ຄວາມປອດໄພຈາກການເຮັດວຽກ ສຸຂະພາບທີ່ດີໃນການເຮັດວຽກ ແມ່ນສິດທິຂອງຜູ້ອອກແຮງງານທີ່ຄວນໄດ້ຮັບ

ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການ-ສັງຄົມ (ຮສສ) ໄດ້ກ່າວສະແດງທັດສະນະຕໍ່ຄຳຂັວນປີ 2023 ທີ່ວ່າ: ສ້າງສະພາບແວດລ້ອມໃນການເຮັດວຽກທີ່ມີຄວາມປອດໄພ ແລະ ດີຕໍ່ສຸຂະພາບ ແມ່ນສິດຂັ້ນພື້ນຖານຂອງທຸກຄົນ.

ວັນທີ 28 ເມສາ ຂອງທຸກໆປີ ເປັນວັນແຫ່ງຄວາມປອດໄພ ແລະ ສຸຂະພາບແຮງງານຂອງໂລກ ການກຳນົດຄຳຂວັນນີ້ອອກມາຂອງທາງອົງການແຮງງານສາກົນ ແມ່ນເປັນການຢືນຢັນ ແລະ ຮຽກຮ້ອງໃຫ້ທຸກປະເທດໃນທົ່ວໂລກເຫັນດີ ແລະ ເອກະພາບນຳກັນວ່າ ຄວາມປອດໄພຈາກການເຮັດວຽກ, ສຸຂະພາບທີ່ດີໃນການເຮັດວຽກ ແມ່ນໜຶ່ງໃນບັນດາສິດທິຕ່າງໆຂອງຜູ້ອອກແຮງງານທີ່ຄວນໄດ້ຮັບເຊັ່ນ: ສິດໃນການໄດ້ມີຜູ້ຕາງໜ້າ ຫຼື ອົງການຜູ້ຕາງໜ້າຂອງຕົນເອງ, ສິດໃນການເຈລະຈາຕໍ່ລອງ ເພື່ອຜົນປະໂຫຍດໃນການເຮັດວຽກ, ສິດໃນການເຮັດວຽກແບບບໍ່ຖືກບັງຄັບໂດຍທາງກົງ ແລະ ທາງອ້ອມ, ສິດໃນການບໍ່ຖືກຈຳແນກລະ ຫວ່າງເພດໃນການປະກອບອາຊີບ ຫຼື ເຮັດວຽກ ແລະ ການໄດ້ຮັບຄ່າແຮງງານ ຊຶ່ງບັນດາສິດເຫຼົ່ານີ້ໄດ້ກຳນົດໄວ້ໃນສົນທິສັນຍາຫຼັກຂອງອົງການແຮງງານສາກົນ ແລະ ໃນປີຜ່ານມາຄະນະຜູ້ແທນຂອງກອງປະຊຸມໃຫຍ່ອົງ ການແຮງງານສາກົນໄດ້ເຫັນດີໃຫ້ສະເໜີເອົາສົນທິສັນຍາກ່ຽວກັບວຽກງານຄວາມປອດໄພ ແລະ ສຸຂະພາບແຮງງານຂຶ້ນມາເປັນໜຶ່ງຂອງສົນທິສັນຍາທີ່ເປັນສິດທິພື້ນຖານໃນການເຮັດວຽກຂອງຜູ້ອອກແຮງງານ.

ສົນທິສັນຍາ 2 ສະບັບ 155 ແລະ 187 ກ່ຽວກັບຄວາມປອດໄພ ແລະ ສຸຂະພາບແຮງງານໃນສະຖານທີ່ເຮັດວຽກ. ລັດຖະບານແຫ່ງ ສປປ ລາວ ພວກເຮົາໄດ້ໃຫ້ສັດຕະຍາບັນ ຫຼື ເປັນພາຄີແລ້ວໃນສອງປີທີ່ຜ່ານມາ. ນັ້ນສະແດງໃຫ້ເຫັນວ່າ ທັດສະນະຂອງລັດຖະບານ ທີ່ກະຊວງ ຮສສ ເປັນເສນາທິການໃຫ້ຕໍ່ວຽກງານດັ່ງກ່າວແມ່ນມີຄວາມຊັດເຈນ ແລະ ເຫັນດີເປັນທີ່ສຸດວ່າ ຄວນໄດ້ຮັບການເອົາໃຈໃສ່ ແລະ ຈັດຕັ້ງປະຕິບັດໃຫ້ມີປະສິດທິພາບພາຍໃຕ້ເງື່ອນໄຂ ແລະ ສະພາບຄວາມເປັນຈິງຂອງການພັດທະນາເສດຖະ ກິດ-ສັງຄົມຂອງປະເທດເຮົາ. ສະນັ້ນ, ສະພາບແວດລ້ອມໃນການເຮັດວຽກທີ່ມີຄວາມປອດໄພ ແລະ ດີຕໍ່ສຸຂະພາບ ຈຶ່ງມີຄວາມສຳຄັນຫຼາຍ ແລະ ແມ່ນສິດຂັ້ນພື້ນຖານຂອງທຸກຄົນທີ່ຄວນໄດ້ຮັບ.