ລາຄານໍ້າມັນໂລກເພີ່ມຂຶ້ນ ຫລັງໂອເປັກກຽມຫລຸດ ເພດານຜະລິດອີກ 1 ລ້ານກວ່າບາເຣລ
ສັນຍາຊື້ຂາຍລ່ວງໜ້ານໍ້າມັນດິບໃນຕະຫລາດໂລກປັບເພີ່ມຂຶ້ນຫລາຍກວ່າ 7% ໃນໄລຍະເປີດຕະຫລາດຕົ້ນອາທິດນີ້ ຫລັງໂອເປັກ ແລະ ພັນທະມິດ ລວມທັງຣັດເຊຍກຽມຫລຸດເພດານການຜະລິດລົງອີກວັນລະຫລາຍກວ່າ 1 ລ້ານບາເຣລ.
ວັນທີ 3 ເມສາ, ສໍານັກຂ່າວຕ່າງປະເທດລາຍງານວ່າ: ອົງການກຸ່ມປະເທດຜູ້ສົ່ງນໍ້າມັນອອກ (ໂອເປັກ) ແລະ ພັນທະມິດນໍາໂດຍຣັດເຊຍ ໃນນາມ “ໂອເປັກພລັສ” ປະກາດຮ່ວມກັນ ໃນວັນທີ 2 ເມສາຜ່ານມາ ຫລຸດກໍາລັງການຜະລິດລົງອີກປະມານວັນລະ 1,16 ລ້ານບາເຣລ ເທົ່າກັບວ່າຈະເຫລືອປະມານ 3,66 ລ້ານບາເຣລຕໍ່ວັນ ຄິດເປັນ 3,7% ຂອງອຸປະສົງໂລກໃນປັດຈຸບັນ.
ມາດຕະການດັ່ງກ່າວຈະມີຜົນໃນເດືອນພຶດສະພານີ້ ແລະ ຖືເປັນການຫລຸດກໍາລັງການຜະລິດແຕ່ລະວັນຫລາຍທີ່ສຸດຂອງໂອເປັກ ນັບແຕ່ການປະກາດຫລຸດກໍາລັງການຜະລິດລົງວັນລະ 2 ລ້ານບາເຣລ ໃນເດືອນຕຸລາປີຜ່ານມາ.
ຂະນະທີ່ສັນຍາຊື້ຂາຍລ່ວງໜ້ານໍ້າມັນດິບເບຣນ ງວດສົ່ງມອບເດືອນເມສາປັບເພີ່ມຂຶ້ນ 5,67 ໂດລາ ຫລື 7,1% ເຮັດໃຫ້ລາຄາຊື້ຂາຍໃນໄລຍະເປີດຕະຫລາດຢູ່ລະດັບ 85,56 ໂດລາສະຫະລັດຕໍ່ບາເຣລ ເປັນສະຖິຕິສູງສຸດໃນຮອບເກືອບ 1 ເດືອນ.
ສ່ວນລາຄາສັນຍາຊື້ຂາຍລ່ວງໜ້ານໍ້າມັນດິບເວສເທກຊັສ ປັບເພີ່ມຂຶ້ນ 5,41 ໂດລາສະຫະລັດ ຫລື 7,2% ສົ່ງຜົນໃຫ້ລາຄາຊື້ຂາຍໃນໄລຍະເປີດຕະຫລາດຢູ່ລະດັບ 81,08 ໂດລາສະຫະລັດຕໍ່ບາເຣລ ເປັນສະຖິຕິສູງສຸດນັບແຕ່ທ້າຍເດືອນມັງກອນຜ່ານມາ.
