4 ປະເທດຍັງຜະລິດຫົວຮົວນິວເຄຼຍເພີ່ມ
ກຸ່ມກວດສອບອາວຸດແຫ່ງຊູແອດເຜີຍ ຈຳນວນຫົວຮົບນິວເຄຼຍທົ່ວໂລກຫຼຸດລົງໃນປີຜ່ານມາ, ແຕ່ຍັງມີ 4 ປະເທດຍັງເດີນໜ້າຂະຫຍາຍຈຳນວນການຜະລິດ ປະກອບມີຈີນ, ອິນເດຍ, ສປປ ເກົາຫຼີ ແລະ ປາກິດສະຖານ.
ສຳນັກຂ່າວ AP ລາຍງານຈາກນະຄອນຫຼວງສະຕອກໂຮມ ປະເທດຊູແອດ ໃນວັນທີ 21 ກັນຍາວ່າ: ສະຖາບັນວິໄຈສັນຕິພາບສາກົນ ສະຕອກໂຮມ ຫຼື SIPRI ກ່າວວ່າ: ການພັດທະນາໂຄງການນິວເຄຼຍຂອງ ສປປ ເກົາຫຼີ ເຮັດໃຫ້ເກີດຄວາມບໍ່ໝັ້ນຄົງທາງການເມືອງລະຫວ່າງປະເທດ ແລະ ສົ່ງຜົນກະທົບຮ້າຍແຮງເປັນຕ່ອງໂສ້.
ໄລ່ມາຮອດເດືອນມັງກອນ 2017 ອາເມລິກາ, ຣັດເຊຍ, ອັງກິດ, ຝຣັ່ງ, ຈີນ, ອິນເດຍ, ປາກິດສະຖານ, ອິດສະລາແອນ ແລະ ສປປ ເກົາຫຼີ ລວມກັນມີຫົວຮົບນິວເຄຼຍປະມານ 14.935 ລູກ ຫຼຸດລົງຈາກ 15.395 ລູກໃນປີກ່ອນໜ້າ.
ແຕ່ຍັງມີ 4 ປະເທດ ທີ່ກຳລັງຂະຫຍາຍຈຳນວນຫົວຮົບນິວເຄຼຍໃນຄອບຄອງ ປະກອບມີຈີນ, ອິນເດຍ, ສປປ ເກົາຫຼີ ແລະ ປາກິດສະຖານ.
ທ່ານ ແຊນນອນ ໄຄລ ຫົວໜ້າໂຄງການອາວຸດນິວເຄຼຍຂອງ SIPRI ກ່າວວ່າ: ບາດກ້າວຫຼ້າສຸດໃນການປົດອາວຸດນິວເຄຼຍຖືວ່າເພິ່ງພໍໃຈ, 122 ປະເທດອະນຸມັດສົນທິສັນຍາຫ້າມອາວຸດນິວເຄຼຍ ທີ່ອົງການສະຫະປະຊາຊາດ ໃນເດືອນກໍລະກົດ 2017 ເຊິ່ງຈະເປັນບາດກ້າວສຳຄັນໄປສູ່ການປົດອາວຸດນິວເຄຼຍໃນໄລຍະຍາວ.
ສ່ວນບັນຫາຄວາມໝັ້ນຄົງຂອງໂລກ ມີການພັດທະນາໃນທາງບວກເຊັ່ນກັນເຊັ່ນ: ການມີຜົນບັງຄັບໃຊ້ຂອງຂໍ້ຕົກລົງຫຼຸດໂລກຮ້ອນ ປາຣີ 2015 ລວມທັງການປະຕິບັດຕາມຂໍ້ຕົກລົງນິວເຄຼຍຂອງອີຣານ ແລະ ມະຕິຂອງສະມັດຊາໃຫຍ່ອົງການສະຫະປະຊາຊາດ (UNGA) ທີ່ໃຫ້ເລີ່ມການເຈລະຈາໃນປີ 2017 ເພື່ອກຳຈັດອາວຸດນິວເຄຼຍໃຫ້ໝົດໄປຈາກໂລກ.
ເຖິງຢ່າງໃດກໍຕາມ, ຍັງມີໜຶ່ງບັນຫາທີ່ເປັນສິ່ງທ້າທາຍສຳຄັນຕໍ່ຄວາມໝັ້ນຄົງຂອງມະນຸດ ນັ້ນຄືການພັດຖິ່ນໂດຍຖືກບັງຄັບ ໂດຍໃນປັດຈຸບັນ ອາຟຣິກາ ແລະ ຕາເວັນອອກກາງລວມກັນ ຮອງຮັບປະຊາຊົນພັດຖິ່ນກວ່າ 2 ໃນ 3 ຂອງທົ່ວໂລກ ແລະ ຈຳນວນປະຊາຊົນພັດຖິ່ນໃນປີຜ່ານມາ “ສູງຂຶ້ນຢ່າງຈະແຈ້ງ” ກວ່າ 60 ລ້ານຄົນ.
