4 ເມືອງໃນມຽນມາພົບກັບ “ວັນອາກາດຮ້ອນທີ່ສຸດ” ໃນຮອບເກືອບ 60 ປີ
April 28, 2023 - 4:05 PM
ສໍານັກງານອຸຕຸນິຍົມວິທະຍາ ແລະ ອຸທົກກະສາດຂອງມຽນມາ ລາຍງານວ່າ: 4 ເມືອງຂອງປະເທດ ຜະເຊີນວັນອາກາດຮ້ອນທີ່ສຸດໃນຮອບເກືອບ 60 ປີ ໃນວັນທີ 25 ເມສາຜ່ານມາ.
ວັນທີ 28 ເມສາ, ສໍານັກຂ່າວຊິນຮົວລາຍງານວ່າ: ມີ 3 ເມືອງຢູ່ໃນລັດມອນ ທີ່ຢູ່ທາງຕອນໃຕ້ຂອງມຽນມາ ໄດ້ແກ່ “ຕານ-ພາຍູຊະຍະ” ມີອຸນຫະພູມສູງສຸດໃນຮອບ 58 ປີ ລະດັບ 43 ອົງສາ, “ບີລິນ” ມີອຸນຫະພູມສູງສຸດໃນຮອບ 58 ປີ ລະດັບ 41,7 ອົງສາ ແລະ “ສະເທິມ” ມີອຸນຫະພູມສຸງສຸດໃນຮອບ 56 ປີ ຢູ່ລະດັບ 41 ອົງສາ.
ສ່ວນອີກໜຶ່ງເມືອງຄື “ຊາເວຈີນ” ໃນພາກພະໂຄທາງຕອນກາງລຸ່ມ ມີອຸນຫະພູມສູງສຸດໃນຮອບ 59 ປີ ຢູ່ລະດັບ 42,7 ອົງສາ. ຂະນະທີ່ຢ້ອນກັບໄປໃນອາທິດຜ່ານມາ ສໍານັກງານອຸຕຸນິຍົມວິທະຍາ ແລະ ອຸທົກກະສາດຂອງມຽນມາລາຍງານວ່າ: ເມືອງຕາມູ ເຊິ່ງຢູ່ທາງຕາເວັນຕົກຂອງປະເທດ ຜະເຊີນວັນອາກາດຮ້ອນທີ່ສຸດໃນຮອບ 44 ປີ ໃນວັນທີ 18 ເມສາຜ່ານມາ.
