ເມສຊີ ກຽມອຳລາ ເປແອສເຊ ຫລັງຈົບລະດູການນີ້ ຄອບຄົວຢາກກັບໄປ ບາເຊໂລນາ

ລີໂອເນລ ເມສຊີ ຕົກເປັນຂ່າວກຽມອຳລາ ປາຣີສ ແຊັງ ແຊັກ ແມັງ ຫລັງຈົບລະດູການນີ້ ໂດຍຄອບຄົວຂອງລາວຕ້ອງການທີ່ຈະໃຫ້ນັກເຕະກັບໄປຫລິ້ນກັບ ບາເຊໂລນາ.

ສຳລັບອະນາຄົດຂອງ ເມສຊີ ກັບ ເປແອສເຊ ຍັງເຕັມໄປດ້ວຍຄວາມບໍ່ແນ່ນອນ ຫລັງລາວພວມຈະຫມົດສັນຍາກັບທີມຫລັງຈົບລະດູການນີ້ ແຕ່ຍັງບໍ່ມີການຂະຫຍາຍອອກໄປ ເຖິງຈະມີການເຈລະຈາກັນມາຫລາຍອາທິດແລ້ວກໍຕາມ.

ຕາມກຳນົດເກ່ົາມີລາຍງານວ່າ ດາວເຕະອາຍຸ 35 ປີຈະຕໍ່ສັນຍາກັບ ເປແອສເຊ ອອກໄປອີກຢ່າງຫນ້ອຍ 1 ລະດູການ ກ່ອນຈະຕັດສິນໃຈເລື່ອງອະນາຄົດອີກເທື່ອຫນຶ່ງ ຫລັງຈາກນັ້ນ ໂດຍມີ ບາເຊໂລນາ ອະດີດຕົ້ນສັງກັດເກ່ົາຈາກ ລາ ລີກາ ສະເປນ ແລະ ອິນເຕີ ໄມອາມີ ຈາກເມເຈີ ລີກ ສະຫະລັດ ຈັບຕາເບິ່ງສະຖານະການຢູ່.

ຈົນຫລ້າສຸດ ເລ ກິບ ສື່ຝຣັ່ງລະບຸວ່າ ເມສຊີ ແລະ ເປແອສເຊ ກຽມທີ່ຈະແຍກທາງກັນຫລັງຈົບລະດູການນີ້ ໂດຍຄອບຄົວຂອງລາວຕ້ອງການລາວກັບໄປທີ່ບາເຊໂລນາ ເຊິ່ງລາວເຄີຍຫລິ້ນມາດົນເຖິງ 21 ປີ.

່ກ່ອນໜ້ານີ້ ຣາຟາ ຢຸສເຕ ຮອງປະທານສະໂມສອນ ບາເຊໂລນາ ຢືນຢັນວ່າ ພວກເຂົາໄດ້ມີການຕິດຕໍ່ ເມສຊີ ເພື່ອເຊັນສັນຍາກັບມາຮ່ວມທີມອີກເທື່ອໜຶ່ງ.