ທ່ານ ທຣຳ ຖືກຕັ້ງຂໍ້ຫາອາຍາ 34 ຂໍ້ ຂໍ້ຫາຈ່າຍເງິນປິດປາກດາລາໜັງຜູ້ໃຫຍ່
ອະດີດປະທານາທິບໍດີ ໂດນັລ ທຣໍາ ຂອງອາເມລິກາ ປະຕິເສດບໍ່ຍອມຮັບຜິດໃນຄະດີອາຍາທັງໝົດ 34 ຂໍ້ຫາ ໃນລະຫວ່າງການຮັບຟັງຂໍ້ກ່າວຫາຢູ່ສານອາຍາແມນຮັດຕັນ ນິວຢອກ ໃນຄືນວັນທີ 4 ເມສາ ຕາມເວລາປະເທດລາວ (5 ເມສາ) ຈາກຂໍ້ຫາທີ່ທ່ານຈ່າຍເງິນປິດປາກດາລາໜັງຜູ້ໃຫຍ່ ແລະ ນາງແບບວາລະສານ Playboy ບໍ່ໃຫ້ເຜີຍແພ່ຂໍ້ມູນວ່າທັງສອງເຄີຍມີຄວາມສໍາພັນລັບກັນໃນປີ 2016 ຫລື ກ່ອນໜ້າການເລືອກຕັ້ງປະທານາທິບໍດີອາເມລິກາ.
ພະນັກງານໄອຍະການໃນແມນຮັດຕັນກ່າວຫາວ່າ: ທ່ານ ທຣໍາ ໄດ້ປອມແປງບັນທຶກທາງທຸລະກິດເພື່ອປົກປິດການລະເມີດກົດໝາຍການເລືອກຕັ້ງລະຫວ່າງໄລຍະຫາສຽງໃນການເລືອກຕັ້ງປະທານາທິບໍດີອາເມລິກາ ປີ 2016 ເຊິ່ງທ່ານໄດ້ຮັບໄຊຊະນະ.
ກໍລະນີທີ່ທ່ານ ທຣໍາ ເຮັດສັນຍາປົກປິດຄວາມລັບນໍາຜູ້ຍິງທັງສອງຄົນໂດຍມີການຈ່າຍເງິນຈໍານວນຫລາຍເປັນຂໍ້ແລກປ່ຽນນັ້ນບໍ່ໄດ້ຜິດກົດໝາຍຂອງອາເມລິກາ, ແຕ່ທ່ານໄດ້ລົງບັນທຶກທາງທຸລະກິດວ່າ: ເງິນດັ່ງກ່າວເປັນຄ່າທໍານຽມທາງກົດໝາຍ ເຊິ່ງການປອມແປງເອກະສານນັ້ນຖືວ່າມີຄວາມຜິດ. ຂະນະດຽວກັນຍັງເຂົ້າຂ່າຍການໃຊ້ຈ່າຍເງິນຫາສຽງຢ່າງຜິດກົດໝາຍນໍາອີກ.
ສໍານັກຂ່າວ Reuters ລາຍງານວ່າ: ເຖິງວ່າການປອມແປງບັນທຶກທາງທຸລະກິດຈະຖືວ່າມີຄວາມຜິດອາຍາ ປະເພດຫຸໂທດ ທີ່ມີໂທດຕິດຄຸກບໍ່ເກີ 1 ປີ, ແຕ່ໃນກໍລະນີຂອງທ່ານ ທຣໍາ ການກະທໍາດັ່ງກ່າວອາດສົ່ງຜົນໃຫ້ຖືກໂທດຕິດຄຸກສູງສຸດ 4 ປີ ເນື່ອງຈາກເປັນການປອມແປງເອກະສານເພື່ອປົກປິດອາດຊະຍາກໍາອື່ນໆເຊັ່ນ: ການລະເມີດກົດໝາຍການເລືອກຕັ້ງ.
