ລາວ – ມົງໂກລີ ສະຫລອງວັນສ້າງຕັ້ງສາຍພົວພັນການທູດ ຄົບຮອບ 55 ປີ ທີ່ ນະຄອນຫລວງ ອູ​ລານ​ບາ​ຕໍ

- laos mongolia - ລາວ – ມົງໂກລີ ສະຫລອງວັນສ້າງຕັ້ງສາຍພົວພັນການທູດ ຄົບຮອບ 55 ປີ ທີ່ ນະຄອນຫລວງ ອູ​ລານ​ບາ​ຕໍ
- AGL banner - ລາວ – ມົງໂກລີ ສະຫລອງວັນສ້າງຕັ້ງສາຍພົວພັນການທູດ ຄົບຮອບ 55 ປີ ທີ່ ນະຄອນຫລວງ ອູ​ລານ​ບາ​ຕໍ

ໃນ​ຕອນ​ຄໍ່າຂອງ​ວັນ​ທີ 15 ກັນຍາຜ່ານມາ, ສະຖານເອກອັກຄະລັດຖະທູດ ແຫ່ງ ສປປ ລາວ ປະຈຳ ມົງໂກລີ ​ໄດ້​ຈັດ​ງານ​ລ້ຽງ ເພື່ອສະເຫລີມສະຫລອງ ວັນຄົບຮອບ 55 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ມົງໂກລີ (12 ກັນຍາ 1962 – 12 ກັນຍາ 2017), ​ທີ່​ຫ້ອງຈັດງານລ້ຽງ ຂອງກະຊວງການຕ່າງປະເທດ ມົງໂກລີ.

ໃນການກ່າວຄໍາເຫັນຕໍ່ງານລ້ຽງດັ່ງກ່າວ, ທ່ານ ສີອາລຸນກອນ ແສງອຸທອນ, ເອກອັກຄະລັດຖະທູດ  ສປປ ລາວ ປະຈຳ ມົງໂກລີ ​ໄດ້​ຢ້ຳ​ໃຫ້​ເຫັນເຖິງຄວາມໝາຍ ແລະ ຄວາມສໍາຄັນຂອງການ​ພົວພັນ​ທີ່​ມີ​ມູນ​ເຊື້ອອັນ​ດີ​ງາມ ລະຫວ່າງ ສອງ​ປະ​ເທດ ກໍ່ຄືປະຊາຊົນສອງຊາດ ລາວ ​ແລະ ມົງ​ໂກ​ລີ ທີ່ມີມາແຕ່ດົນນານ, ຄວາມເຂົ້າອົກເຂົ້າໃຈກັນ ແລະ ການສືບຕໍ່ຮັກສາໄດ້ການພົວພັນມິດຕະພາບຢ່າງເປັນປົກກະຕິ, ໂດຍ​ລັດຖະບານສອງປະເທດ ລາວ ແລະ ມົງໂກລີ ໄດ້ເຊັນສັນຍາ ສ້າງຕັ້ງສາຍພົວພັນການທູດນຳກັນ ໃນວັນທີ 12 ກັນຍາ 1962, ອັນໄດ້ກາຍເປັນຂີດໝາຍອັນສຳຄັນ ທາງດ້ານປະຫວັດສາດແຫ່ງການພົວພັນ ລະຫວ່າງສອງປະເທດ ລາວ – ມົງໂກລີ, ມົງໂກລີ – ລາວ ແລະ ນັບແຕ່ນັ້ນເປັນຕົ້ນມາ ການພົວພັນລະຫວ່າງສອງປະເທດ ໄດ້ຮັບການເສີມຂະຫຍາຍ ແລະ ຮັດແໜ້ນຍິ່ງຂຶ້ນ, ຊຶ່ງໃນນີ້ ມົງໂກລີ ໄດ້ເປີດສຳນັກງານສະຖານທູດຂອງຕົນ ຢູ່ ນະຄອນຫລວງວຽງຈັນ ໃນປີ 1976 ແລະ ສປປ ລາວ ໄດ້ເປີດສຳນັກງານສະຖານທູດຂອງຕົນ ຢູ່ ນະຄອນຫລວງອູລານບາຕໍ ໃນປີ 1981.  ນອກນັ້ນ, ທັງສອງຝ່າຍກໍໄດ້ມີການແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງຄະນະຜູ້ແທນທຸກໆຂະແໜງການໃນທຸກລະດັບຢ່າງເປັນປົກກະຕິ, ລວມເຖິງການແລກປ່ຽນການຢ້ຽມຢາມຂອງປະມຸກລັດ, ຫົວໜ້າລັດຖະບານ, ປະທານສະພາ ແລະ ບັນດາລັດຖະມົນຕີ, ລວມທັງລະດັບວິຊາການ ຂອງຂະແໜງການຕ່າງໆ. ທັງສອງຝ່າຍຍັງໄດ້ສ້າງຕັ້ງສະມາຄົມມິດຕະພາບ ແລະ ຄະນະກຳມາທິການຮ່ວມ ວ່າດ້ວຍການຮ່ວມມື ທາງດ້ານເສດຖະກິດ, ການຄ້າ, ວິທະຍາສາດ ແລະ ເຕັກໂນໂລຊີ ລາວ – ມົງໂກລີ ເພື່ອນໍາໃຊ້ເປັນເວທີ ປຶກສາຫາລື ແລະ ສົ່ງເສີມການຮ່ວມມື ນຳກັນ.

ໃນໄລຍະຜ່ານມາ, ລັດຖະບານ ມົງໂກລີ ໄດ້ໃຫ້ການຊ່ວຍເຫຼືອໃນການສ້າງໂຮງໝໍມິດຕະພາບ ມົງໂກລີ – ລາວ ຢູ່ແຂວງຊຽງຂວາງ ໃນຊຸມປີ 80 ຊຶ່ງໄດ້ກາຍເປັນສັນຍາລັກ ແຫ່ງການພົວພັນຮ່ວມມື ທີ່ເປັນມູນເຊື້ອ ລະຫວ່າງ ສອງປະເທດ, ຊຶ່ງໃນປະຈຸບັນ ໂຮງໝໍດັ່ງກ່າວກໍຍັງສືບຕໍ່ໃຫ້ການບໍລິການຮັບໃຊ້ ຢ່າງມີປະສິດທິຜົນ. ນອກຈາກນັ້ນກໍໄດ້ໃຫ້ການຊ່ວຍເຫລືອດ້ານທຶນຮອນ ແລະ ຊ່ຽວຊານແກ່ ສປປ ລາວ ໃນຫລາຍດ້ານ ເປັນຕົ້ນ: ການລ້ຽງສັດ, ສາທາລະນະສຸກ, ການສຶກສາ ແລະ ດ້ານອື່ນໆ. ໃນປັດຈຸບັນ, ສອງປະເທດໄດ້ມີບົດບັນທຶກຄວາມເຂົ້້າໃຈຮ່ວມກັນໃນຫລາຍ ຂະແຫນງການ, ນັບທັງລະດັບສູນກາງ ແລະ ທ້ອງຖິ່ນ, ຊຶ່ງຢູ່ໃນລະດັບສູນກາງລວມມີ: ດ້ານການສຶກສາ, ສາທາລະນະສຸກ, ກະສິກຳ, ລ້ຽງສັດ, ການຄ້າ, ການລົງທຶນ, ທ່ອງທ່ຽວ ແລະ ອື່ນໆ ທີ່ທັງສອງຝ່າຍມີຄວາມສົນໃຈ. ສ່ວນໃນລະດັບທ້ອງຖິ່ນ ແມ່ນມີບົດບັນທຶກການຮ່ວມມື ລະຫວ່າງ 4 ແຂວງແຮກສ່ຽວ ຂອງສອງປະເທດ, ຝ່າຍລາວມີ: ແຂວງໄຊຍະບູລີ, ຈຳປາສັກ, ເຊກອງ ແລະ ອັດຕະປື, ຝ່າຍມົງໂກລີມີ: ແຂວງທຶບ, ດາຣຄານໂອນ, ອາຣຄັງກາຍ ແລະ ເຊເລັງເກ.

ຂະແໜງການທີ່ພົ້ນເດັ່ນກວ່າໝູ່ ໃນການຮ່ວມມືລະຫວ່າງສອງປະເທດ ແມ່ນດ້ານການສຶກສາ ແລະ ສາທາລະນະສຸກ. ໃນຂອບເຂດການຮ່ວມມື ລະຫວ່າງ ຂະແໜງການສຶກສາ ຂອງສອງປະເທດ, ສປປ ລາວ ແລະ ມົງໂກລີ ຍັງມີສັນຍາ ເຊັນຮ່ວມກັນ ວ່າດ້ວຍ ການແລກປ່ຽນນັກສຶກສາ ປະລິນຍາຕຼີ ລະຫວ່າງ ສອງປະເທດພວກເຮົາ ທີ່ໄດ້ເລີ້ມຈັດຕັ້ງປະຕິບັດ ແຕ່ປີ 2007 ເປັນຕົ້ນມາ ຈົນເຖິງປະຈຸບັນ.

- Wave100S AD to Website 2020 0 - ລາວ – ມົງໂກລີ ສະຫລອງວັນສ້າງຕັ້ງສາຍພົວພັນການທູດ ຄົບຮອບ 55 ປີ ທີ່ ນະຄອນຫລວງ ອູ​ລານ​ບາ​ຕໍ

ໃນໂອກາດດັ່ງກ່າວນີ້, ​ທ່ານ ນາງ ອາ. ຊອກເຊເຊັກ (Prof. Dr. A. Tsogtestseg), ຮັກສາການ ລັດຖະມົນຕີ ກະຊວງສາທາລະນະສຸກ ມົງໂກລີ, ທັງຮັກສາການປະທານຄະນະກຳມາທິການຮ່ວມ (JC) ມົງໂກລີ – ລາວ, ກໍໄດ້ໃຫ້​ກຽດຂຶ້ນ​ກ່າວ​ຄຳ​ເຫັນ ​ແລະ ອວຍພອນ​ໃນ​ງານ​ສະ​ເຫລີ​ມສະຫລອງຄັ້ງ​ນີ້, ໂດຍ​ໄດ້​ຢ້ຳ​ໃຫ້​ເຫັນ​ການ​ພົວພັນທີ່​ມີ​ມູນ​ເຊື້ອອັນ​ດີ​ງາມ ແລະ ຍາວນານ ລະຫວ່າງສອງ​ປະ​ເທດ ມົງ​ໂກ​ລີ – ລາວ ຕະຫລອດໄລຍະຜ່ານມາ ແລະ ໃຫ້ການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ກໍ່ຄືໃນກອບ ຂອງການຮ່ວມມືຫລາຍຝ່າຍ, ໄດ້ສະແດງຄວາມຊົມເຊີຍ ຕໍ່ລັດຖະບານ ສປປ ລາວ ທີ່ໄດ້ມີຄວາມເດັດດ່ຽວ ໃຫ້ການສະໜັບສະໜູນຕໍ່ຂໍ້ລິເລີ້ມໃນການສ້າງຄັງປັນຍາສາກົນ ສຳລັບບັນດາປະເທດກຳລັງພັດທະນາ ທີ່ບໍ່ມີຊາຍແດນຕິດກັບທະເລ (International Think Tank for LLDCs).

ພ້ອມກັນນັ້ນ, ສະຖານທູດ ຍັງ​ໄດ້ນຳສະເໜີຮູ​ບພາບການເຄື່ອນໄຫວແລກປ່ຽນການຢ້ຽມຢາມ ເຊິ່ງກັນ ແລະກັນ ລະຫວ່າງ ການນຳຂອງສອງປະເທດ, ສປປ ລາວ ແລະ ມົງໂກລີ ​ໃນໄລຍະຜ່ານມາ ແລະ ໄດ້ສາຍວີ​ດີ​ໂອ ກ່ຽວ​ກັບບັນດາໝາກຜົນດ້ານຕ່າງໆ ໃນ​ກາ​ນສ້າງສາ​ ແລະ ພັດທະ​ນາ​ປະ​ເທດ​ຊາດ, ຮີດຄອງປະເພນີ ​ແລະ ວັດທະນະທຳ ຂອງປະຊາຊົນລາວບັນດາເຜົ່າ, ແຫຼ່ງທ່ອງທ່ຽວ ແລະ ສະຖານທີ່ທີ່ສຳຄັນ ທາງດ້ານປະຫວັດສາດ ຂອງ ສປປ ລາວ ອີກດ້ວຍ. ງານລ້ຽງສະຫຼອງໃນຄັ້ງນີ້ ໄດ້ດຳເນີນໄປດ້ວຍບັນຍາກາດ ເບີກບານມ່ວນຊື່ນ ແລະ ປະສົບຜົນສຳເລັດອັນງົດງາມ.

-    AD conten website - ລາວ – ມົງໂກລີ ສະຫລອງວັນສ້າງຕັ້ງສາຍພົວພັນການທູດ ຄົບຮອບ 55 ປີ ທີ່ ນະຄອນຫລວງ ອູ​ລານ​ບາ​ຕໍ
- lattana banner 1 - ລາວ – ມົງໂກລີ ສະຫລອງວັນສ້າງຕັ້ງສາຍພົວພັນການທູດ ຄົບຮອບ 55 ປີ ທີ່ ນະຄອນຫລວງ ອູ​ລານ​ບາ​ຕໍ
- lattana banner - ລາວ – ມົງໂກລີ ສະຫລອງວັນສ້າງຕັ້ງສາຍພົວພັນການທູດ ຄົບຮອບ 55 ປີ ທີ່ ນະຄອນຫລວງ ອູ​ລານ​ບາ​ຕໍ
error: Alert: ເນື້ອຫາຂ່າວມີລິຂະສິດ !!