ເມືອງໃໝ່ ອອກໃບຢັ້ງຢືນເປັນພົນລະເມືອງລາວ ໃຫ້ແກ່ກຸ່ມຄົນຍ້າຍຖິ່ນຖານລຳພັງຢູ່ເຂດຊາຍແດນລາວ-ຫວຽດນາມ 282 ຄົນ

ວັນທີ 10 ພຶດສະພາ 2023 ຜ່ານມາ, ພິທີມອບ-ຮັບ ໃບຢັ້ງຢືນການໃຫ້ສັນຊາດລາວ ຈັດຂຶ້ນຢູ່ບ້ານຫ້ວຍລາຍ ເມືອງໃໝ່ ແຂວງ ຜົ້ງສາລີ ຈັດໂດຍການເປັນກຽດເຂົ້າຮ່ວມຂອງ ທ່ານ ບຸນ ສູນວິເລີດ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງໆໃໝ່ ແຂວງ ຜົ້ງສາລີ .

ເຊິ່ງການລົງຕິດຕາມໃນຄັ້ງນີ້ແມ່ນອິງໃສ່ຕາມ ຂໍ້ຕົກລົງ ລະຫວ່າງ ລັດຖະບານແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະບານແຫ່ງສາທາລະລັດສັງຄົມນິຍົມ ຫວຽດນາມ ວ່າດ້ວຍການແກ້ໄຂບັນຫາຜູ້ຍົກຍ້າຍ ຕັ້ງພູມລຳເນົາ ຕາມລຳພັງໃຈ ທີຍັງບໍ່ທັນສອດຄ່ອງກັບລະບຽບກົດການຄຸ້ມຄອງພົນລະເມືອງ ແລະ ການສ້າງຄອບຄົວທີ່ບໍ່ຖືກຕ້ອງຕາມລະບຽບ ຢູ່ຕາມບໍລິເວນຊາຍແດນ ຂອງສອງປະເທດ ລົງວັນທີ 8 ກໍລະກົດ 2013 ເຊິ່ງໃບຢັ້ງຢືນທີ່ນຳມາມອບໃນຄັ້ງນີ້ມີຈຳນວນທັງໝົດ 282 ໃບ ຈາກນັ້ນກໍໄປມອບໃນຢັ້ງຢືນໃຫ້ປະຊາຊົນບ້ານ ຫ້ວຍລາຍ 251 ຄົນ ຍິງ 144 ຄົນ ແລະ ມອບໃຫ້ປະຊາຊົນ ບ້ານ ນານ້ອຍ ຈຳນວນທັງໝົດ 31 ຄົນ ຍິງ 13 ,ພາຍຫຼັງທີ່ໄດ້ຮັບໃບຢັ້ງຢືນສະບັບນີ້ແລ້ວ ປະຊາຊົນພາຍໃນບ້ານ ໄດ້ຂຶ້ນເປັນພົນລະເມືອງລາວຢ່າງສົມບູນ ປະຊາຊົນທຸກຄົນມີສິດອອກປື້ມສຳມະໂມຄົວ ແລະ ບັດປະຈຳຕົວເປັນຂອງຕົນເອງ ພ້ອມທັງເນັ້ນໜັກໃຫ້ປະຊາຊົນມີຄວາມສາມັກຄີທັງພາຍໃນ ແລະ ພາຍນອກ ເອົາໃຈໃສ່ທຳການຜະລິດ ສ້າງເສດຖະກິດຄອບຄົວໃຫ້ດີຂຶ້ນ ຕ້ານ ແລະ ສະກັດກັ້ນປາກົດການຫຍໍ້ທໍ້ ເພື່ອເຮັດໃຫ້ປະຊາຊົນ, ບ້ານ ແລະ ສັງຄົມ ມີຄວາມສະຫງົບປອດໄພ.