລະໄລຍະເປັນຕົ້ນ ການຕິດສະຫລາກສິນຄ້າເປັນ ພາສາລາວ, ການຕິດປ້າຍລາຄາສິນຄ້າ, ການຕິດປະກາດ ຫລື ໂຄສະນາ ລາຄາສິນຄ້າ ແລະ ຄ່າບໍລິການເປັນເງິນກີບ ພ້ອມທັງຊຸກຍູ້ໃຫ້ບັນດາຜູ້ປະກອບ ການ ໃນການສະຫນອງສິນຄ້າ ໃຫ້ພຽງພໍກັບຄວາມຕ້ອງການ ເພື່ອຫລີກລ້ຽງບໍ່ໃຫ້ມີການສວຍໂອກາດຂຶ້ນລາຄາສິນຄ້າທີ່ບໍ່ສົມເຫດສົມຜົນໃນຊ່ວງເທດສະການສະເຫລີມສະຫລອງບຸນປີໃໝ່ລາວ ພສ 2566;
3. ໃຫ້ຄະນະຄຸ້ມຄອງຈັດສັນຕະຫລາ ເປັນເຈົ້າການຊຸກຍູ້, ລະດົມຫົວໜ່ວຍຊາວຄ້າຂາຍ ໃຫ້ມີການເຄື່ອນໄຫວປົກກະຕິ ເພື່ອເຮັດໃຫ້ການສະໜອງສິນຄ້າພຽງພໍ ແລະ ລາຄາສິນຄ້າມີຄວາມສະຫງົບ;
4. ໃຫ້ຜູ້ປະກອບການທຸລະກິດ, ຊາວຄ້າຂາຍ ນໍາສິນຄ້າຂອງຕົນອອກມາຈໍາໜ່າຍໃຫ້ພຽງພໍ ພ້ອມຕິດປ້າຍລາຄາເປັນເງິນກີບ ຕາມລາຄາສິນຄ້າທີ່ລັດກໍານົດໃຫ້ ໂດຍສະເພາະແມ່ນຫມວດສິນຄ້າຄວບຄຸມເຊັ່ນ: ເຂົ້າກິນ, ຊີ້ນສັດ, ປາ, ຫ້າມກັກຕູນສິນຄ້າ, ສວຍໂອກາດຂຶ້ນລາຄາຕາມລໍາພັງໃຈ ແລະ ອື່ນໆ ທີ່ເປັນການລະເມີດລະບຽບກົດໝາຍ;
5. ມອບໃຫ້ຂະແໜງການຄ້າພາຍໃນ, ຫ້ອງການອຸດສາຫະກໍາ ແລະ ການຄ້າເມືອງ, ແຕ່ງຕັ້ງເຈົ້າຫນ້າທີ່ລົງຕິດຕາມກວດກາ ລາຄາສິນຄ້າ ແລະ ຄ່າບໍລິການ ໃນຊ່ວງງານເທດສະການດັ່ງກ່າວ.
6. ຫາກພົບເຫັນການລະເມີດ ເຊັ່ນ: ການສວຍໂອກາດຂຶ້ນລາຄາສິນຄ້າ ແລະ ການກັກຕຸນສິນຄ້າ ໂດຍບໍ່ມີເຫດຜົນ, ບໍ່ຕິດປ້າຍລາຄາສີນຄ້າຕາມທີ່ລັດ ກໍານົດ, ການຕິດປະກາດ ຫລື ໂຄສະນາ ລາຄາສິນຄ້າ ແລະ ຄ່າບໍລິການ ເປັນເງິນຕາຕ່າງປະເທດ, ການວັດແທກ ການຊັງຜ່ອງ (ຕາຊິງ) ບໍ່ໄດ້ມາດຕະຖານ, ການຈໍາໜ່າຍສິນຄ້າໝົດດອາຍຸ, ການຈໍາໜ່າຍສິນຄ້າ ນອກລະບົບ (ສິນຄ້າເຖື່ອນ), ການຈໍາຫນ່າຍສິນຄ້າລອກຮຽນແບບ ແລະ ອື່ນໆ ແມ່ນໃຫ້ນໍາໃຊ້ມາດຕະການກ່າວເຕືອນດ້ວຍການເຮັດບົດບັນທຶກ, ພ້ອມນໍາໃຊ້ມາດຕະການຕາມກົດໝາຍ ແລະ ລະບຽບການອື່ນໆທີ່ກ່ຽວຂ້ອງຢ່າງເຂັ້ມງວດ.

ດັ່ງນັ້ນ, ຈຶ່ງແຈ້ງມາຍັງທ່ານເພື່ອຊາບ ແລະ ຈັດຕັ້ງປະຕິບັດແຈ້ງການສະບັບນີ້ຢ່າງເຂັ້ມງວດ.