ລົງຕິດຕາມກວດກາລາຄາສິນຄ້າ-ລາຄາຊີ້ນ ຕາມທ້ອງຕະຫລາດ ພ້ອມຢຶດຊິງຊັ່ງນ້ຳໜັກບໍ່ໄດ້ມາດຕະຖານ 4 ໜ່ວຍ

ວັນທີ 28 ກັນຍາ 2023 ຜ່ານມາ, ອົງການ ການຄ້າ ເມືອງປາກກະດິງ ລົງຕິດຕາມ, ກວດກາ ສິນຄ້ານອກລະບົບ ແລະ ການລະເມີດກົດໝາຍ-ລະບຽບການ ຢູ່ຕະຫລາດ ທົ່ງນາມີໂຊກມີໄຊ, ໂດຍປະຕິບັດຕາມແຈ້ງການ ເລກທີ 1447/ພອຄ ຂອງພະແນກອຸດສາຫະກຳ ແລະ ການຄ້າແຂວງ. ນຳໂດຍທ່ານ ສົມສະຫວັດ ມັງແກ້ວບິດາ ຮອງຫົວໜ້າຫ້ອງການ ອຸດສາຫະກຳ ແລະ ການຄ້າເມືອງ.

ການລົງເຄື່ອນໄຫວເຮັດວຽກຄັ້ງນີ້ໄດ້ເນັ້ນໃສ່ກວດກາ ລາຄາສິນຄ້າ-ລາຄາຊີ້ນຕາມທ້ອງຕະຫລາດ, ກວດກາຊີງຊັ່ງໜ້ຳໜັກ 150 ກິໂລລົງມາ, ກວດກາການຕິດສະຫລາກສິນຄ້າເປັນພາສາລາວ-ການຕິດລາຄາເປັນເງີນກີບ, ກວດກາແຫລ່ງທີ່ມາຂອງອາຫານທະເລສົດແຊ່ແຂງ, ກວດກາການການດຳເນີນທຸລະກິດທີ່ບໍ່ຂຶ້ນທະບຽນວິສາຫະກິດຖືກຕ້ອງຕາມລະບຽບກົດໝາຍ ແລະ ສິນຄ້າເສື່ອມຄຸນ. ເຊີ່ງຜົນການລົງກວດກາຄັ້ງນີ້ ເຫັນໄດ້ວ່າຊີງຊັ່ງບາງໜ່ວຍບໍ່ໄດ້ມາດຖານ, ການຕິດສະຫລາກ ແລະ ລາຄາ ສິນຄ້າ ແມ່ນມີພຽງລາຄາຊີ້ນເທົ່ານັ້ນ. ນອກນີ້ຍັງໄດ້ກວດພົບສິນຄ້າເຊື່ອມຄຸນອີກຈຳນວນໜຶ່ງ. ອົງການປະຕິບັດວຽກງານກວດກາການຄ້າ ເມືອງປາກກະດິງ ຈຶ່ງໄດ້ແນະນຳ, ກ່າວເຕືອນ, ພ້ອມທັງເຮັດບົດບັນທຶກ, ຢຶດຊິງຊັ່ງນ້ຳໜັກຈຳນວນ 4 ໜ່ວຍ ແລະ ສິນຄ້າເສື່ອມຄຸນອີກຈຳນວນໜຶ່ງເພື່ອໄປທຳລາຍ.