ເປັນຄວາມຈິງ ! ຍິງສາວດື່ມນໍ້າກະທ່ອມຈົນຊັອກຖືກສົ່ງໂຮງໝໍ ແລະ ເສຍຊີວິດໃນເວລາຕໍ່ມາ

ວັນທີ 2 ພຶດສະພາ 2023 ນີ້ ມີການແຊຣ໌ພາບຍິງສາວຄົນໜຶ່ງວ່າ ມີການເສຍຊີວິດຍ້ອນເກີດອາການຊັອກຫລາຍຫລັງທີ່ດື່ມນໍ້າກະທ່ອມ ແລ້ວຖືກສົ່ງໄປປົວຢູ່ໂຮງໝໍມຸກດາຫານ ປະເທດໄທ ແຕ່ບໍ່ດີຂຶ້ນ ແລະ ເສຍຊີວິດໃນເວລາຕໍ່ມາ.

ທີມຂ່າວໜັງສືພິມລາວພັດທະນາ ໄດ້ສອບຖາມໄປຍັງໜ່ວຍກູ້ໄພ ໄດ້ຮັບຄຳຕອບວ່າ ເຫດການນັ້ນເກີດຂຶ້ນຈິງ ເຫດເກີດໃນວັນທີ 30 ເມສາ 2023 ຜ່ານມາ ໄດ້ໄປຮັບຄົນເສຍຊີວິດ ມາແຕ່ມຸກດາຫານ ເພື່ອໄປສົ່ງຢູ່ເຮືອນ, ເປັນເພດຍິງ ປະຊາຊົນ ຢູ່ບ້ານສົມໂຮງ ເມືອງອາດສະພອນ ແຂວງສະຫວັນນະເຂດ ເຊິ່ງທາງຄອບຄົວໄດ້ໃຫ້ຂໍ້ມູນຕໍ່ໜ່ວຍກູ້ໄພດັ່ງກ່າວວ່າ ກ່ອນເກີດເຫດການໄດ້ມີການຕັ້ງວົງດື່ມ ແລະ ມີນໍ້າກະທ່ອມໃນວົງດື່ມດັ່ງກ່າວ ບວກກັບບໍ່ໄດ້ພັກນອນມາຫລາຍຄືນ ຈົນເກີດມີອາການຊັອກ ຈຶ່ງຖືກສົ່ງໂຮງໝໍ ແລະ ເສຍຊີວິດໃນເວລາຕໍ່ມາ ແຕ່ທາງຄອບຄົວບໍ່ສະດວກໃຫ້ສຳພາດເພີ່ມຕື່ມ ຍ້ອນຍັງໂສກເສົ້າເສຍໃຈກັບເຫດການທີ່ເກີດຂຶ້ນ.

ເລື່ອງນີ້ກາຍເປັນກະແສຮືຮາໃນອອນລາຍ ແລະ ເປັນອຸທາຫອນໃຫ້ຫລາຍຄົນ ບໍ່ຄວນປະໝາດ ແລະ ຄິດວ່ານໍ້າກະທ່ອມບໍ່ມີຜົນຮ້າຍ.