ການກໍ່ສ້າງຂົວຄົນຍ່າງຂ້າມທາງຢູ່ຖະໜົນໄກສອນພົມວິຫານຈະໃຫ້ສຳເລັດໃນປີ 2023 ນີ້

ທ່ານ ສຸລິວັນ ພົມມະຫາໄຊ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫລວງວຽງຈັນ ໃຫ້ສໍາພາດວັນທີ 3 ເມສາ 2023 ວ່າ: ການກໍ່ສ້າງຂົວຂ້າມທາງຢູ່ຖະໜົນໄກສອນພົມວິຫານກິໂລແມັດທີ 5 ບ້ານໂພນພະເນົາ ມີຈຸດປະສົງເພື່ອອຳນວຍຄວາມສະດວກໃຫ້ແກ່ການຂ້າມທາງຂອງນ້ອງນັກຮຽນ ໃນເວລາເຂົ້າ-ອອກຈາກໂຮງຮຽນມັດທະຍົມມິດຕະພາບລາວ-ຫວຽດ ພ້ອມນັ້ນຍັງອຳນວຍຄວາມສະດວກໃຫ້ພໍ່ແມ່ປະຊາຊົນ ພະນັກງານ ທີ່ມີຈຸດປະສົງຂ້າມທາງຢູ່ເຂດດັ່ງກ່າວ ແລະ ຈະຊ່ວຍຫລຸດຜ່ອນຄວາມແອອັດ ລົດຕິດໃນເສັ້ນທາງຖະໜົນໄກສອນພົມວິຫານ ເຊິ່ງການກໍ່ສ້າງພະແນກໂຍທາທິການ ແລະ ຂົນສົ່ງ ນວ ໄດ້ດໍາເນີນໄປຕາມຂັ້ນຕອນ ພ້ອມທັງໄດ້ຮັບທິດຊີ້ນໍາຈາກຂັ້ນເທິງ ກ່ອນຈະລົງມືກໍ່ສ້າງໄດ້ມີການນໍາສະເໜີຂ່າວ ອອກໜັງສືແຈ້ງເຖິງທຸກພາກສ່ວນຜູ້ໃຊ້ລົດໃຊ້ຖະໜົນຮັບຊາບກ່ຽວກັບການກໍ່ສ້າງຂົວຄົນຍ່າງຂ້າມທາງຢູ່ຖະໜົນໄກສອນ ພົມວິຫານ ກິໂລແມັດທີ 5 ເນື່ອງຈາກວ່າສະພາບການສັນຈອນຕົວຈິງເສັ້ນທາງດັ່ງກ່າວໜາແໜ້ນ ແລະ ສັບສົນ ເປັນຕົ້ນ ໂມງເຂົ້າການ ແລະ ເລີກການ ແມ່ນມີລົດມາຈອດແຄມທາງເພື່ອສົ່ງນັກຮຽນ ມີນັກຮຽນຍ່າງຂ້າມທາງ ສະນັ້ນໃນເວລາການດໍາເນີນກໍ່ສ້າງບາງຄັ້ງເຮັດໃຫ້ການສັນຈອນມີຄວາມຫຍຸ້ງຍາກບໍ່ສະດວກ ໃນນາມຄະນະຮັບຜີດຊອບຂໍໃຫ້ພໍ່ແມ່ປະຊາຊົນຜູ້ໃຊ້ລົດໃຊ້ຖະໜົນຈົ່ງໃຫ້ການຮ່ວມມື ມີຄວາມລະມັດລະວັງ ມີສະຕິເວລາສັນຈອນຜ່ານຈຸດດັ່ງກ່າວ ຖ້າບໍ່ມີຄວາມຈໍາເປັນຜ່ານຈຸດກໍ່ສ້າງຂົວສະເໜີໃຫ້ນໍາໃຊ້ເສັ້ນທາງອື່ນ ເພື່ອຄວາມສະດວກ.

ປັດຈຸບັນໂຄງການດັ່ງກ່າວໄດ້ເລີ່ມລົງມືຈັດຕັ້ງປະຕິບັດແຕ່ວັນທີ 8 ມີນາ 2023 ເປັນຕົ້ນມາ ໂດຍບໍລິສັດ BLEU GRASS ເປັນຜູ້ລົງທຶນກໍ່ສ້າງຊ່ວຍ ເຊິ່ງການກໍ່ສ້າງຂົວຂ້າມທາງຄາດວ່າຈະໃຫ້ສໍາເລັດພາຍໃນປີ 2023 ພາຍຫຼັງສຳເລັດແລ້ວ ບໍລິສັດຈະໄດ້ມີການຕິດຕັ້ງປ້າຍໂຄສະນາຕ່າງໆຕາມການອະນຸມັດຂອງຂະແໜງການກ່ຽວຂ້ອງ.

ນອກນັ້ນທ່ານ ຍັງໃຫ້ຮູ້ຕື່ມອີກວ່າ: ສໍາລັບການກໍ່ສ້າງທາງຄົນຍ່າງຂ້າມທາງຕາມແຜນເບື້ອງຕົ້ນບໍລິສັດໄດ້ສຶກສາຢູ່ 4 ຈຸດຄື: ຖະໜົນໄກສອນພົມວິຫານ ກິໂລແມັດທີ 5 ຖະໜົນໜອງບອນຕະຫລາດຂົວດິນ, ຕະຫລາດເຊົ້າ ຖະໜົນດົງໂດກ ແລະ ຖະໜົນເຕ່ 4 ແຕ່ບໍລິສັດ ເຫັນດີກໍ່ສ້າງຈຸດຖະໜົນໄກສອນພົມວິຫານ ກິໂລແມັດທີ 5 ກ່ອນ ສ່ວນອີກ 3 ຈຸດແມ່ນແຜນການໃນຕໍ່ໜ້າ.

cr: ວຽງຈັນໃໝ່