ຜົນສຳເລັດການເຂົ້າຮ່ວມກອງປະຊຸມສະພາປະຊາຄົມວັດທະນະທຳ-ສັງຄົມອາຊຽນ
ຄະນະຜູ້ແທນເຈົ້າໜ້າທີ່ອາວຸໂສປະຊາຄົມວັດທະນະທຳ-ສັງຄົມອາຊຽນລາວ ນໍາໂດຍທ່ານ ສະຫວັນຄອນ ຣາຊະມົນຕຣີ ຮອງລັດຖະມົນຕີກະຊວງຖະແຫລງຂ່າວ, ວັດທະນາທໍາ ແລະ ທ່ອງທ່ຽວ, ໄດ້ເຂົ້າຮ່ວມກອງປະຊຸມສະພາປະຊາຄົມວັດທະນະທຳ-ສັງຄົມອາຊຽນ (ASCC) ຄັ້ງທີ 18 ທີ່ເມືອງຕາກາຍໄຕ, ປະເທດຟີລິບປິນໃນວັນທີ 13 ກັນຍານີ້, ໂດຍພາຍໃຕ້ການເປັນປະທານຂອງ ທ່ານ ອາກາຍ ເອັມມານູເອລ ເລໂກ AGAY EMMANUEL LEYCO ຮັກສາການລັດຖະມົນຕີກະຊວງສະຫວັດດີການສັງຄົມ ແລະ ການພັດທະນາ ປະເທດຟິລິປິນ, ມີບັນດາລັດຖະມົນຕີ, ຮອງລັດຖະມົນຕີຮັບຜິດຊອບວຽກງານປະຊາຄົມວັດທະນະທຳ-ສັງຄົມອາຊຽນ, ມີຮອງເລຂາ ທິການໃຫຍ່ອາຊຽນ ແລະ ຫົວໜ້າເຈົ້າໜ້າທີ່ອາວຸໂສປະຊາຄົມວັດທະນະທຳ-ສັງຄົມອາຊຽນ (SOCA) ເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້, ມີເປົ້າໝາຍເພື່ອເຄື່ອນໄຫວກິດຈະກຳຕ່າງໆຮັບໃຊ້ການ ສະເຫລີມສະຫລອງວັນສ້າງຕັ້ງອາຊຽນຄົບຮອບ 50, ສືບຕໍ່ພິຈາລະນາເອກະສານເອກະສານສຳຄັນຕ່າງໆ ເພື່ອນຳໄປສະເໜີຕໍ່ກອງປະຊຸມສຸດຍອດອາຊຽນ ຄັ້ງທີ 31 ຊຶ່ງຈະຈັດຂຶ້ນໃນເດືອນພະຈິກ 2017 ນີ້ ທີ່ປະເທດຟີລິບປິນ, ພ້ອມນີ້, ກອງປະຊຸມຍັງໄດ້ຮັບຟັງການລາຍງານຜົນການປຶກສາຫາລືຂອງກອງປະຊຸມເຈົ້າໜ້າທີ່ອາວຸໂສວັດທະນະທຳ-ສັງຄົມອາຊຽນ (SOCA) ຄັ້ງທີ 23 ທີ່ໄດ້ຈັດຂຶ້ນໃນວັນທີ 11-12 ກັນຍາ 2017, ໂດຍສະເພາະແມ່ນຄວາມຄືບໜ້າໃນການຈັດຕັ້ງປະຕິບັດບັນດາກິດຈະກຳຕ່າງໆ ພາຍໃຕ້ແຜນແມ່ບົດຂອງປະຊາຄົມວັດທະນະທຳ-ສັງຄົມອາຊຽນ 2025 ແລະ ວິໄສທັດອາຊຽນ 2025, ລວມທັງການສະເໜີວິທີການປັບປຸງຮູບແບບການຕິດຕາມ ແລະ ປະເມີນຜົນການຈັດຕັ້ງປະຕິບັດແຜນງານປະຊາຄົມວັດທະນະທຳ-ສັງຄົມ 2025 (ASCC Blue Print 2025).
ໃນໂອກາດນີ້, ທ່ານ ສະຫວັນຄອນ ລາຊະມຸນຕີ ໄດ້ຍົກໃຫ້ເຫັນບາງໜ້າວຽກທີ່ສຳຄັນໃນການປະກອບສ່ວນປະຕິບັດພາລະບົດບາດໃນການຈັດຕັ້ງປະຕິບັດ ວຽກງານດັ່ງກ່າວຂອງ ສປປ ລາວ ເຊັ່ນ: ໄດ້ເປັນເຈົ້າພາບຈັດກອງປະຊຸມຄະນະກຳມະກຳຄຸ້ມຄອງໄພພິບັດ (ACDM) ຄັ້ງທີ 30, ກອງປະຊຸມ Governing Board of the AHA Center ຄັ້ງທີ 6, ກອງປະຊຸມໜ່ວຍສະເພາະກິດຄັ້ງທີ 7 ຂອງ Promote Synergy with other relevant ASEAN bodies on HARD and Open Session on AADMER Partnership ໃນເດືອນມີນາທີ່ຜ່ານມາ ແລະ ໃນມໍ່ໆນີ້, ສປປ ລາວ ກໍຈະໄດ້ຮັບກຽດຈັດກອງປະຊຸມ Parties to the Agreement on Disaster Management and Emergency Responses (AADMER) ຄັ້ງທີ 6, ກອງປະຊຸມຄະນະກໍາມະການຄຸ້ມຄອງໄພພິບັດ (ACDM) ຄັ້ງທີ 31 ແລະ ກອງປະຊຸມລັດຖະມົນຕີຄຸ້ມຄອງໄພພິບັດ (AMMDM) ຄັ້ງທີ 5, ໃນລະຫວ່າງວັນທີ 17-19 ຕຸລາ 2017 ທີ່ເມືອງມໍລະດົກໂລກຫລວງພະບາງ ແລະ ໃນປີ 2018 ເປັນປີແຫ່ງການທ່ອງທ່ຽວລາວ (Visit Laos Year 2018) ແລະ ຈະເປັນໂອກາດໃຫ້ຜູ້ແທນບັນດາປະເທດສະມາຊິກອາຊຽນໄດ້ເຂົ້າມາທ່ຽວຊົມແຫລ່ງທ່ອງທ່ຽວຕ່າງໆຂອງລາວອີກດ້ວຍ.
