ໂຄລົມເບຍ ສັ່ງອົບພະຍົບປະຊາຊົນ 2 ພັນກວ່າ ຄົວເຮືອນ ຫລັງມີການເຕືອນໄພ ພູເຂົາໄຟຈະລະເບີດ

ສຳນັກຂ່າວຕ່າງປະເທດລາຍງານ: ວັນທີ 6 ເມາສາ 2023 ຜ່ານມາ, ໂຄລົມເບຍ ອົບພະຍົບປະຊາຊົນປະມານ 2,500 ຄົວເຮືອນ ອອກຈາກພື້ນທີ່ສ່ຽງໄພໃກ້ກັບພູເຂົາໄຟ ເນວາໂດ ເດວ ຣູອີສ ທີ່ສົ່ງສັນຍານການພົ່ນເຖົ່າຖ່ານຄວັນໄຟອອກມາ ຂະນະດຽວກັນ ນັກທໍລະນີວິທະຍາກວດພົບແຮງສັ່ນສະເທືອນພາຍໃນພູເຂົາໄຟໜ່ວຍນີ້ ອັນເປັນສັນຍານການລະເບີດໃນອີກບໍ່ພໍເທົ່າໃດມື້ ຫລື ອີກບໍ່ພໍເທົ່າໃດອາທິດ.

ນອກນີ້ ທາງການສັ່ງປິດອຸທະຍານແຫ່ງຊາດ, ສະຖານທີ່ທ່ອງທ່ຽວຊື່ດັງທີ່ຢູ່ບໍລິເວນໂດຍຮອບພູເຂົາໄຟ ເນວາໂດ ເດວ ຣູອີສ ພ້ອມກັນນີ້ໄດ້ສັ່ງຢຸດການຮຽນ-ການສອນຂອງໂຮງຮຽນທີ່ຕັ້ງຢູ່ໃນລັດສະໝິ 10 ກິໂລແມັດ.