ຫາລືປະກອບຄຳເຫັນໃສ່ຮ່າງກົດໝາຍ ວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ ໃຫ້ຮັດກຸມ ແລະ ມີປະສິດທິພາບສູງຂຶ້ນ

ກະຊວອຸດສາຫະກໍາ ແລະ ການຄ້າ ໄດ້ຈັດກອງປະຊຸມເປີດກວ້າງຂັ້ນສູນກາງ ເພື່ອປະກອບຄໍາເຫັນ ຕໍ່ກັບຮ່າງກົດໝາຍ ວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ ຂຶ້ນວັນທີ 8 ມິຖຸນາ 2023, ໂດຍການເປັນປະທານຂອງ ທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ພ້ອມມີພາກສ່ວນກ່ຽວຂ້ອງເຂົ້າຮ່ວມ.

ເພື່ອປະກອບຄຳເຫັນຕໍ່ກັບຮ່າງກົດໝາຍ ວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ, ບົນພື້ນຖານແຜນການຄົ້ນຄວ້າສ້າງຮ່າ ກົດໝາຍດັ່ງກ່າວໃຫ້ສຳເລັດພາຍໃນທ້າຍປີນີ້, ຄະນະດັ່ງກ່າວກໍດຳເນີນໄປຕາມຂັ້ນຕອນຂອງການສ້າງນິຕິກຳ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍການສ້າງນິຕິກຳ, ເຊິ່ງຕາມແຜນການສ້າງກົດໝາຍໃນເບື້ອງຕົ້ນ ແມ່ນຈະໃຫ້ສຳເລັດໃນທ້າຍ ປີ 2025. ປັດຈຸບັນວຽກງານຄຸ້ມຄອງລາຄາສິນຄ້າ ແລະ ຄ່າບໍລິການ ແມ່ນເປັນວຽກທີ່ມີຄວາມສຳຄັນຫລາຍ ແລະ ຕິດພັນກັບຫລາຍຂະແໜງການແຕ່ສູນກາງລົງຮອດທ້ອງຖິ່ນ, ເປັນວຽກງານທີ່ອ່ອນໄຫວ ທັງຕິດພັນຕໍ່ກັບຊີວິດການເປັນຢູ່ ຂອງປະຊາຊົນບັນດາເຜົ່າໃນຂອບເຂດທົ່ວປະເທດ ຈຶ່ງໄດ້ຍ້າຍມາໃສ່ກອງປະຊຸມສະໄໝສາມັນເທື່ອທີ VI ຂອງສະມາຊິກສະພາແຫ່ງຊາດ ຊຸດທີ 9 ໃຫ້ສຳເລັດໃນທ້າຍປີ 2023 ນີ້.

ທ່ານປະທານກອງປະຊຸມ ກ່າວວ່າ: ຜ່ານການຮັບຟັງການປະກອບຄຳເຫັນ ຕໍ່ກັບຮ່າງກົດໝາຍວ່າດ້ວຍການຄຸ້ມຄອງລາຄາສິນຄ້າ ແລະ ຄ່າບໍລິການ ພ້ອມທັງຮັບຟັງການສົນທະນາແລກປ່ຽນຄໍາເຫັນຈາກບັນດາທ່ານທີ່ເຂົ້າຮ່ວມໃນກອງປະຊຸມຄັ້ງນີ້ ແມ່ນມີການປະກອບຄຳເຫັນຢ່າງກົງໄປກົງມາ ເພື່ອນຳເອົາໄປສືບຕໍ່ຄົ້ນຄວ້າປັບປຸງເນື້ອໃນຂອງຮ່າງກົດໝາຍດັ່ງກ່າວນີ້ ໃຫ້ມີເນື້ອໃນທີ່ຮັດກຸມ, ກະທັດຮັດ, ຊັດເຈນ, ຖືກຕ້ອງ, ຄົບຖ້ວນ, ສອດຄ່ອງທາງດ້ານຫລັກການ, ລະ ບຽບການ ແລະ ສະພາບຄວາມເປັນຈິງຂອງການພັດທະນາເສດຖະກິດ-ສັງຄົມ ເຮັດໃຫ້ການຄຸ້ມຄອງ ແລະ ການຈັດຕັ້ງປະຕິບັດວຽກງານຄຸ້ມຄອງລາຄາ ໄດ້ຮັບປະສິດທິພາບ ແລະ ມີປະສິດທິຜົນ.