ຫວຽດນາມພົບຜູ້ຕິດເຊື້ອ “ພະຍາດໝາກສຸກລີງ” 2 ຄົນ

ວັນທີ 26 ກັນຍາ, ສູນຄວບຄຸມພະຍາດປະຈໍານະຄອນໂຮ່ຈີມິງ ສສ ຫວຽດນາມ ລາຍງານພົບຜູ້ຕິດເຊື້ອພະຍາດໝາກສຸກລີງ 2 ຄົນໃນຫວຽດນາມຕອນໃຕ້.

ຜູ້ຕິດເຊື້ອເປັນເພດຊາຍອາຍຸ 25 ປີຄົນໜຶ່ງ ມີຜົນກວດເຊື້ອໄວຣັສໝາກສຸກລີງເປັນບວກ ຫລັງຈາກເດີນທາງໄປໂຮງໝໍຜິວໜັງນະຄອນໂຮ່ຈີມິງ ໃນວັນທີ 22 ກັນຍາ ໂດຍລາວເຂົ້າຮັບການກັກກັນຕົວທັນທີເພື່ອຮັບການປິ່ນປົວ.

ສູນຄວບຄຸມພະຍາດປະຈໍານະຄອນໂຮ່ຈີມິງ ຕິດຕາມຜູ້ສໍາຜັດໃກ້ຊິດກັບຜູ້ຕິດເຊື້ອທີ່ຢືນຢັນຜົນຄົນດັ່ງກ່າວຈໍານວນ 8 ຄົນ ເຊິ່ງໃນຈໍານວນນີ້ມີຄົນໜຶ່ງທີ່ອາໄສຢູ່ໃນແຂວງບິ່ງເຊືອງມີຜົນກວດເຊື້ອໄວຣັສໝາກສຸກລີງເປັນບວກ ຈຶ່ງໄດ້ແນະນໍາຜູ້ສໍາຜັດໃກ້ຊິດກັບຜູ້ຕິດເຊື້ອທັງສອງເຝົ້າລະວັງສຸຂະພາບຢູ່ເຮືອນເປັນເວລາ 21 ວັນ.

ທັງນີ້, ລາຍງານລະບຸວ່າ: ປັດຈຸບັນ ຜູ້ຕິດເຊື້ອທັງສອງມີອາການຄົງທີ່ແລ້ວ ໂດຍໄດ້ຮັບຄໍາແນະນໍາໃຫ້ອະນາໄມ ແລະ ຂ້າເຊື້ອທີ່ຢູ່ອາໄສ ແລະ ເຄື່ອງໃຊ້ສ່ວນຕົວ.