ຮອງນາຍົກລັດຖະມົນຕີ ເນັ້ນໃຫ້ກຳລັງ ປກສ ຍົກສູງວຽກງານຫ້ອງການໃຫ້ມີຄວາມຊັດເຈນ, ຖືກຕ້ອງ, ສອດຄ່ອງ ແລະ ມີຄວາມເຂັ້ມແຂງທຸກດ້ານ

ໃນເວລາ ໂອ້ລົມຕໍ່ກອງປະຊຸມວຽກງານຫ້ອງການປ້ອງກັນຄວາມສະຫງົບ ທົ່ວປະເທດ ຄັ້ງທີ V ວັນທີ 21 ກັນຍາ 2023, ທ່ານ ພົອ ວິໄລ ຫລ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີ ກະຊວງ ປກສ ໄດ້ເນັ້ນໃຫ້ ຄະນະພັກ-ຄະນະບັນຊາ ກຳລັງ ປກສ ທົ່ວປະເທດ ເອົາໃຈໃສ່ປັບປຸງຍົກສູງຄວາມຮັບຜິດຊອບ ກ່ຽວກັບວຽກງານຫ້ອງການໃຫ້ມີຄວາມຊັດເຈນ, ຖືກຕ້ອງ, ສອດຄ່ອງ ແລະ ມີຄວາມເຂັ້ມແຂງທຸກດ້ານ, ແນໃສ່ຕອບສະໜອງກັບໜ້າທີ່ການເມືອງ ໃນໄລຍະໃໝ່, ຮຽກຮ້ອງໃຫ້ ຄະນະພັກ-ຄະນະບັນຊາ ທົ່ວກຳລັງ ປກສ ນັບທັງຂັ້ນສູນກາງ ແລະ ທ້ອງຖິ່ນ ທີ່ຮັບຜິດຊອບກ່ຽວກັບວຽກງານຫ້ອງການຈົ່ງເອົາໃຈໃສ່ປັບປຸງແບບແຜນໃນການນໍາພາ-ບັນຊາ, ເພີ່ມທະວີຄວາມສາມັກຄີເປັນເອກະພາບພາຍໃນຄະນະ, ພາຍໃນກົມກອງ ເພື່ອຮັບປະກັນຄວາມເປັນເອກະພາບທາງດ້ານການເມືອງແນວຄິດ, ການຈັດຕັ້ງ ແລະ ການກະທຳຂອງພັກ ທັງເປັນເງື່ອນໄຂເຮັດໃຫ້ການຈັດຕັ້ງປະຕິບັດໜ້າທີ່ວິຊາສະເພາະ ທີ່ນອນໃນຄວາມຮັບຜິດຊອບມີຄວາມໂລ່ງລຽນ ແລະ ມີປະສິດທິພາບ.

ພ້ອນີ້, ກໍໃຫ້ເອົາໃຈໃສ່ຊີ້ນໍາວຽກງານວິຊາສະເພາະທີ່ນອນໃນຄວາມຮັບຜິດຊອບ ໃຫ້ເຂົ້າສູ່ລະບົບ, ລະບຽບການ ຕົ້ນຕໍແມ່ນ: ຊ່ວຍຄະນະບໍລິຫານງານພັກກະຊວງ, ຄະນະນໍາກະຊວງ ແລະ ຄະນະນໍາແຕ່ລະຂັ້ນ ຕິດຕາມຢ່າງໃກ້ຊິດ, ເປັນປົກກະຕິ ບັນດາທິດຊີ້ນຳຂອງສູນກາງພັກ, ລັດຖະບານ, ບັນດາວຽກຈຸດສຸມຂອງກຳລັງ ໃນແຕ່ລະໄລຍະ; ຍົກສູງຄຸນນະພາບວຽກງານສ້າງແຜນການ, ແຜນການເຄື່ອນໄຫວ, ການຄົ້ນຄວ້າ, ອອກມະຕິ, ຄຳສັ່ງ, ຂໍ້ກໍານົດ ແລະ ລະບຽບການຕ່າງໆ ເພື່ອຊີ້ນຳ-ນຳພາອົງການ, ກົມກອງທ້ອງຖິ່ນທີ່ຂຶ້ນກັບ ໃຫ້ມີຄວາມຊັດເຈນ, ທັນສະພາບການ ທັງໃຫ້ຖືກຕ້ອງຕາມລະບຽບການເຮັດວຽກຂອງກຳລັງປະກອບອາວຸດ, ສືບຕໍ່ປັບປຸງເນື້ອໃນ, ວິທີການ, ຂັ້ນຕອນ ແລະ ຍົກສູງຄຸນນະພາບຂອງວຽກງານຕິດຕາມ, ກຳແໜ້ນສະພາບ; ເພີ່ມທະວີປັບປຸງແບບແຜນວິທີເຮັດວຽກ ແລະ ຄຸນນະພາບຂອງການປະຕິບັດພາລະບົດບາດເປັນເສນາທິການ ໃຫ້ສູງຂຶ້ນດ້ວຍຈິດໃຈບຸກທະລຸແນໃສ່ສ້າງຫ້ອງວ່າການ, ຫ້ອງການແຕ່ລະຂັ້ນ ມີຄວາມໜັກແໜ້ນ, ມີຄຸນນະພາບ ໂດຍສະເພາະ ວຽກງານເລຂານຸການ ແລະ ວຽກງານຄົ້ນຄວ້າສັງລວມ ໃຫ້ຕອບສະໜອງໄດ້ໜ້າທີ່ການເມືອງ ໃນໄລຍະໃໝ່; ປະສານສົມທົບກັບອົງການ, ກົມກ່ຽວຂ້ອງ ຄົ້ນຄວ້າປັບປຸງ ແລະ ສ້າງໃໝ່ບັນດານິຕິກຳທີ່ມີຄວາມຈໍາເປັນໃນການຄຸ້ມຄອງ ແລະ ພັດທະນາກຳລັງໃຫ້ແທດເໝາະກັບສະພາບຄວາມເປັນຈິງ.

ຂໍ້ມູນ: ຄວາມສະຫງົບ