ເດີນທາງມາຮອດເຄິ່ງສະໄໝທີ່ພັກ-ລັດຖະບານ ຕັ້ງເປົ້າແກ້ໄຂ 7 ບັນຫາຂອງປະເທດຊາດ ຍັງມີ ຫລາຍບັນຫທີ່ຕ້ອງສືບຕໍ່ແກ້ໄຂ
ປີ 2023 ເດີນທາງມາໄດ້ເຄິ່ງໜຶ່ງແລ້ວ ເຊິ່ງໝາຍຄວາມວ່າ ເດີນທາງມາໄດ້ເຄິ່ງສະໄໝຂອງ ຄະນະບໍລິຫານງານ ສູນກາງພັກ ປະຊາຊົນປະຕິວັດລາວ ສະໄໝທີ XI ແລະ ລັດຖະບານຊຸດທີ IX, ເຫັນໄດ້ວ່າ ໃນໄລຍະຕົ້ນເດືອນຫາກາງເດືອນ ມິຖຸນາ 2023 ນີ້ ແຕ່ລະກະຊວງ ແລະ ພາກສ່ວນຕ່າງໆຂອງພັກລັດຖະບານໄດ້ມີການດຳເນີນກອງປະຊຸມຄົບຄະນະກາງສະໄໝ ຂອງຕົນເອງ ເພື່ອສະຫລຸບຜົນງານງານ ແລະ ວາງທິດທາງແຜນການທີ່ຈະຕ້ອງປະຕິບັດໃນເຄິ່ງສະໄໝທ້າຍ ເຊິ່ງມີຫລາຍອັນໄດ້ຮັບການພັດທະນາດີຂຶ້ນ ແລະ ບາງວຽກງານແມ່ນຍັງຈະໄດ້ຮັບການສືບຕໍ່ພັດທະນາ ສົ່ງເສີມໃຫ້ສຳເລັດຜົນໃນຂັ້ນຕໍ່ໄປ.
ເວົ້າເຖິງບັນຫານີ້ ພວກເຮົາຢ້ອນໄປເບິ່ງ 7 ບັນຫາສຳຄັນຕົ້ນຕໍ ທີ່ພັກ-ລັດຖະບານຕ້ອງເລັ່ງແກ້ໄຂ ໃນໄລຍະ 5 ປີ ທີ່ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ລາຍງານຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ວັນທີ 13 ຫາ 15 ມັງກອນ 2021 ຜ່ານມາວ່າ:
ອັນທີໜຶ່ງ: ຕ້ອງແກ້ໄຂຄວາມທຸກຍາກຂອງປະຊາຊົນ ແລະ ພັດທະນາຕາມທິດ 3 ສ້າງ ເພື່ອຫລຸດຜ່ອນຄວາມແຕກໂຕນທາງດ້ານສັງຄົມ, ການເຂົ້າເຖິງການບໍລິການສາທາລະນະ, ການສຶກສາ, ສາທາຢູ່ເຂດຫ່າງໄກສອກຫລີກ.
ສອງ: ການແກ້ໄຂຄວາມບອບບາງທາງດ້ານເສດຖະກິດ ເປັນຕົ້ນການເຕີບໂຕສ່ວນໃຫຍ່ທີ່ເອື່ອຍອີງໃສ່ແຕ່ການຂຸດຄົ້ນ ແລະ ນຳໃຊ້ຊັບພະຍາກອນທຳມະຊາດທີ່ບໍ່ທັນມີປະສິດທິຜົນເທົ່າທີ່ຄວນ, ຄຸນນະພາບຂອງການເຕີບໂຕບໍ່ສູງ, ບໍ່ທັນສາມາດກະຈາຍລາຍໄດ້ຢ່າງທົ່ວເຖິງ, ຖານການຜະລິດບໍ່ທັນໜັກແໜ້ນ.
ສາມ: ການແກ້ໄຂຄວາມບອບບາງທາງດ້ານການເງິນເຊັ່ນ: ການແກ້ໄຂບັນຫາໜີ້ສິນສາທາລະນະ, ການເກັບລາຍຮັບບໍ່ຄົບຖ້ວນ ແລະ ການຮົ່ວໄຫລບໍ່ສົມຄູ່ກັບຄວາມສາມາດບົ່ມຊ້ອນ, ງົບປະມານບໍ່ພຽງພໍກັບຄວາມຈຳເປັນຂອງການພັດທະນາ, ສ່ວນຫລາຍແມ່ນສຸມໃສ່ການແກ້ໄຂໜີ້ສິນ.
ສີ່: ແກ້ໄຂຄວາມບອບບາງທາງດ້ານເງິນຕາ, ດ້ານການຄ້າເຫັນວ່າມີເກີນດູນ, ແຕ່ດູນການຊຳລະກັບຕ່າງປະເທດ (BOP) ມີທ່າອ່ຽງຫລຸດລົງ, ລາຄາສິນຄ້າມີທ່າອ່ຽງສູງຂຶ້ນ (ເງິນເຟີ້) ແລະ ອັດຕາການແລກປ່ຽນມີການເໜັງຕີງໃນບາງໄລຍະພາໃຫ້ເກີດມີຕະຫລາດນອກລະບົບ.
ຫ້າ: ແກ້ໄຂຜົນກະທົບການລະບາດພະຍາດໂຄວິດ-19 ເປັນຕົ້ນບັນຫາແຮງງານ (ການຫວ່າງງານ), ການຟື້ນຟູທຸລະກິດທີ່ໄດ້ຮັບຜົນກະທົບຈາກການລະບາດດັ່ງກ່າວໃຫ້ຄືນສູ່ສະພາບປົກກະຕິ.
ຫົກ: ການແກ້ໄຂການຄຸ້ມຄອງລັດ, ຄຸ້ມຄອງສັງຄົມໃຫ້ມີປະສິດທິພາບ, ຫັນເຂົ້າສູ່ການຄຸ້ມຄອງດ້ວຍກົດໝາຍຢ່າງເຂັ້ມງວດ ແລະ ເດັດຂາດ ລວມທັງການປັບປຸງ ແລະ ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການດຶງດູດການລົງທຶນ. ເຈັດ: ແກ້ໄຂການພັດທະນາຊັບພະຍາກອນມະນຸດໃຫ້ມີຄຸນນະພາບ, ມີຈຸດສຸມ, ສົ່ງເສີມວິຊາຊີບ ແລະ ການຫັນເປັນຊ່ຽວຊານຕິດພັນກັບການຫັນເປັນທັນສະໄໝໃນຍຸກ 4.0 ແລະ ຊີວິດແບບໃໝ່ (New Normal). ນີ້ຄືຕຳລາທາງອອກທີ່ສຳຄັນ ແລະ ຈຳເປັນເພື່ອກ້າວສູ່ຄວາມສຳເລັດໃນການສ້າງສາພັດທະນາປະເທດຊາດໃຫ້ຫລຸດພົ້ນອອກຈາກສະຖານະພາບຄວາມທຸກຍາກ ແລະ ດ້ອຍພັດທະນາ.
ແຕ່ກ່ອນອື່ນຕ້ອງເຂົ້າໃຈວ່າ ນີ້ມັນເປັນພຽງຕຳລາທີ່ຍັງຢູ່ໃນເຈ້ຍໃນສໍ, ເປັນບ່ອນອີງ ທັງເປັນຕົວວັດໃນເວລາຈັດຕັ້ງປະຕິບັດ, ສິ່ງສຳຄັນ ກ່ອນອື່ນໝົດແມ່ນຂຶ້ນກັບຄົນເປັນຜູ້ເຮັດ, ຜູ້ນຳພາເຮັດນຳພາໄປ ເພື່ອບັນລຸຄາດໝາຍດັ່ງກ່າວແມ່ນອາໄສພະນັກງານຫລັກແຫລ່ງແກນນຳຂອງພັກ ແລະ ລັດຖະບານ ຕະຫລອດບັນດາທ່ານຜູ້ແທນສະພາປະຊາຊົນໃນຊຸດທີ IX ແລະ ຜູ້ແທນສະພາປະຊາຊົນຂັ້ນແຂວງ ຊຸດທີ II ຕ້ອງເປັນຫົວຫອກນຳໜ້າພາທາງກັນເຢີກຈຶ່ງຈະສຳເລັດຕາມເປົ້າໝາຍທີ່ວາງໄວ້. ອີກປະການໜຶ່ງ ຖ້າຢາກສຳເລັດຕາມຄວາມມຸ້ງມາດປາດຖະໜາອີ່ຫລີ ໂດຍສະເພາະແມ່ນຕາມມະຕິຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງລັດຖະບານວາງອອກ ຕ້ອງໄດ້ພ້ອມກັນປາບ 10 ພະຍາດທີ່ຍັງຄ້າງຄາຊຳເຮື້ອໃນຖັນແຖວພະນັກງານລັດໃຫ້ໝົດໄປຢ່າງສິ້ນເຊີງເຊັ່ນ: ພະຍາດສໍ້ລາດບັງຫລວງ, ພະຍາດຫລິ້ນກິນຟູມເຟືອຍ, ພະຍາດອາດຍາສິດ, ພະຍາດຂີ້ຄ້ານມັກງ່າຍ, ພະຍາດອວດອົ່ງທະນົງຕົວ, ພະຍາດມັກໃຫຍ່ໃຝ່ສູງ, ພະຍາດຂາດລະບຽບວິໄນ, ພະຍາດແນວຄິດຄັບແຄບ, ພະຍາດແນວຄິດທ້ອງຖິ່ນ ແລະ ພະຍາດລູບແຄ່ງເລຍຂາໃຫ້ໝົດໄປຈາກສັງຄົມລາວບ້ານເມືອງຈຶ່ງຈະມີຄວາມຈະເລີນຮຸ່ງເຮືອງ ແລະ ວັດທະນາຖາວອນໝັ້ນຄົງຍືນຍົງໄວກວ່ານີ້.
ເຖິງຢ່າງໃດກໍດີ, ພວກເຮົາກໍມີຄວາມເຊື່ອໝັ້ນການນຳພາຂອງພັກ ແລະ ລັດຖະບານໃນການບໍລິຫານປົກຄອງບ້ານເມືອງ. ຕະຫລອດ 47 ປີແຫ່ງການປົກປັກຮັກສາ, ສ້າງສາ ແລະ ພັດທະນາປະເທດຊາດບ້ານເມືອງຂອງພວກເຮົາມີຄວາມຈະເລີນຮຸ່ງເຮືອງໄດ້ຄືດັ່ງທຸກວັນນີ້, ຍັງດີກວ່າລະບອບສັກດີນາລາວປົກຄອງບ້ານເມືອງມາຫລາຍຮ້ອຍປີມີແຕ່ແນວຈິບຫາຍ.
