ສິ່ງທີ່ສະຖາບັນການສຶກສາຊັ້ນສູງ ຄວນເອົາໃຈໃສ່ ເພື່ອສ້າງຄວາມສົນໃຈ ແກ່ນັກຮຽນ-ນັກສຶກສາ

ທ່ານ ສາຍຂອງ ສາຍນາສິນ ຫົວໜ້າກົມການສຶກສາຊັ້ນສູງ ກະຊວງສຶກສາທິການ ແລະ ກິ ລາ ໃຫ້ສຳພາດໃນວັນທີ 28 ກັນຍາ 2023 ນີ້ວ່າ: ເພື່ອເຮັດໃຫ້ສະຖານການສຶກສາຊັ້ນສູງ ທັງພາກລັດ ແລະ ເອກະຊົນ ໄດ້ຮັບການພັດທະນາ ແລະ ເປັນທີ່ສົນໃຈ ຂອງນັກຮຽນ-ນັກສຶກສາສະຖານການສຶກສາຊັ້ນສູງ ຕ້ອງເພີ່ມນະໂຍບາຍໃນສາຂາທີ່ນັກສຶກສາບໍ່ມາສະໝັກຮຽນ, ພ້ອມທັງສົ່ງເສີມນະ ໂຍບາຍສະໜັບສະໜູນນັກສຶກສາ ທີ່ມາຈາກຄອບຄົວທຸກຍາກ, ສ້າງໃຫ້ມີພື້ນທີ່ສີຂຽວ, ສະຖານທີ່ພັກຜ່ອນ ທີ່ຕິດພັນກັບ 5 ຫລັກມູນການສຶກສາ ແລະ ສ້າງສິ່ງອຳນວຍຄວາມສະດວກຕ່າງໆ ໃຫ້ສອດຄ່ອງກັບສະພາບປັດຈຸບັນ. ພ້ອມນັ້ນ ຕ້ອງສ້າງເຄືອຂ່າຍຕະຫລາດແຮງງານ ເພື່ອຮັບປະກັນການຖືກຈ້າງງານສຳລັບ ຜູ້ສຳເລັດການສຶກສາ, ສ່ວນ ຄູ-ອາຈານ ຢູ່ສະຖານການສຶກສາຊັ້ນສູງ ທັງພາກລັດ ແລະ ເອກະຊົນ ຕ້ອງເອົາໃຈໃສ່ຝຶກຝົນຫລໍ່ຫລອມຕົນເອງ ໃຫ້ທັນຕາມຍຸກ, ຕາມສະໄໝ ໂດຍສະ ເພາະ ທາງດ້ານການເມືອງແນວຄິດ, ສິນທຳປະຕິວັດ ໃຫ້ເລິກເຊິ່ງ-ເຖິງຖອງກ່ຽວກັບສະພາບຄວາມເປັນຈິງໃນປັດຈຸບັນ, ພ້ອມທັງສຶກສາຮຽນຮູ້ເພີ່ມເຕີມ ທາງດ້ານວິທະຍາສາດ ແລະ ເຕັກໂນໂລຊີ ເພື່ອທີ່ຈະນຳເອົາຄວາມຮູ້ໃໝ່ໆ ມາສິດສອນນັກຮຽນ-ນັກສຶກສາ ເພື່ອໃຫ້ທັນຕາມຍຸກຕາມສະໄໝ ເປັນຕົ້ນ ໃຫ້ຫັນເອົາການຮຽນ-ການສອນ ເປັນທັນສະໄໝ ໂດຍນຳໃຊ້ເຄື່ອງມືທີ່ທັນສະໄໝ ເຂົ້າໃນການສິດ ສອນ, ສ້າງເນື້ອໃນຫລັກສູດໄວ້ໃນຄັງຂໍ້ມູນ ໃນລະບົບອິນເຕີເນັດ ເພື່ອໃຫ້ນັກສຶກສາເຂົ້າໄປຄົ້ນຄວ້າ, ຮໍ່າຮຽນໄດ້ຢ່າງສະດວກສະບາຍ ພຽງແຕ່ມີອິນເຕີເນັດໃນມືຖື. ສິ່ງສໍາຄັນ ຄູ-ອາຈານຕ້ອງສຸມໃສ່ຄົ້ນ ຄວ້າວິທະຍາສາດ, ສ້າງນະວັດຕະກຳໃໝ່ເພື່ອສ້າງຄວາມພ້ອມ ພັດທະນາຕົນເອງ ໃຫ້ສາມາດຫັນເປັນສາກົນ, ສາມາດເຊື່ອມໂຍງກັບພາກພື້ນ ແລະ ສາກົນໄດ້.

ທ່ານ ສາຍຂອງ ສາຍນາສິນ ກ່າວອີກວ່າ: ກະຊວງສຶກສາທິການ ແລະ ກິລາ ກໍຄື ກົມການສຶກສາຊັ້ນສູງ ໄດ້ຄຸ້ມຄອງສະຖາບັນການສຶກສາຊັ້ນສູງ ທັງພາກລັດ ແລະ ເອກະຊົນ ບົນລະບຽບກົດໝາຍ ປັດຈຸບັນໄດ້ມີລະບຽບກົດໝາຍວ່າດ້ວຍການສຶກສາຊັ້ນສູງ ໂດຍໄດ້ຄວບຄຸມທັງໝົດ ລວມທັງການເຄື່ອນໄຫວທາງດ້ານວິຊາການ, ການບໍລິຫານຕ່າງໆ ລວມທັງການຄົ້ນຄວ້າວິທະຍາສາດ; ນອກນັ້ນ ຍັງມີລະບຽບຫລັກການ ເພື່ອຄຸ້ມຄອງໃຫ້ເປັນເອກະພາບ ທາງດ້ານວຽກງານການສຶກສາຊັ້ນສູງ ທົ່ວປະເທດ ທັງພາກລັດ ແລະ ເອກະຊົນ.

ສະຖານການສຶກສາຊັ້ນສູງ ທັງພາກລັດ ແລະ ເອກະຊົນ ມີ 3 ໜ້າທີ່ໃຫຍ່ ທີ່ຕ້ອງໄດ້ຈັດຕັ້ງປະຕິບັດ ເປັນຕົ້ນ ສ້າງບຸກຂະລາກອນທີ່ມີຄຸນນະພາບສູງ ໄດ້ທັງປະລິມານ ແລະ ຄຸນນະພາບ ໃຫ້ພຽງພໍກັບຄວາມຕ້ອງການ ໃນການພັດທະນາເສດຖະກິດ-ສັງຄົມຂອງຊາດ ໃຫ້ມີຄວາມສາມາດໃນການເຊື່ອມໂຍງພາກພື້ນ ແລະ ສາກົນ; ດຳເນີນການຄົ້ນຄວ້າວິທະສາສາດ, ການຄົ້ນຄ້ວາວິໄຈ ເພື່ອສ້າງສິ່ງໃໝ່ໆຂຶ້ນມາ ແລະ ການໃຫ້ບໍລິການວິຊາການ, ການຄົ້ນຄວ້າວິທະຍາສາດ ເພື່ອສ້າງລາຍຮັບໃຫ້ກັບສະຖານການສຶກສາຊັ້ນສູງ ຫລຸດຜ່ອນການແບກຫາບງົບປະມານຂອງລັດຖະບານ.