ຕວກກີເພີ່ມຄວາມເຂັ້ມງວດ ຫລັງເກີດເຫດລະເບີດຂ້າຕົວຕາຍກາງນະຄອນຫລວງອັງກາຣາ
ທາງການຕວກກີເພີ່ມຄວາມເຂັ້ມງວດ ແລະ ຍົກລະດັບມາດຕະການຮັກສາຄວາມປອດໄພ ພາຍຫລັງເກີດເຫດລະເບີດຂ້າຕົວຕາຍກາງນະຄອນຫລວງອັງກາຣາ ໃນວັນທີ 1 ຕຸລາ ເຮັດໃຫ້ຜູ້ລົງມືກໍ່ເຫດເສຍຊີວິດ 2 ຄົນ ແລະ ມີຕໍາຫລວດໄດ້ຮັບບາດເຈັບອີກ 2 ຄົນ. ທາງການຕວກກີລະບຸວ່າ: ສະຖານະການທີ່ເກີດຂຶ້ນຖືເປັນເຫດກໍ່ການຮ້າຍໃຈກາງເມືອງຫລວງ.
ກ່ອນກຸ່ມກະບົດຊາວເຄີດ (PKK) ຈະອອກມາເຄື່ອນໄຫວ ແລະ ຍອມຮັບວ່າ: ເຫດການທີ່ເກີດຂຶ້ນນີ້ ກຸ່ມຂອງຕົນຢູ່ເບື້ອງຫລັງ ເຊິ່ງກົງກັບລາຍງານຂອງທາງການຕວກກີ ເຮັດໃຫ້ກອງທັບຕວກກີໂຈມຕີທາງອາກາດໃສ່ຖານທັບຂອງກຸ່ມກະບົດຊາວເຄີດຢູ່ບໍລິເວນທາງຕອນເໜືອຂອງອີຣັກ ເພື່ອຕອບໂຕ້ເຫດການດັ່ງກ່າວ ໂດຍກຸ່ມ PKK ຖືກຂຶ້ນບັນຊີຂອງທາງການຕວກກີ, ສະຫະພາບເອີຣົບ, ອັງກິດ ແລະ ອາເມລິກາ ໃນຖານະ “ກຸ່ມກໍ່ການຮ້າຍ”.
ສ່ວນບັນດາຜູ້ນໍາໂລກ ແລະ ຜູ້ນໍາອົງການສາກົນ ຕ່າງປະນາມເຫດການທີ່ເກີດຂຶ້ນ. ພ້ອມເນັ້ນວ່າ: ປະຊາຄົມໂລກຕໍ່ຕ້ານການກໍ່ການຮ້າຍທຸກຮູບແບບ ໂດຍທ່ານ ເຍນ ສໂຕລເຕນເບິກ ເລຂາທິການອົງການ NATO ລະບຸວ່າ: NATO ຈະຮ່ວມຄຽງຂ້າງຕວກກີໃນການຕໍ່ຕ້ານກຸ່ມກໍ່ການຮ້າຍຢ່າງເຕັມຄວາມສາມາດ.
ທ່ານ ເຣເຈບ ໄຕຍິບ ແອຣໂດອັນ ປະທານາທິບໍດີຕວກກີ ລະບຸວ່າ: “ກຸ່ມກໍ່ການຮ້າຍຈະບໍ່ມີວັນບັນລຸເປົ້າໝາຍໄດ້ອີກໃນຕວກກີ, ເຫດກໍ່ການຮ້າຍໃນນະຄອນຫລວງອັງກາຣາວັນນີ້ທີ່ຕໍາຫລວດເຂົ້າແຊກແຊງຢ່າງທ່ວງທັນຈະຖືເປັນເຫດກໍ່ການຮ້າຍຄັ້ງສຸດທ້າຍ”. “ຜູ້ກໍ່ການຮ້າຍທີ່ພະຍາຍາມທໍາລາຍສັນຕິພາບ ແລະ ຄວາມໝັ້ນຄົງປອດໄພຂອງປະຊາຊົນຈະບໍ່ມີວັນປະສົບຜົນສໍາເລັດ”.
ອ້າງອີງ:
- www.aljazeera.com/news/liveblog/2023/10/1/turkey-explosion-news-live-police-officers-struck-by-ankara-suicide-bomb
- www.bbc.com/news/world-europe-66979396
- www.theguardian.com/world/2023/oct/01/bombing-interior-ministry-ankara-turkey-parliament
