ຄ້າຜິດກົດອະນາຄົດບໍ່ສົດໃສ

- advert banner 728 90 728x90 - ຄ້າຜິດກົດອະນາຄົດບໍ່ສົດໃສ

ໂດຍ: ທິດ​ກໍ່າ

- new3 - ຄ້າຜິດກົດອະນາຄົດບໍ່ສົດໃສ

​ໃນ​ເງື່ອນ​ໄຂ​ທີ່​ບ້ານ​ເມືອງ​ເຮົາ​ພວມ​ມີການ​ສ້າງສາ​ພັດທະນາ,​ ການ​ຊອກ​ຢູ່​ຫາ​ກິນ ​ແລະ ​ການ​ປະກອບ​ອາຊີບ​ຕ່າງໆ​ຢ່າງຫລາກຫລາຍ​ສີສັນ, ຫລາຍ​ວິທີ​ການ​ສຸດ​ແລ້ວ​ແຕ່​ວິຊາ​ອາຄົມ​ ແລະ ​ຄວາມ​ຖະໜັດຂອງ​ໃຜລາວ, ​​ໃນ​ນັ້ນກໍມີ​ອັນຖືກ​ແດ່ຜິດ​ແດ່, ຖືກຫລາຍຖືກ​ໜ້ອຍ, ຜິດ​ຫລາຍຜິດ​ໜ້ອຍ ​ສຸດ​ແລ້ວ​ແຕ່ການ​ກະທໍາ​ຂອງ​ໃຜ​ມັນ. ແຕ່​ອັນ​ສໍາຄັນກໍຕ້ອງ​ໄດ້​ເບິ່ງ​ເພິ່ນ​ເບິ່ງ​ໂຕ, ນອນ​ຢູ່​ໃນ​ກອບ​ຂອງ​ສິນ​ທໍາ​ປະ​ຈໍາ​ໃຈ​, ຖືກຕ້ອງ​​ກັບຕົວ​ບົດ​ກົດ​ໝາຍ, ສອດຄ່ອງກັບຍຸກ​ສະ​​ໄໝ ​ແລະ ​ການ​ຂະຫຍາຍຕົວຂອງ​ສັງຄົມ​ ເພື່ອ​ໃຫ້​ຄົນ​ເຮົາ​ຢູ່​ດ້ວຍ​ກັນ​ຢ່າງ​ສັນຕິ ​ແລະ ມີຄວາມສຸກ ນັ້ນ​ຄື​ຊີວິດ​ອັນ​ສຸດ​ຍອດ​ຂອງ​ຄົນ​ເຮົາ​ທີ່​ດໍາລົງ​ຊີວິດ​ຢູ່ບົນ​ຜືນ​ແຜ່ນ​ດິນ​ລາວ​ອັນ​ແສນ​ຮັກ​ ແລະ ​ຫວງ​ແຫນ​ແຫ່ງ​ນີ້. ​ເພາະສະ​ນັ້ນ ຈຶ່ງ​​ເວົ້າໄດ້​ວ່າ​ຄົນລາວ​ເຮົາ​​ໃຜຈະເຮັດ​ຫຍັງ, ຢູ່​ໃສກໍ​ຕ້ອງ​ໄດ້​ຄໍານຶງ​ເຖິງ​ຄວາມ​ດີ​ ໂດຍມີກົດໝາຍ​​ເປັນ​ບ່ອນອີງ ​ແລະ ​ເປັນ​ເສົ້າ​ຄ້ຳ​ ​ເພື່ອ​ເຮັດ​ໃຫ້ການ​ປະກອບອາຊີບ ຫລື​ວ່າ ​ການ​ຊອກ​ຢູ່​ຫາ​ກິນ​​ໃຫ້ເຕັມ​ໄປ​ດ້ວຍຄວາມຍືນ​ຍົງ​ ແລະ ​ໝັ້ນຄົງ.

ກົງກັນຂ້າມ, ຫາກ​​ເຮົາ​ເອົາຄວາ​ມສຸກຢູ່​ບົນ​ຄວາມທຸກ​ຂອງ​ຄົນ​ອື່ນແລ້ວ ​ບໍ່​ໄວ​ກໍ​ຊ້າ​ສິ່ງ​ທີ່​ຕົນ​ໄດ້​ກະທໍາ​ຈະກາຍ​ເປັນ​ມັດ​ຈຸລາ​ດທີ່​ຄອຍ​ຕາມ​ລ່າ​ເຜົາ​ຜານ​ໃຫ້​ຕົວເຮົາຕົກ​ຢູ່ໃນຄວາມທຸກ​ບໍ່​ໄວ​ກໍຊ້າ. ນີ້​ຄືຄວາມ​ຈິງ​ແຫ່ງ​ສັດຈະ​ທໍາ ​ເຊິ່ງ​ບໍ່​ມີ​ໃຜ​ສາມາດຫລີກເວັ້ນໄດ້.

ສິ່ງ​ທີ່​ທິດ​ກໍ່າ​ໄດ້​ຍົກ​ມາ​ເປັນ​ອຸທາຫອນ​ນີ້ ​ຄື​ຕົວຢ່າງ​ຂອງ​ບໍລິສັດ ພີເອສ ສົ່ງ​ເສີມ​ກະສິກໍາ​ແລະ ​ອຸດ​ສາຫະ​ກໍາ​ຄົບ​ວົງ​ຈອນ​ຂາ​ເຂົ້າ-ຂາ​ອອກ ​ຈໍາກັດ. ກ່ອນ​ອື່ນ​ທິດ​ກໍ່າ ​ຕ້ອງ​ຂໍ​ໂທດ​ທີ່​ໄດ້​ຍົກເອົາບໍລິສັດນີ້ມາເປັນຕົວຢ່າງ ຍ້ອນ​ວ່າ​​ບັນຫາ​ທີ່​​ເກີດ​ຂຶ້ນ​ກັບ​ບໍລິສັດ​ພີ​ເອສນີ້ ​ມັນ​ເປັນ​ເຫດການໃຫມ່​ອ່ຽມ​​ສົດໆ​ຮ້ອນໆ ຈົນ​ວິນາທີ​ສຸດ​ທ້າຍ​ພາກ​ລັດ​ກໍຈໍາ​ຕ້ອງ​ໄດ້​ຍື່ນ​ມື​ເຂົ້າ​ມາ​ຊ່ວຍແກ້ໄຂ. ທິດ​ກໍ່າ​ຂໍ​ເວົ້າ​ແຈ້ງ​ເຕັມ​ປາກວ່າການ​ເຄື່ອນ​ໄຫວ​ຂອງ​ບໍລິສັດ​ພີ​ເອສ​ໃນ​ໄລຍະ​ຜ່ານ​ມາ​ແມ່ນ​ເປັນ​ການ​ກະທໍາທີ່​ຜິດ​ກົດໝາຍ ​ໂດຍ​ສະ​ເພາະ​ແມ່ນ​ກົດໝາຍ​ການລົງທຶນ ​​ແລະ ​ກົດໝາຍທະນະ​ຄານ​ແຫ່ງ ສປປ ລາວ, ສ່ວນ​ວ່າ​ການກະ​ທໍາຜິດ​ໃນ​ມາດຕາ​ໃດ​ແດ່ນັ້ນ​ ທິດ​ກໍ່າ​ບໍ່​ສາມ​າດນໍາ​ມາ​ເວົ້າ​ກິໆ​ກີໆ​​ໄດ້, ມີ​ແຕ່​ວ່າ​ຖ້າ​ໃຜ​ຢາກ​ຮູ້​ຄວາມ​ຈິງ​ວ່າມັນ​ຜິດ ຫລື ​ຖືກ​ນັ້ນ​ ກໍຂໍ​ໃຫ້ໄປ​ອ່ານກົດໝາຍ​ໃນ​ສອງ​ຂົງ​ເຂດ​ນີ້​, ມີ​ແຕ່​ວ່າ​ເພື່ອ​ໃຫ້​ເຂົ້າ​ໃຈກົກໆ​ຂອງ​ບັນຫາ​ທິດ​ກໍ່​າຂໍ​ຍົກ​ຕົວຢ່າງ​ເອົາ​ບາງ​ກໍລະນີ​ມາ​ວິ​ເຄາະ​ສູ່​ກັນຮູ້ດັ່ງ​ນີ້, ອັນ​ສາ​ເຫດ​ທີ່​​ບໍລິສັດ​ພີ​ເອສ​ເຄື່ອນ​ໄຫວ​ຜິດ​ກົດໝາຍ​ນັ້ນ​ແມ່ນ​ເພິ່ນ​ເປັນບໍລິສັດ​ດັ່ງ​ຊື່​ສຽງ​ຮຽງ​ນາມ​ທີ່​ກ່າວ​ມາ​ຂ້າງ​ເທິງ, ​ແຕ່​ໃນ​ເວລາ​ເຄື່ອນ​ໄຫວ​ພັດ​ພາກັນ​ລະດົມ​ເງິນ​ຝາກ​​ຄື​ທະນາ​ຄານ, ​ຊໍ້າ​ບໍ່​ໜໍາ​ຍັງໃຫ້​ດອກ​ເບ້ຍ​ເກີນກວ່າທະນາ​ຄານ, ຜູ້​ທີ່​ມາ​ຝາກ​​​ເງິນນັ້ນ​ເອີ້ນຊື່ພ້ຽນ​​ໄປວ່າ​ສະມາຊິກ​ຜູ້​ຮ່ວມ​ທຶນ​ທາງ​ດ້ານ​ທຸລະ​ກິດ. ​ເຖິງ​ວ່າ​ຈະພ້ຽນ​ເອີ້ນ​ຊື່​​ແບບ​ໃດ, ແນວ​ໃດ, ຮູບ​ການ​ໃດ​ກໍຕາມ, ​ແຕ່​ການ​ເຄື່ອ​ໄຫວ​ພັດ​​ໂຄສະນາ​ປຸກລະດົມ​ໃຫ້ຄົນ​ເອົາ​ເງິນ​ມາ​ຝາກ ​ແລະ ຊໍ້າ​ພັດ​ໃຫ້​ດອກ​ເບ້ຍສູງ​ເກີນ​ກວ່າ​ຄວາມ​ເປັນ​ຈິງ ​ແລະ ​ກົດໝາຍ​ກໍານົດມັນ​ກໍ​ຜິດ​ຢູ່​ແລ້ວ. ຕໍ່​ການກະທໍາ​ສິ່ງ​ນີ້​ຢາກ​ບໍ່​ຢາກກໍສະ​ແດງ​ວ່າ​ເຈົ້າ​ເປັນຜູ້​ຝ່າຝືນລະບຽບກົ​ດໝາຍ ​ແລະ ຫັນ​ທິດເດີນ​ຕາມ​ກົດ​ໝູ່​​ນີ້​ຄື​ການ​ກະທໍາ​ຜິດ​ໃນກະ​ໂທ​ງທີ​ໜຶ່ງ. ສ່ວນວ່າກະ​ໂທ​ງທີ​ສອງ​ນັ້ນ​ຖ້າ​ແມ່ນ​ເປັນ​ບໍລິສັດ​ຮ່ວມ​ທຶນ​ຕ້ອງ​ໄດ້​ແບ່ງປັນຜົນ​ປະ​ໂຫຍ​ດ​ຕາມ​ກໍາ​ໄລ ​ແລະ ຈໍານວນ​ຮຸ້ນ​ຂອງສະມາຊິກ​ຜູ້ທີ່​ໄດ້​ຮ່ວມ​ທຶນມັນ​ສິມີ​ຈັກ​ແສນ​ຈັກ​ລ້ານ​ຮຸ້ນ​ກໍ​ສຸດ​ແລ້ວ ​ແລະ ​ລະບົບ​ການ​ຄຸ້ມ​ຄອງ​ກໍ​ຕ້ອງ​ເປັນ​ໄປ​ຕາມ​ກົດ​ຂອງ​ການ​ຮ່ວມ​ທຶນ​​ທີ່​ລັດຖະບານ​ວາງ​ອອກ ​ເຊິ່ງ​ປະກອບ​ດ້ວຍ​ຜູ້ຕາງໜ້າ​ພາກສ່ວນ​ກ້ຽວ​ຂ້ອງ ​ອັນ​ສໍາຄັນ​ແມ່ນ​ມີ​ຕາງໜ້າ​ຜູ້​ລົງທຶນ, ​ຜູ້​ອອກ​ແຮງ​ງານ ຫລື ​ກໍາມະບານ ​​ແລະ ​ຍັງ​ມີຫລາຍໆຂັ້ນຫລາຍ​ຂອດ​ ແລະ ​ຫລາຍບັນຫາ​ທີ່​ພີ​ເອສຍັງ​ບໍ່​ທັນ​ປະຕິບັດ​ຢ່າງ​ຖືກຕ້ອງ​ສອດຄ່ອງ​ກັບ​ລະບຽບຫລັກ​ການໃນ​ການເຄື່ອນໄຫວວິ​ສາຫະ​ກິດ​. ອັນ​ໂຕ​ທີ່​ຜິດ​ຢ່າງ​ມະ​ຫັນ​ ກໍ​ຄື​ລະດົມ​ໃຫ້​ໝູ່​ເອົາ​ເງິນ​ໄປ​ຝາກ​ແລ້ວ​ຕົນ​ເອງ​ພັດ​ບໍ່​ມີ​ຄວາມ​ຮັບຜິດຊອບ​ເອົາ​ໄປ​ຈ່າຍລົງທຶນ​ຊະຊາຍກຸດ​ຫ້ຽນ​​ເຂົ້າ​ຈົນບໍ່​ມີ​ເງິນ​ຄືນ​ໃຫ້​ສະມາຊິກ​ທັງ​ຕົ້ນ​ ແລະ ​ທັງ​ດອກເບ້ຍ, ວິນາທີ​ສຸດ​ທ້າຍ​ກໍ​ຍັງ​ມາ​ເວົ້າອ​ວດໂອ່ງ​ທ້າ​ທາຍ​ກັບ​ສະມາຊິກວ່າ​ເງິນໝົດ​ແລ້ວ, ຍັງບໍ່​ມີ​ເງິນຈະ​ສົ່ງ​ຄືນ​ ສິ​ຂ້າ​ກໍ​ຕາຍ​ສິ​ຂາຍ​ກໍຍອມ ວ່າ​ຊັ້ນ ! ຍັງ​ພໍ​ໄຄ​ແດ່​ແຕ່​ວ່າທາງ​ໜ່ວຍ​ງານ​ສະເພາະກິດ​ເບື້ອງ​ລັດຍື່ນ​ມືເຂົ້າມາແກ້ໄຂ​ໄວ, ຖ້າ​ບໍ່​ສະພາບ​ຍິ່ງ​ຮ້າຍ​ແຮງ​ຂຶ້ນ. ກ່ອນ​ກ້າວ​ມາ​ເຖິງ​ເຫດການ​ບານ​ປາຍ, ທາງ​ທະນາ​ຄານ​ແຫ່ງ ສປປ ລາວ​ ກໍ​ໄດ້​ອອກ​ແຈ້ງ​ໄປ​ແລ້ວ​ວ່າ ​​​ຫ້າມ​​ບໍລິສັດພີ​ເອສ​ເຄື່ອນ​ໄຫວ​​ຜິດ​ກັບ​ກົດໝາຍ ​​ແລະ ທັງ​ຫ້າມ​ບຸກຄົນ​ ແລະ​ ນິຕິບຸກຄົນ​ບໍ່​ໃຫ້ພາກັນ​ເອົາ​ເງິນ​ໄປ​ຝາກ​ ເພາະ​ຢ້ານມັນ​ກ້ຽງທັງ​ຕົ້ນ ​ແລະ ​ທັງ​ດອກເບ້ຍ, ​ແຕ່​ເຖິງ​ປານ​ນັ້ນ​ກໍຍັງ​ມີ​ຈໍານວນ​ບໍ່​ໜ້ອຍ​ພາກັນ​ແຫ່​ແຫນ​ແພນ​ກັ້ງ​ເອົາ​ເງິນ​ໄປ​ຝາກ​ ຍ້ອນ​ຄວາມ​​ເຫັນ​ແກ່​ປາກ​ຄວາມຢາກ​ແກ່​ທ້ອງ.

- lattana 1 - ຄ້າຜິດກົດອະນາຄົດບໍ່ສົດໃສ

​ເຖິງ​ຢ່າງ​ໃດ​ກໍ​ດີ, ຕາມ​ທິດ​ກໍ່າ​ວ່າ ​​ເວົ້າ​ເລື່ອງ​ການ​​ຄ້າຂາຍ​ຫງາຍ​ມື​ຢູ່​ບ້ານ​ເຮົາ​ໃນ​ສະພາບ​ປັດຈຸບັນ​ຍັງ​ມີ​ບຸກຄົນ, ນິຕິບຸກຄົນຈໍານວນ​ບໍ່​ໜ້ອຍ​ຍັງ​ສືບ​ຕໍ່ດໍາ​ເນີນ​ທຸລະ​ກິດ​ທີ່​ຜິດ​ລະບຽບ​ກົດໝາຍເຊັ່ນ:​ ການ​ຄ້າຂາຍ​ເຖື່ອນ, ຄ້າຂາຍ​ຢາ​ເສບ​ຕິດ, ຫລົບຫລີກ​ພາສີອາກອນ, ​ເປັນ​ນາຍ​ໜ້າ​ຫາ​ເລາະຕົ້ມ​ຕຸ​ນເກງ​ກໍາ​ໄລ​ເຂົ້າຖົງ​ຕົນ​ເອງ ​ໂດຍ​ບໍ່​ຄໍາ​ນຶງ​ເຖິງ​ພັນທະໜ້າ​ທີ່​ຂອງ​ຕົນ​ເອງ​ທີ່​ມີ​ຕໍ່ສັງຄົມ ​ແລະ ປະ​ເທດ​ຊາດ​. ຕາມ​ເຮົາ​ວ່າ​ຖ້າ​ບຸກຄົນ​ໃດ​ໄດ້​ກະທໍາ​ຜິດ​ ​ເຊິ່ງ​ມີ​ຜົນ​ກະທົບ​ຕໍ່​ຄົນ​ອື່ນ ​ແລະ ​ປະ​ເທດ​ຊາດ ​ແນ່ນອນ​ອະນາ​ຄົດ​ຈະ​ບໍ່​ສົດ​ໃສ​ດັ່ງຫລາຍ​ບໍລິສັດ​ທີ່​ເຄີຍ​ເປັນ​ມາ.​

error: Content is protected !!