ນະຄອນຫລວງວຽງຈັນຈະເນັ້ນກິດຈະກໍາການທ່ອງທ່ຽວທີ່ຕິດພັນກັບວັດທະນະທໍາລາວ ໃນໄລຍະບຸນປີໃໝ່ລາວ ພສ 2566 ທີີ່ຈະມາເຖິງນີ້

ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫລງຂ່າວ, ວັດທະນະທໍາແລະທ່ອງທ່ຽວນະຄອນຫລວງວຽງຈັນ ໄດ້ໃຫ້ສໍາພາດຕໍ່ CMG ປະຈໍາລາວ ໃນວັນທີ 3 ເມສາ 2023 ຜ່ານມາວ່າ: ໄລຍະບຸນປີໃໝ່ລາວ ພສ 2566 ນີ້, ນະຄອນຫລວງວຽງຈັນ ຈະເນັ້ນກິດຈະກໍາສົ່ງເສີມການທ່ອງທ່ຽວທີ່ຕິດພັນກັບວັດທະນະທໍາລາວ ໂດຍສະເພາະການສ້າງກິດຈະກໍາຊຸກຍູ້ສົ່ງເສີມທາງດ້ານວັດທະນະທໍາ ຮີດຄອງປະເພນີອັນດີງາມ ເຊັ່ນ: ກິດຈະກໍາທາງດ້ານສາສະໜາ ຕາມວັດວາອາຮາມຕ່າງໆ ແລະ ໄດ້ກໍານົດຈຸດຫລິ້ນບຸນປີໃໝ່ແມ່ນຢູ່ຄຸ້ມເມືອງເກົ່າວັດຈັນ ເມືອງຈັນທະບູລີ ເຊິ່ງເປັນເຂດທີ່ມີວັດວາອາຮາມຫລາຍ ທີ່ຄົນລາວໃຫ້ຄວາມສໍາຄັນໃນຍາມບຸນປີໃໝ່ລາວຕ້ອງໄດ້ຫົດສົງພະ 9 ວັດ, ນອກນັ້ນ, ຍັງມີເຂດວັດພະທາດຫລວງເໜືອ, ວັດທາດຫຼວງໃຕ້, ວັດໜອງບອນ ແລະວັດອ້ອມຮອບອື່ນໆ ທີ່ມວນຊົນແລະນັກທ່ອງທ່ຽວໃຫ້ຄວາມນິຍົມໄປຫົດສົງພະໃນໄລຍະບຸນປີໃໝ່ລາວທຸກໆປີ.

ທ່ານກ່າວຕື່ມວ່າ, ນະຄອນຫລວງວຽງຈັນໄດ້ສົມທົບກັບ ອົງການພຸດທະສາສະໜາລາວ ເພື່ອຮັກສາຮີດຄອງປະເພນີ ໂດຍສະເພາະການນຸ່ງຖືເຂົ້າຫົດສົງພະຕາມວັດຕ່າງໆໃຫ້ຖືກຕ້ອງຕາມວັດທະນະທໍາຂອງລາວ. ສໍາລັບບຸນປີໃໝ່ລາວປີນີ້ແມ່ນກົງກັບວັນທີ 14,15 ແລະ 16 ເມສາ 2023. ມື້ທໍາອິດສັງຂານລົງຈະມີກິດຈະກໍາແຫ່ພະພຸດທະຮູບມິ່ງບ້ານມິ່ງເມືອງ ຢູ່ເຂດຄຸ້ມເມືອງເກົ່າຖະໜົນເສດຖາທິລາດວັດຈັນ ເຊິ່ງກໍານົດແຕ່ເສັ້ນທາງວັດອິນແປງໄປຫານໍ້າພຸ ແລະ ອ້ອມຮອບເສັ້ນທາງວັດຈັນກັບຄືນວັດອິນແປງ ນອກຈາກນີ້, ຍັງຈະມີການສະເຫລີມສະຫລອງຄົບງັນຂະບວນຕ່າງໆ.

ປັດຈຸບັນ, ບັນດາຂະບວນທີ່ຈະເຂົ້າຮ່ວມພິທີແຫ່ແມ່ນກະກຽມເປັນທີ່ຮຽບຮ້ອຍແລ້ວ ໃນຂະບວນແຫ່ຈະເລີ່ມດ້ວຍຂະບວນພະສົງ ແລະ ພະພຸດທະຮູບມິ່ງບ້ານມິ່ງເມືອງ, ຂະບວນແຫ່ພາຂວັນໃຫຍ່, ຂະບວນດົນຕີມະໂຫລີ, ຂະບວນນັກກິລາທີ່ໄດ້ຮັບຫລຽນໃນງານແຂ່ງຂັນມະຫະກໍາກິລາແຫ່ງຊາດຄັ້ງທີ 11 ທີ່ແຂວງຊຽງຂວາງ, ຂະບວນບ້ານວັດທະນະທໍາ ແລະຂະບວນອື່ນໆ.

ສວ່ນຈຸດຫລິ້ນນໍ້າສໍາລັບຊາວນະຄອນຫລວງວຽງຈັນ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດ ໃນໄລຍະ 3 ວັນນີ້, ແມ່ນກໍານົດຢູ່ເຂດຖະໜົນເສດຖາທິລາດໜ້າວັດອິນແປງເປັນຈຸດຫົດສົງນໍ້າເຊິ່ງກັນ ແລະ ກັນ ແລະ ຈຸດທີສອງແມ່ນຢູ່ຫາດຊາຍເຂດແຄມຂອງບ້ານອ່າງນ້ອຍ ເມືອງສັງທອງ, ນະຄອນຫລວງວຽງຈັນ, ນໍ້າກັດຢໍລະປາ, ວັດຊຽງຄວນ ແລະ ອື່ນໆ.