ຜົນກອງປະຊຸມຄົບຄະນະບໍລິຫານງານສູນກາງພັກຄັ້ງທີ 5 ສະໄໝທີ X

- Meeting - ຜົນກອງປະຊຸມຄົບຄະນະບໍລິຫານງານສູນກາງພັກຄັ້ງທີ 5 ສະໄໝທີ X
- Untitled design - ຜົນກອງປະຊຸມຄົບຄະນະບໍລິຫານງານສູນກາງພັກຄັ້ງທີ 5 ສະໄໝທີ X

ກອງປະຊຸມຄົບຄະນະບໍລິຫານງານສູນກາງພັກປະຊາຊົນປະຕິວັດລາວ ຄັ້ງທີ 5 ສະໄໝທີ X ໄດ້ສຳເລັດລົງໃນວັນທີ 21 ກັນຍານີ້ ພາຍຫລັງດຳເນີນມາເປັນເວລາ 10 ວັນ ທີ່ຫ້ອງວ່າການສູນກາງພັກ, ພາຍໃຕ້ການເປັນປະທານຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ບຸນຍັງ ວໍລະຈິດ. ກອງປະຊຸມໄດ້ຕີລາຄາຄືນການຈັດຕັ້ງປະຕິບັດມະຕິກອງປະຊຸມສູນກາງຄັ້ງທີ 4 ສະໄໝທີ X, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາປະຈຳປີ 2017 ແລະ ທິດທາງປີ 2018, ການຈັດຕັ້ງຜັນຂະຫຍາຍວຽກງານປ້ອງກັນຊາດ-ປ້ອງກັນຄວາມສະຫງົບ, ສະພາບການ ເຄື່ອນໄຫວນຳພາວຽກງານແນວຄິດ-ວັດທະນະທຳ ແລະ ສັງຄົມ. ກອງປະຊຸມໄດ້ຕີລາຄາວ່າ: ນັບແຕ່ກອງປະຊຸມສູນກາງຄັ້ງທີ 4 ມານີ້, ສະພາບການສາກົນ ແລະ ພາກພື້ນມີຫລາຍເຫດການເກີດຂຶ້ນ ແລະ ຜັນແປຢ່າງສັບສົນ ໄດ້ສົ່ງຜົນສະທ້ອນທາງກົງ ແລະ ທາງອ້ອມຕໍ່ປະເທດເຮົາ, ສະພາບການໃນບາງດ້ານຢູ່ພາຍໃນປະເທດເຊັ່ນ: ຄວາມຫຍຸ້ງຍາກດ້ານການເງິນ-ງົບປະມານ, ບັນຫາອາຊະຍາກຳ, ປາກົດການຫຍໍ້ທໍ້, ໄພທຳມະຊາດ ໄດ້ກາຍເປັນສິ່ງທ້າທາຍຕໍ່ການຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ແຕ່ດ້ວຍຄວາມຮັບຜິດຊອບການເມືອງຂອງຄະນະພັກ, ອົງການປົກຄອງແຕ່ລະຂັ້ນ ແລະ ດ້ວຍຄວາມບຸກບືນສູ້ຊົນຂອງພະນັກງານ, ສະມາຊິກພັກ ແລະ ປະຊາ

ຊົນລາວບັນດາເຜົ່າ ເຮັດໃຫ້ບັນດາເນື້ອໃນທີ່ໄດ້ຮັບຮອງໃນກອງປະຊຸມສູນກາງພັກຄັ້ງທີ 4 ສະໄໝທີ X ໄດ້ຮັບການຈັດຕັ້ງປະຕິບັດດີສົມຄວນ, ບັນດາຄາດໝາຍດ້ານຕ່າງໆ ສ່ວນຫລາຍປະຕິບັດໄດ້ຕາມແຜນ, ປະເທດຊາດສືບຕໍ່ມີສະຖຽນລະພາບທາງດ້ານການເມືອງໜັກແໜ້ນ, ຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມຍັງຮັບປະກັນໄດ້ໂດຍພື້ນຖານ, ເສດຖະກິດ-ສັງຄົມມີການຂະຫຍາຍຕົວຢ່າງຕໍ່ເນື່ອງ ລວມຍອດຜະລິດຕະພັນພາຍໃນ (GDP) ຂະຫຍາຍຕົວໃນລະດັບ 6,83%, ອັດຕາເງິນເຟີ້ ແລະ ປະລິມານເງິນ M2 ເພີ່ມຂຶ້ນໃນລະດັບເໝາະສົມ, ມູນຄ່າການຄ້ານຳເຂົ້າ ແລະ ສົ່ງອອກປະຕິບັດໄດ້ 4.715 ລ້ານໂດລາສະຫະລັດ, ການແກ້ໄຂໜີ້ສິນໂດຍລວມແມ່ນໄປຕາມແຜນການວາງໄວ້. ການພັດທະນາດ້ານສັງຄົມ-ວັດທະນະທຳສືບຕໍ່ເປັນຂະບວນການ ໂດຍສະເພາະການຍົກລະດັບຄຸນນະພາບການສຶກສາ, ສາມາດປ້ອງກັນ ແລະ ແກ້ໄຂພະຍາດຕາມລະດູການບໍ່ໃຫ້ມີການລະບາດຮ້າຍແຮງ, ໄດ້ເອົາໃຈໃສ່ສ້າງ ແລະ ພັດທະນາສີມືແຮງງານໃຫ້ດີຂຶ້ນ, ເພີ່ມທະວີການຊຸກຍູ້ສົ່ງເສີມການທ່ອງທ່ຽວຕິດພັນກັບການສ້າງຄວາມພ້ອມໃຫ້ແກ່ການເປີດປີທ່ອງທ່ຽວລາວ 2018, ສ່ວນການແກ້ໄຂຄວາມທຸກຍາກຂອງປະຊາຊົນກໍມີຄວາມຄືບໜ້າ, ສືບຕໍ່ປັບປຸງພາລະບົດບາດຂອງອົງການຈຳນວນໜຶ່ງໃຫ້ຈະແຈ້ງກວ່າເກົ່າຕາມທິດກະທັດຮັດ, ເຂັ້ມແຂງ, ໂປ່ງໃສ ແລະ ມີປະສິດທິພາບ. ວຽກງານແນວລາວສ້າງຊາດ ແລະ ບັນດາອົງການຈັດຕັ້ງມະຫາຊົນ ໄດ້ປະກອບສ່ວນຢ່າງຕັ້ງໜ້າໃນການຕິດຕາມ, ກວດກາການແກ້ໄຂບັນຫາເຄັ່ງຮ້ອນ, ກຳສະພາບແນວຄິດ, ຄວາມມຸ້ງມາດປາຖະໜາ, ຄວາມຂັດຂ້ອງໝອງໃຈຂອງປະຊາຊົນ, ຊັ້ນຄົນຕ່າງໆເພື່ອນຳສະເໜີພາກສ່ວນກ່ຽວຂ້ອງແກ້ໄຂ. ໃນຂົງເຂດວຽກງານຕ່າງປະເທດ ໄດ້ມີການຜັນຂະຫຍາຍບັນດາຂໍ້ຕົກລົງຂອງຂອບການຮ່ວມມືສອງຝ່າຍ ແລະ ຫລາຍຝ່າຍ, ສືບຕໍ່ເສີມຂະຫຍາຍບົດບາດອັນຕັ້ງໜ້າຂອງຕົນໃນປະຊາຄົມອາຊຽນ, ເຂົ້າຮ່ວມໃນນະໂຍບາຍໜຶ່ງແລວທາງໜຶ່ງເສັ້ນທາງ ເພື່ອກາຍເປັນໜຶ່ງໃນຕົວເຊື່ອມຫລາຍດ້ານລະຫວ່າງ ອາຊຽນ-ຈີນ, ຈີນ-ອາຊຽນ, ການພົວພັນຮ່ວມມືກັບບັນດາປະເທດເພື່ອນມິດຍຸດທະສາດກໍໄດ້ຮັບການເພີ່ມທະວີຂຶ້ນເລື້ອຍໆ. ພ້ອມນັ້ນ, ກອງປະຊຸມຍັງໄດ້ຕີລາຄາຜົນການຈັດຕັ້ງດຳເນີນຊີວິດການເມືອງປັບປຸງປົວແປງທົ່ວພັກຜ່ານມາ, ເຫັນວ່າມີການດຳເນີນໄປຢ່າງຖືກຕ້ອງສອດຄ່ອງກັບຫລັກການຂອງພັກ ແລະ ເປັນພື້ນຖານສຳຄັນໃຫ້ແກ່ການສືບຕໍ່ປັບປຸງກໍ່ສ້າງພັກ ເພື່ອຍົກສູງບົດບາດນຳພາ ແລະ ຄວາມເປັນແບບຢ່າງນຳໜ້າຂອງພັກເຮົາສູງເດັ່ນຂຶ້ນ. ກອງປະຊຸມຄັ້ງນີ້ໄດ້ຮັບຮອງເອົາທິດທາງ, ຄາດໝາຍສູ້ຊົນ ແລະ ວຽກງານຈຸດສຸມໃນຕໍ່ໜ້າຄື: ຮັບປະກັນໃຫ້ປະເທດຊາດມີສະຖຽນລະພາບທາງການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ຮັບປະກັນສະຖຽນລະພາບເສດຖະກິດມະຫາພາກ, ສູ້ຊົນໃຫ້ລວມຍອດມູນຄ່າຜະລິດຕະພັນພາຍໃນ (GDP) ເພີ່ມຂຶ້ນໃນລະດັບ 7%, ລາຍໄດ້ຕໍ່ຫົວຄົນບັນລຸ 2.029 ໂດລາສະຫະລັດ, ແກ້ໄຂບັນຫາການເງິນ-ງົບປະມານ ແລະ ບັນຫາໜີ້ສິນຕ່າງໆ ໂດຍຊອກຫາທຸກວິທີທາງເພື່ອຢັບຢັ້ງການເພີ່ມຂຶ້ນຂອງໜີ້ສາທາລະນະ, ແກ້ໄຂຄວາມຫຍຸ້ງຍາກໃນພາກທຸລະກິດ, ເພີ່ມທະວີການສ້າງແຫລ່ງລາຍຮັບໃໝ່ ແລະ ຂຸດຄົ້ນ, ຄຸ້ມຄອງທຸກແຫລ່ງລາຍຮັບຢ່າງຮັດກຸມ, ເຂັ້ມງວດ ແລະ ມີປະສິດທິພາບ, ເອົາໃຈໃສ່ຜັນຂະຫຍາຍຜົນສຳເລັດຂອງບັ້ນດຳເນີນຊີວິດການເມືອງປັບປຸງປົວແປງທົ່ວພັກຕິດພັນກັບການແກ້ໄຂບັນຫາຫຍໍ້ທໍ້, ການເຊື່ອມຖອຍຢູ່ພາຍໃນພັກໃຫ້ມີຄວາມເດັດຂາດ, ເຂັ້ມງວດ, ອັນສຳຄັນຄະນະພັກ, ອົງການປົກຄອງ, ສະມາຊິກພັກ, ພະນັກງານແຕ່ຂັ້ນເທິງຫາລຸ່ມຕ້ອງຮັກສາ ແລະ ເຊີດຊູຄວາມເປັນແບບຢ່າງເພື່ອສ້າງຄວາມເຊື່ອໝັ້ນ ແລະ ກຳລັງແຮງຂັບເຄື່ອນທຸກການຫັນປ່ຽນໄປສູ່ອັນໃໝ່ທີ່ຕັ້ງໜ້າ, ກະກຽມໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນ ໂດຍຖືເປັນໂອກາດຍູ້ແຮງຂະບວນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກເຂົ້າສູ່ ລວງເລິກ ແລະ ບັນລຸໝາກຜົນຕົວຈິງ, ເຊີດຊູ ແລະ ເສີມຂະຫຍາຍຈິດໃຈຊາດ, ເອກະລາດ, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ ສົມທົບການຂຸດຄົ້ນກຳລັງແຮງພາຍໃນ ແລະ ກຳລັງແຮງສັງລວມຂອງຍຸກສະໄໝເຂົ້າໃນການປົກປັກຮັກສາ ແລະ ພັດທະນາສ້າງສາປະເທດຊາດ. ຄະນະບໍລິຫານງານສູນກາງພັກຮຽກຮ້ອງມາຍັງຄະນະພັກ, ອົງການປົກຄອງແຕ່ລະຂັ້ນ, ສະມາຊິກພັກ, ພະນັກງານ ແລະ ປະຊາຊົນລາວບັນດາເຜົ່າ ຈົ່ງໄດ້ເຊີດຊູຄວາມສາມັກຄີເປັນປຶກແຜ່ນຢູ່ອ້ອມຂ້າງສູນກາງພັກ ແລະ ລັດຖະບານ, ພ້ອມກັນຍົກສູງຄວາມຮັບຜິດຊອບ ແລະ ເປັນເຈົ້າການໃນການເຊື່ອມຊຶມ, ກຳແໜ້ນ ແລະ ຈັດຕັ້ງຜັນຂະຫຍາຍມະຕິກອງປະຊຸມຄົບຄະນະຄັ້ງທີ 5 ຂອງຄະນະບໍລິຫານງານສູນກາງພັກສະໄໝທີ X ໃຫ້ເປັນຂະບວນການຟົດຟື້ນ ແລະ ມີຜົນສຳເລັດຢ່າງຈົບງາມ.

- Wave100S AD to Website 2020 0 - ຜົນກອງປະຊຸມຄົບຄະນະບໍລິຫານງານສູນກາງພັກຄັ້ງທີ 5 ສະໄໝທີ X
- WhatsApp Image 2020 05 27 at 5 - ຜົນກອງປະຊຸມຄົບຄະນະບໍລິຫານງານສູນກາງພັກຄັ້ງທີ 5 ສະໄໝທີ X
- WhatsApp Image 2020 05 27 at 5 - ຜົນກອງປະຊຸມຄົບຄະນະບໍລິຫານງານສູນກາງພັກຄັ້ງທີ 5 ສະໄໝທີ X
error: Alert: ເນື້ອຫາຂ່າວມີລິຂະສິດ !!