ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ລະດົມຄວາມຄິດເຫັນຕໍ່ກັບການແກ້ໄຂບັນຫາອັດຕາເງິນເຟີ້ ແລະ ລາຄາສິນຄ້າ 

ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ໄດ້ຈັດກອງປະຊຸມລະດົມຄວາມຄິດເຫັນຈາກພາກທຸລະກິດ ເພື່ອຄົ້ນຄວ້າບັນດາມາດຕະການແກ້ໄຂ ຕໍ່ກັບບັນຫາອັດຕາເງິນເຟີ້ ແລະ ລາຄາສິນຄ້າທີ່ເພີ່ມສູງຂຶ້ນ ໃນວັນທີ 16 ມິຖຸນາ 2023, ເປັນປະທານຂອງ ທ່ານ ກິແກ້ວ ຈັນທະບູລີ ຮອງເລຂາຄະນະພັກ ຮອງປະທານສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ (ສວສສຊ) ທັງເປັນຜູ້ປະຈຳການ ຄະນະສະເພາະກິດ 44/ນຍ.

ກອງປະຊຸມສຳມະນາໃນຄັ້ງນີ້, ເພື່ອລະດົມຄວາມຄິດເຫັນຈາກພາກທຸລະກິດກ່ຽວກັບປັດໄຈໃດທີ່ເປັນສາເຫດຕົ້ນຕໍກໍ່ໃຫ້ເກີດສະພາບບັນຫາອັດຕາເງິນເຟີ້ ແລະ ລາຄາສິນຄ້າສູງຂຶ້ນຢ່າງຕໍ່ເນື່ອງ, ວິທີການໃນການຮັບມືຂອງພາກທຸລະກິດ ຕໍ່ກັບບັນຫາດັ່ງກ່າວ ລວມເຖິງຂໍ້ສະເໜີແນະຈາກພາກທຸລະກິດ ເພື່ອໃຫ້ຄະນະສະເພາະກິດ ນຳໄປຄົ້ນຄວ້າລົງເລິກ ເພື່ອຊອກຫາແນວທາງ ແລະ ມາດຕະການໃນການແກ້ໄຂໃນຕໍ່ໜ້າ.

ໂອກາດນີ້, ທ່ານ ກິແກ້ວ ຈັນທະບູລີ ເນັ້ນໃຫ້ພາກທຸລະກິດປະສານສົບທົບ ກັບກອງເລຂາຊ່ວຍວຽກຄະນະສະເພາະກິດ 44/ນຍ ເພື່ອສະໜອງຂໍ້ມູນອັນເປັນປະໂຫຍດ, ສາມາດນຳມາຄົ້ນຄວ້າ, ວິເຄາະວິໄຈ ໃຫ້ຖືກຕາມສະພາບການຕົວຈິງ ຢ່າງພາວະວິໄສ ເພື່ອຊອກຫາແນວທາງ ແລະ ມາດຕະການແກ້ໄຂໃຫ້ສອດຄ່ອງ ເພື່ອຊ່ວຍຊຸກຍູ້ພາກທຸລະກິດ ໃຫ້ສາມາດຂ້າມຜ່ານວິກິດການໃນຄັ້ງນີ້ໃຫ້ໄດ້ໂດຍໄວ.

ຂໍ້ມູນ: ປະຊາຊົນ