ຟີຟ່າ ເປີດໂຕໂລໂກ້ບານໂລກ 2026 ຢ່າງເປັນທາງການມີຄວາມລຽບງ່າຍ ແຕກຕ່າງຈາກຄັ້ງກ່ອນໆ
ໃນຄືນທີ່ຜ່ານມາ, ສະຫະພັນບານເຕະນາໆຊາດ (ຟີຟ່າ) ໄດ້ເປີດໂຕໂລໂກ້ຢ່າງເປັນທາງການເພື່ອໃຊ້ໃນການແຂ່ງຂັນເຕະບານໂລກຄັ້ງຕໍ່ໄປ. ຢ່າງໃດກໍຕາມ, ໂລໂກ້ FIFA World Cup 2026 ເບິ່ງຄືວ່າຈະບໍ່ມີສີສັນ ແລະ ການອອກແບບທີ່ໂດດເດັ່ນຄືກັບຄັ້ງກ່ອນໆ.
ຮູບລັກສະນະຂອງໂລໂກ້ FIFA World Cup 2026 ແມ່ນມີຄວາມຂ້ອນຂ້າງນ້ອຍ. ໂດຍມີພຽງແຕ່ໝາຍເລກ 26 ສີຂາວ ແລະ ຂັນບານໂລກທີ່ວາງໄວ້ຕໍ່ໜ້າເທົ່ານັ້ນ ປະສົມປະສານກັບພື້ນຫລັງສີດໍາທີ່ຖືກແບ່ງອອກເປັນ 16 ຊ່ອງ, ເພື່ອໃຫ້ແຕ່ລະເມືອງເຈົ້າພາບສາມາດນຳໄປຕົກແຕ່ງພື້ນຫລັງທີ່ສະແດງໃຫ້ເຫັນເຖິງເອກະລັກຂອງຕົນເອງ. ເຊິ່ງຖ້າຫາກຍ້ອນກັບຄືນໄປເບິ່ງໂລໂກ້ບານໂລກທີ່ຜ່ານມາ, ມັກຈະຖືກອອກແບບຕາມຫົວຂໍ້ຫລືຕົວຕົນຂອງປະເທດເຈົ້າພາບ.
ໂດຍທາງ FIFA ໄດ້ອະທິບາຍວ່າຕ້ອງການໃຫ້ໂລໂກ້ບານໂລກ 2026 ສາມາດໃຊ້ຄືນໄດ້ໃນອະນາຄົດ ແລະ ໃຫ້ຄວາມຮູ້ສຶກສາມາດເຂົ້າເຖິງຄົນທຸກເພດທຸກໄວ ນອກຈາກນັ້ນຍັງງ່າຍທີ່ຈະປັບແຕ່ງສໍາລັບແຕ່ລະແພລດຟອມ.
