WHO ເຕືອນ “ຢາແກ້ໄອຊະນິດນໍ້າ Guaifenesin TG syrup” ທີ່ຜະລິດໃນອິນເດຍ ມີສານປົນເປື້ອນສູງ

ວັນທີ 25 ເມສາ, ອົງການອະນາໄມໂລກ (WHO) ໄດ້ອອກຄໍາແຈ້ງເຕືອນກ່ຽວກັບຢາແກ້ໄອຊະນິດນໍ້າທີ່ຜະລິດໃນອິນເດຍ ໂດຍເນັ້ນວ່າ: ຢາແກ້ໄອດັ່ງກ່າວມີສານໄດເອທິລີນ ໄກຄໍ (diethylene glycol) ແລະ ເອທິລີນ ໄກຄໍ (ethylene glycol) ໃນປະລິມານສູງເກີນເກນມາດຕະຖານ.

ອົງການອະນາໄມໂລກ ລາຍງານການກວດພົບຢາແກ້ໄອຊະນິດນໍ້າທີ່ປົນເປື້ອນປະເພດນີ້ຊຸດໜຶ່ງໃນເກາະມາແຊລ ແລະ ໄມໂຄຣນີເຊຍ.

ຄໍາແຈ້ງເຕືອນລະບຸວ່າ: ຕົວຢ່າງຂອງຢາແກ້ໄອໄກເຟນິຊິນ ທີຈີ (Guaifenesin TG syrup) ຈາກເກາະມາແຊລ ຖືກພົບວ່າມີປະລິມານສານໄດເອທິລີນ ໄກຄໍ ແລະ ເອທິລີນ ໄກຄໍ ປົນເປື້ອນສູງເກີນມາດຕະຖານ ໂດຍຢາໄກເຟນິຊິນເປັນຢາຂັບໄລ່ຂີ້ກະເທີ່, ບັນເທົາອາການເຈັບໜ້າເອິກ ແລະ ອາການໄອ.

ອົງການອະນາໄມໂລກ ບໍ່ໄດ້ເຜີຍເປີດລາຍລະອຽດວ່າມີຜູ້ບໍ່ສະບາຍຫລັງຈາກບໍລິໂພກຢາແກ້ໄອໄກເຟນິຊິນ ທີຈີ ຫລື ບໍ່, ແຕ່ເຕືອນວ່າການບໍລິໂພກໄດເອທີລິນ ໄກຄໍ ແລະ ເອທີລິນ ໄກຄໍ ຫລາຍກວ່າເກນອາດນໍາໄປສູ່ການເສຍຊີວິດ, ສ່ວນລັດຖະບານອິນເດຍຍັງບໍ່ໄດ້ອອກມາສະແດງທ່າທີຕໍ່ຄໍາເຕືອນຫລ້າສຸດນີ້ແຕ່ຢ່າງໃດ.

ທັງນີ້, ອົງການອະນາໄມໂລກອອກຄໍາແຈ້ງເຕືອນດັ່ງກ່າວຫລັງຈາກເຄີຍລາຍງານການເຊື່ອມໂຍງຂອງຢາແກ້ໄອຊະນິດນໍ້າອື່ນໆທີ່ຜະລິດໃນອິນເດຍກັບກໍລະນີການເສຍຊີວິດຂອງເດັກໃນແກມເບຍ ແລະ ອຸຊເບກິດສະຖານໃນຫລາຍເດືອນກ່ອນ.