ປ່ອຍນົກຂວກ 824 ໂຕທີ່ຢຶດໄດ້ຈາກຜູ້ລັກລອບຈະສົ່ງອອກໄປຕ່າງປະເທດ ກັບຄືນສູ່ທຳມະຊາດ
September 29, 2023 - 4:48 PM
ວັນທີ 28 ກັນຍາ 2023, ແຂວງຜົ້ງສາລີ ໄດ້ຈັດພິທີປ່ອຍນົກຂວກ 824 ໂຕ ຄືນສູ່ທຳມະຊາດ ຢູ່ທີ່ວັດພູແກ້ວ ເທບນິມິດພຣະນາຣາມ. ນົກຂວກຈຳນວນນີ້ ແມ່ນໄດ້ມາຈາກ ກຳລັງ ປກສ ເມືອງໃໝ່ ແຂວງຜົ້ງສາລີ ລົງຕິດຕາມ ກວດກາ ແລະ ສະກັດກັ້ນການລັກລອບນຳເອົາສັດປ່າອອກຕ່າງປະເທດ, ເຊິ່ງສາມາດກັກຕົວຜູ້ກະທຳຜິດ ແລະ ຢຶດນົກຂວກໄດ້ 824 ໂຕ.
ທ່ານ ຄຳເລີດ ອິນແກ້ວ ຮອງເຈົ້າເມືອງ ຜູ້ຊີ້ນຳຂົງເຂດເສດຖະກິດ ກ່າວວ່າ: ການປ່ອຍນົກຈຳນວນນີ້ຄືນສູ່ທຳມະຊາດ ກໍເພື່ອຫລຸດຜ່ອນອັດຕາການສູນພັນຂອງສັດປ່າຫວງຫ້າມທີ່ນັບມື້ຫລຸດໜ້ອຍລົງ ທັງເປັນການຄືນຊີວິດອິດສະຫລະ ໃຫ້ນົກຈຳນວນນີ້ກັບໄປໃຊ້ຊີວິດຕາມທຳມະຊາດ ແລະ ທັງເປັນການເພີ່ມປະລິມານສັດໃຫ້ຫລາຍຂຶ້ນ ເພື່ອທົດແທນຈຳນວນສັດປ່າປະເພດນີ້ທີ່ຖືກທຳລາຍສູນເສຍໄປໃນແຕ່ລະປີ.
ຂ່າວ: ຖວທ ເມືອງໃໝ່
