ແຂວງອັດຕະປື ສຸມໃສ່ແກ້ໄຂບັນຫາຢາເສບຕິດ 3 ເດືອນຕົ້ນປີ ທັບມ້າງຄະດີໄດ້ 28 ເລື່ອງ ແລະ ຈັບຜູ້ຖືກຫາໄດ້ 45 ຄົນ
ທ່ານ ພົນຈັດຕະວາ ສີເວີນແກ້ວ ສີວົງສາ ຫົວໜ້າກອງບັນຊາການປ້ອງກັນຄວາມສະຫງົບ ແຂວງອັດຕະປື ລາຍງານຕໍ່ກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 8 ສະໄໝທີ XI ໃນວັນທີ 24-25 ເມສາ 2023 ນີ້ວ່າ: ໄລຍະຜ່ານມາແຂວງອັດຕະປື ກໍຄືກອງບັນຊາການປ້ອງກັນຄວາມສະຫງົບ ແຂວງ, ເມືອງ ໄດ້ຖືສໍາຄັນວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນການປະສານສົມທົບກັບພະແນກການທີ່ກ່ຽວຂ້ອງ ແລະ ເມືອງ, ເພື່ອຈັດຕັ້ງປະຕິບັດວາລະແຫ່ງຊາດຕາມວຽກຈຸດສຸມ ແລະ ຜ່ານການເຄື່ອນໄຫວຕົວຈິງ ໄລຍະ 3 ເດືອນຕົ້ນປີ 2023 ນີ້ ໄດ້ທັບມ້າງລາຍຄະດີຢາເສບຕິດໄດ້ທັງໝົດ 28 ເລື່ອງ, ຈັບຜູ້ຖືກຫາໄດ້ 45 ຄົນ, ຍິງ 9 ຄົນ, ຢຶດຂອງກາຢາບ້າໄດ້ 12.645 ເມັດ, ເງິນກີບ 6 ລ້ານກວ່າກີບ, ໂທລະສັບ 25 ໜ່ວຍ, ລົດຈັກ 7 ຄັນ, ລົດໃຫຍ່ 1 ຄັນ ແລະ ອື່ນໆ. ໃນຂະນະດຽວກັນໄລຍະຜ່ານມາ ໄດ້ຂຶ້ນບັນຊີເປົ້າໝາຍຄ້າຂາຍຢາເສບຕິດ ໃນທົ່ວແຂວງໄດ້ທັງໝົດ 666 ຄົນ, ຍິງ 93 ຄົນ, ທັບມ້າງໄດ້ 252 ຄົນ, ຍິງ 50 ຄົນ, ເປົ້າໝາຍເອົາຕົວລົບໜີອອກຈາກພື້ນທີ່ 26 ຄົນ, ຍິງ 1 ຄົນ, ຍັງເຫລືອຕົວຈິງ 388 ຄົນ, ຍິງ 42 ຄົນ, ສ່ວນບັນຊີເປົ້າໝາຍການເສບຢາໃນທົ່ວແຂວງ ມີທັງໝົດ 1.329 ຄົນ, ຍິງ 73 ຄົນ, ໄດ້ສຶກສາອົບຮົມແລ້ວ 295 ຄົນ, ຍິງ 22 ຄົນ, ເອົາໄປບໍາບັດປິ່ນປົວ 61 ຄົນ, ຍັງຄ້າງ 973 ຄົນ,ຍິງ 51 ຄົນ.
ທ່ານ ຫົວໜ້າກອງບັນຊາການປ້ອງກັນຄວາມສະຫງົບ ແຂວງ ໃຫ້ຮູ້ຕື່ມວ່າ: ໄລຍະ 3 ເດືອນຜ່ານມາ ທາງກອງບັນຊາການປ້ອງກັນຄວາມສະຫງົບ ຂອງແຂວງ ຍັງໄດ້ຖືເອົາວຽກງານໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຂອງຢາເສບຕິດເປັນວຽກສໍາຄັນ, ໂດຍໄດ້ສົມທົບກັບພາກສ່ວນກ່ຽວຂ້ອງລົງໂຄສະນາເຜີຍແຜ່ລະບຽບກົດໝາຍ ແລະ ຜົນຮ້າຍຈາກຢາເສບຕິດຢູ່ບັນດາສະຖາບັນການສຶກສາ, ກຸ່ມບ້ານ ລວມ 20 ຄັ້ງ, ມີຜູ້ເຂົ້າຮ່ວມຮັບຟັງທັງໝົດ 2.904 ຄົນ, ຍິງ 1.496 ຄົນ, ໄດ້ສ້າງແຜນເຄື່ອນໄຫວລົງຊຸກຍູ້,ເຊື່ອມຊຶມວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ຄະນະພັກ-ຄະນະນໍາ ບັນດາພະແນກການອ້ອມຂ້າງ ແຂວງ, ເມືອງ, ບ້ານ, ບັນດາພະແນກການ, ຫ້ອງການທີ່ກ່ຽວຂ້ອງ, ເພື່ອເຮັດໜ້າທີ່ພາລະບົດບາດ ຈັດຕັ້ງປະຕິບັດໄປຕາມການແບ່ງປັນຄວາມຮັບຜິດຊອບທີ່ໄດ້ກໍານົດໃນວາລະແຫ່ງຊາດ.
