ກະຊວງ ປກສ ຈັດພິທີປະກາດແຕ່ງຕັ້ງ ແລະ ເລື່ອນຊັ້ນໃຫ້ນາຍຕໍາຫລວດ

ວັນທີ 4 ເສມາ 2023 ຜ່ານມາ, ກະຊວງ ປກສ ໄດ້ຈັດພິທີປະກາດແຕ່ງຕັ້ງ ແລະ ເລື່ອນຊັ້ນໃຫ້ນາຍຕໍາຫລວດ ໃຫ້ກຽດເປັນປະທານ ແລະ ປະດັບຊັ້ນໂດຍ ພົອ ວິໄລ ຫລ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີ ກະຊວງ ປກສ, ມີບັນດາຮອງລັດຖະມົນຕີ, ຫົວໜ້ກົມໃຫຍ່, ຄະນະຈັດຕັ້ງສູນກາງພັກ, ກົມກອງອ້ອມຂ້າງກະຊວງ, ຕະຫລອດຮອດພະນັກງານຜູ້ທີ່ໄດ້ຮັບການແຕ່ງຕັ້ງ ແລະ ເລື່ອນຊັ້ນເຂົ້າຮ່ວມ.

ທ່ານ ດອນ ໄພວົງ ໄດ້ຜ່ານລັດຖະດຳລັດ ສະບັບເລກທີ 039-042/ປປທ, ລົງວັນທີ 4 ເສມາ 2023 ວ່າດ້ວຍການເລື່ອນຊັ້ນພັນເອກ ຂຶ້ນ ຊັ້ນພົນຈັດຕະວາ ໃຫ້ນາຍຕຳຫລວດ ຈໍານວນ 5 ສະຫາຍ ຄື:

1. ສະຫາຍ ສີສຸວັນ ທອງປະເສີດ ຮອງຫົວໜ້າກົມໃຫຍ່ພະລາທິການ ປກສ
2. ສະຫາຍ ທອງບຸນ ຂຸນລະພິດ ຮອງຫົວໜ້າຫ້ອງການຄະນະກໍາມະການ ປກຊ-ປກສ ສູນກາງ
3. ສະຫາຍ ຄຳຈັນ ແສງລາວົງ ຫົວໜ້າກອງບັນຊາການ ປກສ ແຂວງຜົ້ງສາລີ
4. ສະຫາຍ ຕູ່ຊົ່ງ ປັດໃຈ ຫົວໜ້າກອງບັນຊາການ ປກສ ແຂວງຫຼວງພະບາງ
5. ສະຫາຍ ຄຳແພງ ເພັດ ຫົວໜ້າກອງບັນຊາການ ປກສ ແຂວງໄຊຍະບູລີ

ທ່ານ ດອນ ໄພວົງ ຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ຜ່ານມະຕິຕົກລົງເລກທີ 326, 327, 328/ຄລສພ, ລົງວັນທີ 29 ມີນາ 2023 ວ່າດ້ວຍການບົ່ງຕົວແຕ່ງຕັ້ງ ກໍາມະການປະຈໍາພັກ, ກໍາມະການຄະນະພັກກະຊວງປ້ອງກັນຄວາມສະຫງົບ:

1. ບົ່ງຕົວແຕ່ງຕັ້ງ ສະຫາຍ ພົຈວ ທອງສຸກ ຍ່າເອີລາວລີ ເປັນກຳມະການປະຈຳພັກ ກະຊວງປ້ອງ ກັນຄວາມສະຫງົບ,
2. ບົ່ງຕົວແຕ່ງຕັ້ງ ສະຫາຍ ພົຈວ ໜູຈອນ ກ້ອນທອງດໍາ ເປັນກຳມະການຄະນະພັກ ກະຊວງປ້ອງກັນຄວາມສະຫງົບ,
3. ບົ່ງຕົວແຕ່ງຕັ້ງ ສະຫາຍ ພົຈວ ແອນ ອຸ່ນອານົງນຸດ ເປັນກຳມະການຄະນະພັກ ກະຊວງປ້ອງກັນຄວາມສະຫງົບ;

ດໍາລັດ ສະບັບເລກທີ 151, 152, 153/ນຍ, ລົງວັນທີ 30 ມີນາ 2023 ວ່າດ້ວຍການແຕ່ງຕັ້ງນາຍຕຳຫຼວດ ກະຊວງປ້ອງກັນຄວາມສະຫງົບ:

1. ແຕ່ງຕັ້ງ ພົຈວ ທອງສຸກ ຍ່າເອີລາວລີ ເປັນຫົວໜ້າກົມໃຫຍ່ພະລາທິການ ປກສ,
2. ແຕ່ງຕັ້ງ ພັອ ເຄນທະວີໄຊ ເພັດພະນາ ເປັນຮອງຫົວໜ້າຫ້ອງວ່າການ ກະຊວງ ປກສ,
3. ແຕ່ງຕັ້ງ ພັອ ບຸນລຽນ ສະອາດສີ ເປັນຫົວໜ້າກົມກວດກາ-ກວດການ ກະຊວງ ປກສ.

ພາບຂ່າວ: ຄວາມສະຫງົບ