ເຊວຊີ ເປີດບ້ານສະເໝີ ລິເວີພູລ 0-0 ແບບມິດຕະພາບແບ່ງຄະແນນກັນໄປ ພຣີເມຍລີກອັງກິດ

ເກມພຣີເມຍລີກ ລະດູການ 2022/23 ນັດຕົກຄ້າງ ເຊວຊີ ທີມອັນດັບ 11 ຂອງຕາຕະລາງ ທີ່ຫລ້າສຸດປົດ ແກຣມ ພັອດເຕີ ອອກຈາກຕຳແໜ່ງຫົວໜ້າຄູຝຶກ ເປີດບ້ານຕ້ອນຮັບ ລິເວີພູລ ທີມອັນດັບ 8 ຂອງຕາຕະລາງ ຫລ້າສຸດເສຍໃຫ້ ແມນ ຊິຕີ້ 1-4. ໃນເກມນີ້ ທີມເຈົ້າບ້ານສົ່ງ ໄຄ ຮາເວີດ ແລະ ໂຈອາວ ເຟລິກ ເປັນໜ້າຄູ່, ຂະນະທີ່ທີມຢາມໃຊ້ ໂຣແບໂຕ ຟິມິໂນ ເປັນໜ້າເປົ້າ.

ໃນເຄິ່ງເວລາທໍາອິດ, ເປັນຝ່າຍ ເຊວຊີ ທີ່ເຮັດເກມບຸກໂຈມຕີໃສ່ ລິເວີພູລ ໄດ້ດີກວ່າ. ແຕ່ຍັງບໍ່ເດັດຂາດພໍທີ່ຈະໄດ້ປະຕູ, ດ້ານ “ຫົງແດງ” ມີໂອກາດລຸ້ນຍິງປະຕູຫລາຍຄັ້ງໃນຕອນທ້າຍ 45 ນາທີທຳອິດ, ແຕ່ນັກເຕະ “ສິງໂຕນ້ຳເງິນ” ກໍ່ຍັງຊ່ວຍກັນຫລິ້ນເກມຮັບໄດ້ຢ່າງແໜ້ນໜາ..

ໃນເຄິ່ງເວລາທີສອງ, ທັງສອງທີມສ້າງເກມບຸກໂຈມຕີກັນໄດ້ດີ. ແຕ່ກໍ່ຍັງບໍ່ທັນມີຝ່າຍໃດສາມາດຍິງປະຕູທຳອິດໄດ້ໃນເກມນີ້. ກ່ອນຈົບເກມບໍ່ມີປະຕູ 0-0 ແບ່ງຄະແນນກັນໄປ.