ບາເຢີນ ມິວນິກ ພ້ອມຂາຍ ຊາດີໂອ ມາເນ ພຽງ 20 ລ້ານເອີໂຣ ແບບຍອມຂາດທຶນ ຫລັງຊື້ມາຈາກ ລິເວີພູລ ລະດູການດຽວເທົ່ານັ້ນ

ບາເຢິນ ມິວນິກ ສະໂມສອນຍັກໃຫຍ່ໃນເສິກ ບຸນເດສລີກາ ເຢຍລະມັນ ຕ້ອງການພຽງ 20 ລ້ານເອີໂຣ ເພື່ອຂາຍ ຊາດິໂອ ມາເນ ກອງໜ້າຄົນດັງຂອງ ເຊເນກາ ອອກໄປຈາກຖິ່ນ ອາລິອັນຊ໌ ອາຣີນາ ໃນຊ່ວງຊຳເມີນີ້ ຕາມການລາຍງານຂອງ ສະກາຍ ເຢຍລະມັນ ໃນ​ວັນ​ອັງຄານ​ທີ 11 ກໍລະກົດ​ນີ້.

ມາເນ່ ຍ້າຍຈາກ ລິເວີພູລ ດ້ວຍຄ່າຕົວ 32 ລ້ານເອີໂຣ ໃນລະດູຮ້ອນປີທີ່ຜ່ານມາ. ແຕ່ເຮັດຜົນງານໄດ້ບໍ່ດີ, ຍິງໄດ້ພຽງ 12 ປະຕູຈາກການລົງຫລິ້ນ 38 ນັດໃນທຸກການແຂ່ງຂັນໃນລະດູການ 2022-23 ທີ່ຜ່ານມາ, ບວກກັບມີເລື່ອງຕີກັນກັບ ລີຣອຍ ຊາເນ ເພື່ອນຮ່ວມທີມອີກດ້ວຍ.

ຫລ້າສຸດ ສະກາຍ ເຢຍລະມັນ ລະບຸວ່າ ບາເຢິນ ເຕັມໃຈຍອມຂາດທຶນ ໂດຍປ່ອຍຕົວດາວຍິງທີມຊາດເຊເນການ ອາຍຸ 31 ປີ ໃນລາຄາພຽງແຕ່ 20 ລ້ານເອີໂຣ ເຖິງວ່ານັກເຕະຈະມີສັນຍາກັບທີມຈົນຮອດທ້າຍເດືອນມິຖຸນາ 2025 ກໍ່ຕາມ.