ລະວັງ! ອາດຈະໄດ້ຮັບສິນຄ້າບໍ່ຕົງປົກ

ວັນທີ 6 ພຶດສະພາ 2023 ນີ້, ມີຜູ້ເສຍຫາຍແຈ້ງວ່າໄດ້ສັ່ງຊື້ເສື້ອໂປໂລ ນຳເພຈຂາຍເຄື່ອງເພຈໜຶ່ງໃນລາຄາ 139.000 ກີບ/ຜືນ, ຕາມແບບແລະເບີທີ່ມີການໂຄສະນາຢູ່ເພຈດັ່ງກ່າວ ກ່ອນມີການໂອນເງິນກໍ່ໄດ້ຖາມຂໍ້ມູນລະອຽດກ່ຽວກັບເນື້ອຜ້າແລະຮູບແບບຕ່າງໆ ເຊັ່ນ: ໂລໂກ້, ຍີ້ຫໍ້, ແລະ ອື່ນໆ ທີ່ກ່ຽວຂ້ອງກັບເສື້ອນັ້ນ ແລະ ໄດ້ຮັບການຢືນຢັນຈາກແອັດມິນເພຈດັ່ງກ່າວວ່າສິນຄ້າແມ່ນຮັບປະກັນຕົງປົກທຸກຢ່າງຕາມຮູບທີ່ໂພສລົງໂຄສະນາຢູ່ເພຈ ຕົນຈຶ່ງຕັດສິນໃຈໂອນເງິນເພື່ອຊື້.

ຈົນມາຮອດມື້ໄດ້ຮັບເສື້ອໂຕຈິງຮູ້ສຶກຕົກໃຈແລະເສຍຄວາມຮູ້ສຶກຫລາຍເພາະສິນຄ້າທີ່ໄດ້ຮັບນັ້ນເປັນສິນຄ້າບໍ່ຕົງປົກເປັນສິນຄ້າທີ່ບໍ່ໄດ້ມາດຕາຖານຕາມທີ່ລົມກັນ ແລະ ມີຈຸດສັງເກດຫລາຍບ່ອນທີ່ສະແດງເຫັນເຫັນເຖິງສິນຄ້າບໍ່ຕົກປົກ ເຊັ່ນ: ໂລໂກ້ເສື້ອ2ຈຸດ, ກະດຸມຄໍເສື້ອ, ຈຸດບອກເບີເສື້ອ ແລະ ແພເສື້ອ.

ເຕືອນສຳລັບຜູ້ໃດມັກສັ່ງຊື້ສິນຄ້າທາງອອນລາຍຄວນລະມັດລະວັງຕື່ມໃນການຊື້-ຂາຍເຄື່ອງອອນລາຍ ເພາະປັດຈຸບັນທຸລະກິດອອນລາຍເປັນກະແສມາແຮງເປັນທີ່ໄດ້ຮັບຄວາມນິຍົມ ເຊິ່ງໃນນັ້ນກໍມີທັງກຸ່ມຄົນທີ່ຄ້າຂາຍດ້ວຍຄວາມຊື່ສັດບໍລິສຸດ ແລະ ມີທັງກຸ່ມຫລອກລວງ ດັ່ງນັ້ນ, ເຮົາຕ້ອງລະມັດລະວັງຕົວສູງຂຶ້ນ ແລະ ສຶກສາຂໍ້ມູນເພຈທີ່ໂພສຂາຍສິນຄ້າຕ່າງໆໃຫ້ລະອຽດກ່ອນຕັດສິນໃຈສັ່ງຊື້ ເພື່ອບໍ່ໃຫ້ຕົກເປັນເຫຍື່ອຂອງກຸ່ມຄົນບໍ່ດີ.