WMO ເຕືອນອຸນຫະພູມທົ່ວໂລກ ຈະຮ້ອນຂຶ້ນເປັນສະຖິຕິໃໝ່ໃນອີກ 5 ປີຕໍ່ໜ້າ

ສຳນັກຂ່າວຕ່າງປະເທດລາຍງານ: ອົງການ ອຸຕຸນິຍົມໂລກ (WMO) ໄດ້ເຕືອນວ່າ: ອຸນຫະພູມໃນທົ່ວໂລກ ອາດຈະເພີ່ມຂຶ້ນເຖິງລະດັບສະຖິຕິ​ໃໝ່ໃນໄລຍະແຕ່ ປີ 2023 – 2027 ຫລື ອີກ 5 ປີ​ຕໍ່ໜ້າ ຍ້ອນສະພາບອາຍພິດເຮືອນແກ້ວ ແລະ ສະພາບການ ​ເອລນີ​ໂນ(El Nino) ເກີດຂຶ້ນ. ຫລັງ​ຈາກອຸນຫະພູມ ທົ່ວໂລກ ໃນປີກາຍ ສູງກ່ວາ 1,15 ອົງສາ​ເຊ ເມື່ອທຽບໃສ່ ລະດັບສະເລ່ຍ ຂອງຊຸມປີ 1850 –1900.​ໃນ​ໂອກາດ​ນີ້ ທ່ານ Petteri Taalas, ເລຂາ ທິການໃຫຍ່ WMO ໃຫ້ຮູ້ວ່າ: ບົດລາຍງານນີ້ ບໍ່ໝາຍ ຄວາມວ່າອຸນຫະພູມໜ່ວຍໂລກ ຈະເກີນລະດັບ 1,5 ອົງສາ​ເຊ ຄືດັ່ງທີ່ໄດ້ວາງອອກ ໃນສັນຍາປາຣີ ກ່ຽວກັບ ການປ່ຽນແປງ ຂອງດິນຟ້າອາກາດ. ແຕ່ເຖິງຢ່າງໃດ ກໍ່ຕາມ, WMO ພວມກ່າວເຕືອນວ່າລະດັບອຸນຫະພູມ ໜ່ວຍໂລກຈະ “ເກີນ” ລະດັບ 1,5 ອົງສາ​ເຊ ເປັນຊົ່ວຄາວ ແລະ ນັບມື້ນັບ​ເພີ່ມ​ສູງ​ຂຶ້ນ ອີກ.