ທຳລາຍຊິ້ນສ່ວນສັດທີ່ຢຶດມາໄດ້ຕາມທ້ອງຕະຫລາດ ພ້ອມປ່ອຍສັດປ່າທີ່ຍັງມີຊີວິດຄືນສູ່ທຳມະຊາດ
ວັນທີ 9 ມິຖຸນາ 2023 ຜ່ານມາ, ຫ້ອງການກະສິກຳ ແລະ ປ່າໄມ້ເມືອງຍົມມະລາດ ແຂວງຄຳມ່ວນ ທຳລາຍຊິ້ນສ່ວນສັດປ່າທີ່ຢຶດມາໄດ້ຕາມທ້ອງຕະຫຼາດ ດ້ວຍການຝັງດິນ ສ່ວນປະເພດສັດປ່າທີ່ຍັງມີຊີວິດ ແມ່ນໄດ້ປ່ອຍຄືນສູ່ທຳມະຊາດ ໂດຍມີທ່ານ ຄູນສີ ແສງດາລາ ຮອງເລຂາພັກເມືອງຍົມມະລາດ, ທ່ານ ບຸນທະໄຫວ ໂດໄລສານ ຮອງເຈົ້າເມືອງຍົມມະລາດ.
ເຊິ່ງໃນວັນທີ 7 ມິຖຸນາ 2023 ໜ່ວຍງານກວດກາປ່າໄມ້ ຫ້ອງການກະສິກຳ ແລະ ປ່າໄມ້ເມືອງ ໄດ້ລົງກວດກາ ຕະຫຼາດບ້ານໂຄກສະຫວ່າງ ເມືອງຍົມມະລາດ ແຂວງຄຳມ່ວນ ຜ່ານການກວດກາໄດ້ພົບເຫັນການລັກລອບ ຊື້-ຂາຍ ສັດປ່າປະເພດຄຸ້ມຄອງ ແລະ ສັດປ່າປະເພດສະຫງວນ ທີ່ຜິດຕໍ່ລະບຽບກົດໝາຍສັດນ້ຳ – ສັດປ່າ ຈຳນວນ 13 ໂຕ ເຊິ່ງມີນ້ຳໜັກລວມທັງໝົດ 9,5 ກິໂລກຼາມ ແລະ ຊິ້ນສ່ວນໂຕແລນ 1,5 ກິໂລ ໃນນັ້ນມີສັດປ່າທີ່ຍັງມີຊີວິດ ຈຳນວນ 3 ໂຕ ນ້ຳໜັກລວມ 5,5 ກິໂລ. ໃນຈໍານວນສັດປ່າທີ່ຢຶດມາໄດ້ແມ່ນປະກອບມີ: ແລນ, ກະຮອກ ແລະ ກະແຕ ຫຼັງຈາກນັ້ນທາງທີມງານເຈົ້າໜ້າທີ່ກວດກາປ່າໄມ້ ກໍໄດ້ເຮັດບົດບັນທຶກອາຍັດໄວ້ ແລະ ນຳມາເກັບຮັກສາໄວ້ທີ່ຫ້ອງການກະສິກຳ ແລະ ປ່າໄມ້ເມືອງ.
