ສປປ ລາວ ເປັນປະເທດທີ່ມີລະເບີດຕົກຄ້າງຫລາຍທີ່ສຸດໃນໂລກ 27 ປີ ເກັບກູ້ ແລະ ທຳລາຍໄດ້ 1,8 ລ້ານກວ່າໜ່ວຍ
ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ຮອງປະທານ ຜູ້ປະຈຳການ ຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ລາຍງານ ເນື່ອງໃນວັນສາກົນໂຄສະນາ ເພື່ອຕ້ານລະເບີດບໍ່ທັນແຕກ ຄົບຮອບ 18 ປີ ວັນທີ 4 ເມສາ 2023 ນີ້ວ່າ:
ປີ 2005 ສະມັດຊາໃຫຍ່ ອົງການສະຫະປະຊາຊາດ ໄດ້ປະກາດ ໃຫ້ວັນທີ 4 ເມສາ ຂອງທຸກໆ ປີເປັນວັນສາກົນໂຄສະນາ ເພື່ອຕ້ານລະເບີດບໍ່ທັນແຕກ ເຊິ່ງເປົ້າໝາຍແມ່ນເພື່ອໂຄສະນາ ແລະ ປູກຈິດສຳນຶກກ່ຽວກັບອັນຕະລາຍຂອງ ລະເບີດບໍ່ທັນແຕກ, ຮຽກຮ້ອງໃຫ້ເອົາໃຈໃສ່ເພື່ອຫລຸດຜ່ອນຜົນກະທົບຈາກລະເບີດບໍ່ທັນແຕກ, ໃຫ້ການຊ່ວຍເຫລືອດ້ານມະນຸດສະທຳ ແລະ ລະດົມທຶນເຂົ້າໃນການແກ້ໄຂບັນຫາລະເບີດບໍ່ທັນແຕກໃນທົ່ວໂລກ ໂດຍສະເພາະປະເທດທີ່ໄດ້ຮັບຜົນກະທົບຫລາຍ.
ສປປ ລາວ ເປັນປະເທດທີ່ໄດ້ຮັບຜົນກະທົບຫລາຍທີິ່ສຸດໃນໂລກ ຈາກການຖິ້ມລະເບີດຢ່າງໜັກໜ່ວງໃນປາງສົງຄາມອີນດູຈີນ ແຕ່ປີ 1964-1973 ເມື່ອທຽບໃສ່ຈໍານວນປະຊາກອນ. ລະເບີດບໍ່ທັນແຕກທີ່ຕົກຄ້າງຈໍານວນຫລວງຫລາຍ ໄດ້ສືບຕໍ່ສ້າງຄວາມເສຍຫາຍທາງດ້ານຮ່າງກາຍ ແລະ ຊີວິດການເປັນຢູ່ຂອງປະຊາຊົນ, ເປັນອຸປະສັກຕໍ່ການນໍາໃຊ້ທີ່ດີນເພື່ອທໍາການຜະລິດກະສິກໍາ, ເປັນໄພຂົ່ມຂູ່ຕໍ່ການດໍາລົງຊີວິດຂອງປະຊາຊົນລາວບັນດາເຜົ່າ, ເປັນອຸປະສັກຕໍ່ການພັດທະນາເສດຖະກິດ-ສັງຄົມຂອງຊາດ, ການຫລຸດພົ້ນອອກຈາກສະຖານະພາບປະເທດດ້ອຍພັດທະນາ ແລະ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDGs) ປີ2030.
ນັບແຕ່ 1996 ເຖິງ 22 ກຸມພາ 2023 ໄດ້ກວດກູ້ເນື້ອທີ່ດິນທັງໝົດ 79.599 ກວ່າເຮັກຕາ ແລະ ໄດ້ທໍາລາຍລະເບີດບໍ່ທັນແຕກທີ່ຕົກຄ້າງ ຈໍານວນ 1.808.254 ກວ່າໜ່ວຍ ໃນນີ້ລະເບີດລູກຫວ່ານ (ບົມບີ) ຈໍານວນ 1.056.393 ກວ່າໜ່ວຍ, ບົມໃຫຍ່ ຈໍານວນ 4.336 ກວ່າໜ່ວຍ, ລະເບີດຝັງດິນ (ມິນ) ຈໍານວນ 2.456 ກວ່າໜ່ວຍ ແລະ ທຳລາຍສໍາພາວຸດອື່ນໆ ຈໍານວນ 745.069 ກວ່າໜ່ວຍ. ສໍາລັບວຽກງານການໂຄສະນາສຶກສາຄວາມສ່ຽງໄພຈາກ ລະເບີດບໍ່ທັນແຕກ ທີ່ຕົກຄ້າງ ແມ່ນສາມາດເຄື່ອນໄຫວໂຄສະນາໄດ້ຈໍານວນ 4.092 ກວ່າບ້ານ; ຊ່ວຍເຫລືອຜູ້ຖືກເຄາະຮ້າຍຈາກ ລະເບີດບໍ່ທັນແຕກ ທີ່ຕົກຄ້າງ ແຕ່ປີ 2015 ຫາ ປີ 2022 ຈໍານວນ 2.846 ກວ່າຄົນ; ການສຳຫລວດບໍ່ແມ່ນວິຊາການ ແຕ່ປີ 2011 ຫາປີ 2022 ຈໍານວນ 2.709 ກວ່າບ້ານ; ການສຳຫລວດທາງດ້ານວິຊາການ ແຕ່ປີ 2010 ຫາ ປີ 2022 ຈໍານວນ 1.804 ກວ່າບ້ານ ແລະ ເນື້ອທີ່ຢືນຢັນວ່າມີຜົນກະທົບຈາກລະເບີດລູກຫວ່ານ ແຕ່ປີ 2010 – 2022 ຈໍານວນ 174.638 ກວ່າເຮັກຕາ.
