4 ສ່ຽວພາກັນເຂົ້າປ່າລ່າສັດ ແຕ່ພາດປືນເກາະໃສ່ຫຍ້າລັ່ນຖືກສ່ຽວ 1 ຄົນ ບໍລິເວນສັນຫລັງ 48 ລູກ ຈົນເສຍຊີວິດ
ຕາມການໃຫ້ຂໍ້ມູນຂອງທາງເຈົ້າໜ້າທີ່ສືບສວນ-ສອບສວນ ຄະດີອາຍາ ປກສ ເມືອງສິງ ແຂວງຫລວງນ້ຳທາ ໃຫ້ຮູ້ວ່າ: ວັນທີ 7 ມີນາ 2023 ຜ່ານມາ ໄດ້ຮັບແຈ້ງເຫດຈາກ ປກສ ກຸ່ມບ້ານ ທົ່ງໃໝ່ ວ່າມີເຫດການຫລົງຍິງກັນຢູ່ຂອບເຂດຫົວນ້ຳສ໋ອກໃຫ່ຍ ພາຍຫລັງໄດ້ຮັບແຈ້ງ ເຈົ້າໜ້າທີ່ໜ່ວຍງານສືບສວນ-ສອບສວນຄະດີອາຍາ ກໍໄດ້ລົງສົມທົບກັບປກສ ກຸ່ມ ບ້ານທົ່ງໃໝ່ ລົງກວດກາສະຖານທີ່ເກີດເຫດຕົວຈິງ ພົບຜູ້ເສຍຊີວິດ 1 ຄົນ ຊື່ທ້າວ ຊໍແພວ ອາຍຸ 21 ປີ ອາຊີບ ຊາວສວນ, ຢູ່ບ້ານ ຫ້ວຍນ້ຳແດງ ເມືອງສິງ ແຂວງ ຫລວງນ້ຳທາ ພ້ອມທັງກັກຕົວຜູ້ກໍ່ເຫດໄດ້ 1 ຄົນ ຊື່ ທ້າວ ຄອງຊື ອາຍຸ 26 ປີ, ອາຊີບ ຊາວສວນ, ຢູ່ບ້ານ ຫ້ວຍນ້ຳແດງ, ເມືອງສິງ ມາສືບສອບ-ສອບສວນ.
ຜ່ານການສືບສອບ-ສອບສວນຂອງເຈົ້າໜ້າທີ່ຜູ້ກ່ຽວໄດ້ຮັບສາລະພາບວ່າ: ໃນມື້ເກີດເຫດຕົນໄດ້ຊວນ ທ້າວ ຊໍແພວ (ຜູ້ເສຍຊີວິດ), ທ້າວ ຊໍເຄີ ແລະ ທ້າວ ພໍໂຊ ໄປເລາະປ່າລ່າສັດ ຈາກນັ້ນພວກກ່ຽວ 4 ຄົນໄດ້ຕົກລົງໄປນຳກັນ ພາກັນກະກຽມເຄື່ອງທີ່ຈຳເປັນ, ໃນນັ້ນມີປືນແກັບຄົນລະກະ 1 ບອກ, ຮອດເວລາປະມານ 13:30 ນາທີ ຜູ້ກ່ຽວໄດ້ຂີ່ລົດຈັກຄົນລະຄັນອອກຈາກເຮືອນໄປ ໃນເມື່ອໄປຮອດຟາມງົວຂອງຊາວ ບ້ານ ກາງໂພນສິງ ຢູ່ເຂດຫົວນ້ຳສ໋ອກໃຫ່ຍ ແລ້ວເອົາລົດຈັກປະໄວ້ຢູ່ຟາມ ໄດ້ພາກັນຍ່າງເຂົ້າໄປປະມານ 2 ຊົ່ວໂມງຈຶ່ງໄປຮອດຈຸດເລາະປ່າເວລາປະມານ 17:00 ໂມງ ຜູ້ກ່ຽວກັບ ທ້າວ ຊໍແພວ ໄດ້ໄປນຳກັນໂດຍແມ່ນ ທ້າວ ຊໍແພວ ຍ່າງໄປກ່ອນ ຜູ້ກ່ຽວຍ່າງນຳຫລັງ ພໍຍ່າງອອກໄປໄດ້ປະມານ 20 ນາທີ ຮອດບ່ອນປ່າຫຍ້າຕຶບໜາ, ທ້າວ ຄອງຊື ໃຊ້ມືເບື້ອງຂວາຈັບປືນແກັບເຮັດໃຫ້ປືນເກາະໃສ່ຫຍ້າແລ້ວປືນລັ່ນຖືກໃສ່ ທ້າວ ຊໍແພວ, ເມື່ອເຫັນແນວນັ້ນ ຜູ້ກ່ຽວຈຶ່ງຟ້າວແລ່ນໄປອູ້ມເອົາ ແລະ ມີເລືອດໄຫລ່ອອກຕາມຮ່າງກາຍ, ຈາກນັ້ນພວກກ່ຽວທັງ 3 ຄົນ ໄດ້ເອົາຜູ້ເສຍຊີວິດອອກມາປະມານ 2 ກິໂລແມັດ ປະຊາຊົນຈຶ່ງໄປຊ່ວຍ ແລ້ວນຳເອົາຜູ້ເສຍຊີວິດໄປຮອດບ້ານເວລາ 4 ໂມງເຊົ້າຂອງວັນທີ 8 ມີນາ 2023.
ຜ່ານການສັນນະສູດສົບ ເຈົ້າໜ້າທີ່ພົບເຫັນມີຮ່ອງຮອຍລູກວ່ານຍິງຖືກບໍລິເວນສັນຫລັງຈຳນວນ 48 ລູກ ຝັງໃນ ແລະ ມີລູກໂດດຈຳນວນ 1 ລູກຍິງຖືກສັນຫລັງຄ້າງຢູ່ບໍລິເວນນົມເບື້ອງຊ້າຍ. ປັດຈຸບັນ ທາງເຈົ້າໜ້າທີ່ສືບສວນສອບ-ສວນຄະດີອາຍາ ປກສ ເມືອງສິງ ໄດ້ສົ່ງຜູ້ກ່ຽວໃຫ້ທາງ ກອງບັນຊາການ ປກສ ແຂວງ ສືບຕໍ່ດຳເນີນຄະດີຕາມລະບຽບກົດໝາຍ.
