ສິງກະໂປສັ່ງປະຫານຊີວິດນັກໂທດ ຂໍ້ຫາລັກລອບຄ້າຂາຍກັນຊາ

ທາງການສິງກະໂປສັ່ງປະຫານຊີວິດຜູ້ຊາຍຄົນໜຶ່ງໃນວັນທີ 26 ເມສານີ້ ຈາກຄວາມຜິດຂໍ້ຫາພະຍາຍາມລັກລອບຄ້າຂາຍກັນຊານໍ້າໜັກຫລາຍກວ່າ 1 ກິໂລ ສົ່ງຜົນໃຫ້ກຸ່ມນັກສິດທິມະນຸດ ແລະ ນັກເຄື່ອນໄຫວອອກມາປະນາມຄໍາຕັດສິນດັ່ງກ່າວ ທ່າມກາງໄລຍະເວລາທີ່ປະເທດອື່ນໆໄດ້ພະຍາຍາມຫາແນວທາງໃນການຫລຸດຜ່ອນໂທດປະຫານ.

ເຖິງວ່າປັດຈຸບັນຫລາຍປະເທດທົ່ວໂລກຈະເປີດໃຫ້ສາມາດນໍາໃຊ້ກັນຊາໄດ້ຢ່າງຖືກຕ້ອງຕາມກົດໝາຍ, ແຕ່ສິງກະໂປຍັງມີຄໍາສັ່ງຫ້າມນໍາໃຊ້ກັນຊາ ແລະ ມີກົດໝາຍປາບປາມຢາເສບຕິດທີ່ເຂັ້ມງວດ ໂດຍລັດຖະບານສິງກະໂປຢືນຢັນຈະໃຊ້ໂທດປະຫານເພື່ອປາບຜູ້ຄ້າຂາຍຢາເສບຕິດ ແລະ ຮັກສາຄວາມປອດໄພໃຫ້ປະຊາຊົນພາຍໃນປະເທດ.

ທັງນີ້, ສິງກະໂປເປັນໜຶ່ງໃນປະເທດທີ່ມີມາດຕະການປາບປາມຢາເສບຕິດເຂັ້ມງວດຫລາຍທີ່ສຸດໃນໂລກ ໂດຍໃນປີຜ່ານມາໄດ້ສັ່ງປະຫານຊີວິດນັກໂທດທັງໝົດ 11 ຄົນ. ພ້ອມຢືນຢັນວ່າໂທດປະຫານຊີວິດຖືເປັນວິທີທີ່ມີປະສິດທິພາບໃນການປ້ອງກັນບໍ່ໃຫ້ມີການຊື້ຂາຍຢາເສບຕິດພາຍໃນປະເທດ, ອີກທັງປະຊາຊົນສ່ວນຫລາຍໄດ້ສະໜັບສະໜູນນະໂຍບາຍນີ້ນໍາ.

ອ້າງອີງ:

https://www.reuters.com/…/singapore-executes-citizen…/

https://edition.cnn.com/…/singapore-cannabis…/index.html