ຍອດຂາຍໝີ່ສຳເລັດຮູບ ທົ່ວໂລກ ເພີ່ມຂຶ້ນສູງສຸດເປັນສະຖິຕິໃໝ່

ຂ່າວຕ່າງປະເທດລາຍງານ ວັນທີ 25 ກັນຍາ 2023, ສະມາຄົມໝີ່ສຳເລັດຮູບໂລກ (WINA) ຊຶ່ງມີສຳນັກງານໃຫຍ່ຕັ້ງຢູ່ເມືອງໂອຊາກ້າ ປະເທດຍີ່ປຸ່ນ ໄດ້ເປີດເຜີຍບົດລາຍງານໂດຍລະບຸວ່າ: ໃນປີ 2022 ຜ່ານມາ, ຈຳນວນການຂາຍໝີ່ສຳເລັດຮູບເພີ່ມຂຶ້ນເກືອບ 2,6% ເມື່ອທຽບໃສ່ປີ 2021 ກາຍເປັນສະຖິຕິສູງທີ່ສຸດຄັ້ງໃໝ່ ແລະ ຖືວ່າເປັນການສ້າງສະຖິຕິສູງທີ່ສຸດເປັນປີທີ 7 ຕິດຕໍ່ກັນ.

ບົດລາຍງານລະບຸວ່າ: ຄວາມຕ້ອງການບໍລິໂພກໝີ່ສຳເລັດຮູບເຄີຍຂະຫຍາຍຕົວເຖິງ 9,5% ໃນປີ 2020 ຊຶ່ງເປັນປີທີ່ທົ່ວໂລກກຳລັງປະເຊີນກັບການແຜ່ລະບາດຂອງພະຍາດໂຄວິດ-19 ເຮັດໃຫ້ມີການບໍລິໂພກ ແລະ ກັກຕຸນອາຫານແຫ້ງຈຳນວນຫລາຍ ກ່ອນທີ່ຈຳນວນການບໍລິໂພກຈະຫລຸດລົງມາຢູ່ທີ່ 1,4% ໃນປີ 2021. ເຖິງຢ່າງໃດກໍຕາມ, ໂຕເລກການບໍລິໂພກໝີ່ສຳເລັດຮູບໄດ້ກັບມາຂະຫຍາຍຕົວອີກເທື່ອໃໝ່ໃນປີຜ່ານມາ ທ່າມກາງສະຖານະການເງິນເຟີ້ທີ່ປັບຕົວສູງຂຶ້ນທົ່ວໂລກ ໂດຍສະເພາະສິນຄ້າໃນກຸ່ມອາຫານ ເຮັດໃຫ້ຄົນຈຳນວນຫລາຍຕ້ອງຫັນມາອາໄສອາຫານລາຄາຖືກເຊັ່ນ: ໝີ່ສຳເລັດຮູບ.

ໃນປີ 2022 ທີ່ຜ່ານມາ ມີ 10 ປະເທດທີ່ບໍລິໂພກໝີ່ສຳເລັດຮູບຫລາຍທີ່ສຸດເປັນຕົ້ນແມ່ນ ຈີນ, ອິນໂດເນເຊຍ, ຫວຽດນາມ, ອິນເດຍ, ຍີ່ປຸ່ນ, ອາເມຣິກາ, ຟີລິບປິນ, ສ ເກົາຫຼີ, ໄທ ແລະ ບຣາຊິນ, ສ່ວນຢູ່ຍີ່ປຸ່ນມີລາຍງານວ່າ: ບໍລິສັດຜູ້ຜະລິດໝີ່ສຳເລັດຮູບຫລາຍແຫ່ງໄດ້ປັບລາຄາສິນຄ້າຂຶ້ນປະມານ 10% ໃນປີຜ່ານມາ ແລະ ປັບລາຄາຂຶ້ນຢ່າງຕໍ່ເນື່ອງອີກໃນປີນີ້ ຊຶ່ງເປັນການຂຶ້ນລາຄາສິນຄ້າ 2 ປີຕິດຕໍ່ກັນ ແຕ່ກໍບໍ່ໄດ້ສົ່ງຜົນກະທົບຕໍ່ຈຳນວນການຂາຍ.