ຜູ້ເສຍຊີວິດຈາກພະຍາດໄຂ້ຍຸງລາຍເພີ່ມຂຶ້ນ 2 ຄົນ ຢູ່ນະຄອນຫລວງວຽງຈັນ ແລະ ແຂວງຄຳມ່ວນ
ອີງຕາມຂໍ້ມູນຂອງສູນຂ່າວສານການແພດສຸຂະສຶກສາ ກະຊວງສາທາລະນະສຸກ ລາຍງານໃຫ້ຮູ້ໃນວັນທີ 2 ກໍລະກົດ 2023 ວ່າ:
ມີຄົນເສຍຊີວິດຈາກພະຍາດໄຂ້ຍຸງລາຍເພີ່ມ ອີກ 2 ຄົນ ຢູ່ບ້ານໂຄກສະອາດ ເມືອງໄຊທານີ ນະຄອນຫລວງວຽງຈັນ ແລະ ຢູ່ບ້ານປາກເບັ່ງ ເມືອງທ່າແຂກ ແຂວງຄຳມ່ວນ ເຮັດໃຫ້ມີຜູ້ເສຍຊີວິດສະສົມ 3 ຄົນ, ຕິດເຊື້ອໃໝ່ 102 ຄົນ, ຕິດເຊື້ອສະສົມ 7,474 ຄົນ ແຂວງທີ່ມີການຕິດເຊື້ອສະສົມຫລາຍກວ່າໝູ່ແມ່ນ ແຂວງອຸດົມໄຊ 1.621 ຄົນ, ຄຳມ່ວນ 1.212 ຄົນ, ໄຊະບູລີ 664 ຄົນ, ສະຫວັນນະເຂດ 565 ຄົນ, ຫລວງພະບາງ 544 ຄົນ, ນະຄອນຫລວງວຽງຈັນ 540 ຄົນ ຕາມລຳດັບ, ສ່ວນ ແຂວງທີ່ບໍ່ຕິດເຊື້ອແມ່ນແຂວງຫົວພັນ.
ສຳລັບອາການຜູ້ເປັນພະຍາດໄຂ້ຍຸງລາຍ ຈະມີໄຂ້ສູງ 2-3 ວັນ, ປວດຫົວ, ປວດກະໂບງຕາ, ປວດກ້າມຊີ້ນ, ປວດຕາມຂໍ່ກະດູກ, ປວດຮາກ, ຜື່ນແດງຕາມຜີວໜັງ, ມີເລືອດຊຶມຕາມເຍື່ອເມືອກ, ຖ້າມີອາການຮຸນແຮງຈະມີອາການຊ໋ອກ, ດັ່ງນັ້ນບໍ່ຄວນປ່ອຍປະໃຫ້ເປັນໄຂ້ດົນແກ່ຍາວຫຼາຍມື້ ແລະ ບໍ່ຄວນຊື້ຢາມາກິນເອງ ຄວນໄປພົບແພດໝໍເພື່ອປິ່ນປົວໃຫ້ທັນເວລາ.
