ເມືອງວັງວຽງແຈ້ງການ ໃຫ້ຜູ້ປະກອບການຮ້ານຄ້າ, ຮ້ານອາຫານ ແລະ ບໍລິການຕ່າງໆ ຍ້າຍອອກຈາກສະໜາມບິນເກົ່າ ຊ້າສຸດບໍ່ກາຍ 30 ເມສາ 2023
ວັນທີ 19 ເມສາ 2023 ນີ້ ຫ້ອງວ່າການເມືອງວັງວຽງອອກແຈ້ງການເຖິງ ນາຍບ້ານ ບ້ານວັງວຽງ, ບ້ານສະຫວ່າງ, ບ້ານວຽງແກ້ວ, ບ້ານເມືອງຊອງ ແລະ ບ້ານໂພນເພັງ ຜູ້ປະກອບການຮ້ານຄ້າ, ຮ້ານອາຫານ, ທຸລະກິດບໍລິການຕ່າງໆ ຢູ່ໃນຂອບເຂດສະໜາມບິນເກົ່າ ແລະ ພາກສ່ວນທີ່ກ່ຽວຂ້ອງ ໃຫ້ຍົກຍ້າຍກິດຈະການອອກ ແລະ ຮື້ຖອນສິ່ງກໍ່ສ້າງອອກຈາກຂອບເຂດສະໜາມບິນເກົ່າ ເລີ່ມແຕ່ວັນທີ 19 ເມສາ 2023 ເປັນຕົ້ນໄປ ແລະ ໃຫ້ສໍາເລັດຊ້າສຸດບໍ່ໃຫ້ກາຍວັນທີ 30 ເມສາ 2023.
ເນື່ອງຈາກ ບໍລິສັດສໍາປະທານພື້ນທີ່ສະໜາມບິນເກົ່າ ຈະໄດ້ເລີ່ມລົງມືກໍ່ສ້າງແຫຼ່ງທ່ອງທ່ຽວຕາມແຜນການຂອງບໍລິສັດທີ່ໄດ້ວາງໄວ້ໃຫ້ສໍາເລັດໂດຍໄວ ຕາມສັນຍາສໍາປະທານລົງທຶນໂຄງການພັດທະນາແຫຼ່ງທ່ອງທ່ຽວຄົບວົງຈອນເດີ່ນບິນເກົ່າ ເມືອງວັງວຽງ ສະບັບລົງວັນທີ 13 ກຸມພາ 2018 ລະຫວ່າງ ອົງການປົກຄອງແຂວງວຽງຈັນ, ແຈ້ງການຂອງ ພະແນກແຜນການ ແລະ ການລົງທຶນ ສະບັບເລກທີ 30 /ພຜທ.ວຈ, ລົງວັນທີ 3 ເມສາ 2023 ແລະ ທິດຊີ້ນຳຂອງເຈົ້າເມືອງວັງວຽງ.
ຈາກນັ້ນ ບໍລິສັດ ຈະໄດ້ອ້ອມຮົ້ວພື້ນທີ່ດັ່ງກ່າວເພື່ອທໍາການກໍ່ສ້າງ; ຫາກວ່າຜູ້ປະກອບການທ່ານໃດບໍ່ຍົກຍ້າຍອອກຕາມກໍານົດເວລາ ເມື່ອໄດ້ຮັບຜົນກະທົບຈາການກໍ່ສ້າງທາງບໍລິສັດຈະບໍ່ຮັບຜິດຊອບຕໍ່ມູນຄ່າເສຍຫາຍໃດໆ.
ດັ່ງນັ້ນ, ຈຶ່ງແຈ້ງມາເພື່ອຊາບ ແລະ ພ້ອມກັນຈັດຕັ້ງປະຕິບັດຕາມແຈ້ງການສະບັບນີ້ຢ່າງເຂັ້ມງວດ.
