ກົມຄຸ້ມຄອງເງິນຕາຕ່າງປະເທດ ແຈ້ງໃຫ້ວິສາຫະກິດ ທີ່ເຮັດການນຳເຂົ້າ-ສົ່ງອອກ ຢູ່ລາວ ໄປລົງທະບຽນເປີດບັນຊີຜູ້ນຳເຂົ້າ-ສົ່ງອອກ
ກົມຄຸ້ມຄອງເງິນຕາຕ່າງປະເທດ ທະນາຄານ ແຫ່ງ ສປປ ລາວ ໄດ້ອອກແຈ້ງການໃຫ້ວິສາຫະກິດທີ່ເຮັດການນຳເຂົ້າ-ສົ່ງອອກ ຢູ່ ສປປ ລາວ ຮີບຮ້ອນໄປລົງທະບຽນນຳກົມການ ນຳເຂົ້າ ແລະ ສົ່ງອອກ, ກະຊວງອຸດສາຫະກຳແລະການຄ້າ ທີ່ໄດ້ເລີ່ມປະຕິບັດແຕ່ເດືອນ ກໍລະກົດ 2023 ເປັນຕົ້ນມາ.
ສຳລັບ ການລົງທະບຽນທ່ານສາມາດຕື່ມໃສ່ແບບພິມ ທີ່ ສົ່ງຜ່ານທາງອີແມວນີ້: imexdiv@laomoic.org ຫລື ຕິດຕໍ່ພະນັກງານຜູ້ຮັບຜິດຊອບໂດຍກົງເບີໂທລະສັບ: 020 96996565.
ພາຍຫລັງສຳເລັດການລົງທະບຽນແລ້ວ, ໃຫ້ນຳເອົາໃບຢັ້ງຢືນການລົງທະບຽນມາແຈ້ງ ຕໍ່ກົມຄຸ້ມຄອງເງິນຕາຕ່າງປະເທດ, ທະນາຄານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ(ທຫລ) ເພື່ອເປີດບັນຊີກ່ຽວກັບການນຳເຂົ້າ-ສົ່ງອອກ ເພື່ອຊຳລະ ແລະ ຮັບຊຳລະກັບຕ່າງປະເທດນຳທະນາຄານທຸລະກິດໃດໜຶ່ງ ຢູ່ ສປປ ລາວ ຕາມລະບຽບການກ່ຽວຂ້ອງ, ເຊິ່ງ ສາມາດຕິດຕໍ່ພະແນກຄຸ້ມຄອງເງິນຕາດ້ານການຄ້າລະຫວ່າງປະເທດ, ກົມຄຸ້ມຄອງເງິນຕາຕ່າງປະເທດ ເບີໂທ: 030 5379078.
ໃນກໍລະນີວິສາຫະກິດໃດທີ່ບໍ່ໄດ້ລົງທະບຽນນຳກົມການນຳເຂົ້າ ແລະ ການສົ່ງອອກ ແລະ ເປີດບັນຊີສະເພາະກ່ຽວກັບຜູ້ສົ່ງອອກ-ນຳເຂົ້າ ນຳທະນາຄານທຸລະກິດ ຢູ່ ສປປລາວ ແມ່ນຈະບໍ່ສາມາດດຳເນີນການສົ່ງອອກ-ນຳເຂົ້າຕາມລະບຽບການ.
