ລົດປະຈຳຕຳແໜ່ງ ແລະ ອັດຕານໍ້າມັນ ຂອງການນຳລະດັບສູງ
ການນໍາລະດັບສູງ ທີ່ຈະໄດ້ຮັບການປະກອບ ແລະ ຄຸ້ມຄອງ ລົດປະຈໍາຕໍາແໜ່ງ ປະກອບມີ IV ປະເພດ
- ການນໍາລະດັບສູງ ປະເພດທີ I ປະກອບມີ: ເລຂາທິການໃຫ່ຍຄວບຕໍາແໜ່ງປະທານປະເທດ, ເລຂາ ທິການໃຫຍ່, ປະທານປະເທດ, ນາຍົກລັດຖະມົນຕີ, ຜູ້ປະຈໍາການຄະນະເລຂາທິການສູນກາງພັກ, ປະທານສະພາແຫ່ງຊາດ ແລະ ກໍາມະການກົມການເມືອງສູນກາງພັກ;
- ການນໍາລະດັບສູງ ປະເພດທີ II ປະກອບມີ: ຄະນະເລຂາທິການສູນກາງພັກ, ຮອງປະທານປະເທດ, ຮອງນາຍົກລັດຖະມົນຕີ ແລະ ຮອງປະທານສະພາແຫ່ງຊາດ;
- ການນໍາລະດັບສູງ ປະເພດທີ III ປະກອບມີ: ກໍາມະການສູນກາງພັກ, ຫົວໜ້າຄະນະຂອງພັກ, ປະທານສູນກາງແນວລາວສ້າງຊາດ, ລັດຖະມົນຕີ ແລະ ຫົວໜ້າອົງການລັດທຽບເທົ່າກະຊວງ, ລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ປະທານ ຫລື ເລຂາອົງການຈັດ ຕັ້ງມະຫາຊົນຂັ້ນສູນກາງ ຫລື ທຽບເທົ່າ, ປະທານສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດ, ປະທານອົງການກວດກາແຫ່ງລັດ, ປະທານອົງການກວດສອບແຫ່ງລັດ, ຜູ້ວ່າການທະນາຄານແຫ່ງ ສປປ ລາວ, ປະທານກໍາມາທິການສະພາແຫ່ງຊາດ, ເລຂາທິການ ສະພາແຫ່ງຊາດ, ຫົວໜ້າຫ້ອງວ່າການສໍານັກງານປະທານປະເທດ, ເລຂາຄະນະພັກນະຄອນຫລວງ, ເລຂາຄະນະພັກແຂວງ, ເຈົ້າຄອງນະຄອນຫລວງວຽງຈັນ, ເຈົ້າແຂວງ ແລະ ຕໍາແໜ່ງອື່ນໆ ທຽບເທົ່າຕໍາແໜ່ງບໍລິຫານດັ່ງກ່າວ ທີ່ກໍານົດໄວ້ໃນກົດໝາຍ ແລະ ລະບຽບການ;
- ການນໍາລະດັບສູງ ປະເພດທີ IV ປະກອບມີ: ກໍາມະການສໍາຮອງສູນກາງພັກ, ຮອງຫົວໜ້າຄະນະຂອງພັກ, ຮອງປະທານສູນກາງແນວລາວສ້າງຊາດ, ຮອງລັດຖະມົນຕີ ແລະ ຮອງຫົວໜ້າອົງການ ລັດທຽບເທົ່າກະຊວງ, ຮອງລັດຖະມົນຕີ ຮອງຫົວໜ້າຫ້ອງວ່າການສໍານັກງານນາຍົກລັດຖະມົນຕີ, ຮອງປະທານ ຫລື ຮອງເລຂາ ອົງການຈັດຕັ້ງມະຫາຊົນຂັ້ນສູນກາງ ຫລື ທຽບເທົ່າ, ຮອງປະທານສານປະຊາຊົນສູງສຸດ, ຮອງຫົວໜ້າອົງການໄອຍະການປະຊາຊົນສູງສຸດ, ຮອງປະທານອົງການກວດກາແຫ່ງລັດ, ຮອງປະທານອົງການກວດສອບແຫ່ງລັດ, ຮອງຜູ້ວ່າການທະນາຄານແຫ່ງ ສປປ ລາວ, ຮອງປະທານກໍາມາທິການສະພາແຫ່ງຊາດ, ຮອງເລຂາທິການສະພາແຫ່ງຊາດ, ຮອງຫົວໜ້າຫ້ອງວ່າການສໍານັກງານປະທານປະເທດ, ປະທານສະພາປະຊາຊົນຂັ້ນແຂວງ, ຮອງເລຂາຄະນະພັກນະຄອນຫລວງ, ຮອງເລຂາຄະນະພັກແຂວງ, ຮອງເຈົ້າຄອງນະຄອນຫລວງວຽງຈັນ, ຮອງເຈົ້າແຂວງ, ແລະ ຕໍາແໜ່ງອື່ນ ທຽບເທົ່າຕໍາແໜ່ງບໍລິຫານດັ່ງກ່າວ ທີ່ໄດ້ກໍານົດໃນກົດໝາຍ ແລະ ລະບຽບການ.
ມາດຕາ 13 ການປະກອບລົດປະຈໍາຕໍາແໜ່ງ ແລະ ນໍ້າມັນປະກອບລົດປະຈໍາຕໍາແໜ່ງ ແລະ ນໍ້າມັນ ໃຫ້ປະຕິບັດຕາມລະບອບຕໍາແໜ່ງດຽວ ດັ່ງນີ້:
- ປະເພດ I ໃຫ້ປະກອບລົດປະຈໍາຕໍາແໜ່ງ ຈໍານວນ 2 ຄັນ ຄື:
– ລົດປະຈໍາຕໍາແໜ່ງ ປະເພດລົດເກັງ 1 ຄັນ;
– ລົດສໍາຮອງ ປະເພດລົດຈິບ 1 ຄັນ;
– ນໍ້າມັນ 200 ລິດ ຕໍ່ໜຶ່ງເດືອນ.
- ປະເພດ II ໃຫ້ປະກອບລົດປະຈໍາຕໍາແໜ່ງ ດັ່ງນີ້:
– ລົດປະຈໍາຕໍາແໜ່ງ ປະເພດລົດເກັງ ໜຶ່ງ ຄັນ;
– ລົດສໍາຮອງ ປະເພດລົດຈິບ ໜຶ່ງ ຄັນ;
– ນໍ້າມັນ 180 ລິດ ຕໍ່ໜຶ່ງເດືອນ.
- ປະເພດ III ໃຫ້ປະກອບລົດປະຈໍາຕໍາແໜ່ງ ຈໍານວນ ຫນື່ງ ຄັນ ຄື:
– ລົດປະຈໍາຕໍາແໜ່ງ ປະເພດລົດເກັງ ໜຶ່ງ ຄັນ;
– ນໍ້າມັນ 150 ລິດ ຕໍ່ໜຶ່ງເດືອນ.
- ປະເພດ IV ໃຫ້ປະກອບລົດປະຈໍາຕໍາແໜ່ງ ຈໍານວນ ໜຶ່ງ ຄັນ ຄື:
– ລົດປະຈໍາຕໍາແໜ່ງ ປະເພດລົດເກັງ ໜຶ່ງ ຄັນ;
– ນໍ້າມັນ 120 ລິດ ຕໍ່ໜຶ່ງເດືອນ.
ສໍາລັບພາຫານະທີ່ນໍາໃຊ້ການເຄື່ອນໄຫວວຽກງານທາງການທີ່ຈໍາເປັນຂອງການນໍາຂັ້ນສູງ ປະເພດ III ແລະ IV ແມ່ນໃຫ້ນໍາໃຊ້ລົດບໍລິຫານລວມ.
ຄວາມແຮງຂອງລົດປະຈໍາຕໍາແໜ່ງແຕ່ລະປະເພດ ໃຫ້ກໍານົດສະເພາະໃນແຕ່ລະໄລຍະຕາມຄວາມເໝາະສົມ ພ້ອມກັນນັ້ນ, ລັດຖະບານຈະຄົ້ນຄວ້າຫັນໄປສູ່ການນໍາໃຊ້ລົດທີ່ນໍາໃຊ້ພະລັງງານສະອາດ (ພະລັງງານ ໄຟຟ້າ, ແສງອາທິດ ແລະ ອື່ນໆ) ເພື່ອປ່ຽນແທນລົດທີ່ນໍາໃຊ້ພະລັງງານນໍ້າມັນເຊື້ອໄຟ ຕາມແຕ່ລະກໍລະນີ ແລະ ເງື່ອນໄຂຕົວຈິງ. ຈາກນັ້ນ, ກໍຈະມີການດັດປັບການເບີກຈ່າຍນໍ້າມັນເຊື້ອໄຟ ຕາມຄວາມເໝາະສົມ.
