ກະຊວງ​ກະສິກຳ ອອກ​ຄຳ​ສັ່ງ​ໃຫ້​​ເພີ່ມທະວີການເຝົ້າ​ລະວັງ ​ແລະ ສະກັດ​ກັ້ນ​ພະຍາດ​ໄຂ້ຫວັດ​ສັດ​ປິກ

- advert banner 728 90 728x90 - ກະຊວງ​ກະສິກຳ ອອກ​ຄຳ​ສັ່ງ​ໃຫ້​​ເພີ່ມທະວີການເຝົ້າ​ລະວັງ ​ແລະ ສະກັດ​ກັ້ນ​ພະຍາດ​ໄຂ້ຫວັດ​ສັດ​ປິກ

​ເພື່ອ​ເປັນ​ການ​ປ້ອງ​ກັນ ​ແລະ ສະ​ກັດ​ກັ້ນ​ພະຍາດ​ໄຂ້ຫວັດ​ສັດ​ປິກ H5N1 ບໍ່​ໃຫ້​ກັບ​ຄືນ​ມາ​ລະບາດ​ອີກ ຫລື ​ແຜ່​ລາມ​ອອກ​ສູ່​ວົງ​ກວ້າງ, ລັດຖະມົນຕີ​ກະຊວງກະສິກຳ ​ແລະ ປ່າ​ໄມ້ ​ໄດ້​ອອກ​ຄຳ​ສັ່ງ​ກ່ຽວ​ກັບ​ການ​​ເພ​ີ່ມທະວີ​ເອົາ​ໃຈ​ໃສ່​ຕິດຕາມ​ເຝົ້າ​ລະວັງ ​ແລະ ສະກັດ​ກັ້ນ​ພະຍາດ​ໄຂ້ຫວັດ​ສັດ​ປີກດັ່ງນີ້ 1). ​ໃຫ້​ກົມ​ລ້ຽງສັດ ​ແລະ ການ​ປະມົງ​ເພີ່ມ​ທະວີ​ຄວາມ​ເອົາ​ໃຈ​ໃສ່​ຕິດຕາມ​ຂໍ້​ມູນ​ຂ່າວສານ ກ່ຽວ​ກັບ​ການ​ລາຍ​ງານ​ກາ​ນ​ເກີດ​ພະຍາດ​ໄຂ້ຫວັດ​ສັດ​ປີກ​ຢູ່​ຂົງ​ເຂດ ​ແລະ ປະ​ເທດ​​ໃກ້​ຄຽງ​ຢ່າງ​ໃກ້ຊິດ, ກວດກາ​ຄືນ​ກ່ຽວ​ກັບ​ທິມງານ​ເຝົ້າ​ລະວັງ ​ແລະ ຕອບ​ໂຕ​້ຮ່ວມ​ກັບກະຊວງ​ສາ​ທາ​ລະນະ​ສຸກ, ວາງ​ແຜນ ​ແລະ ດຶງ​ດູດ​ເອົາ​ການ​ຊ່ວຍ​ເຫລືອ​ຈາກ​ອົງການຈັດ​ຕັ້ງ​ສາກົນ​ທີ່​ກ່ຽວຂ້ອງ ​ເພື່ອ​ກຽມ​ຄວາມ ພ້ອມ​ດ້ານ​ງົບ​ປະມານ, ວັດຖຸ​ອຸປະກອນ ​ແລະ ຂີດ​ຄວາມສາມາດ​ໃນ​ການ​ກວດກາ​ວິ​​ໄຈ​ໃຫ້​ຮັບປະກັນ; ສົມທົບ​ກັບ​ພະ​ແນ​ກກະສິກຳ ​ແລະ ປ່າ​ໄມ້​ແຂວງ, ນະຄອນຫລວງ​ວຽງ​ຈັນ ​ໃນ​ການ​ໂຄສະນາ​ສຶກສາ​ອົບຮົມ​ໃຫ້​ແກ່​ປະຊາຊົນ, ພະນັກງານ ​ແລະ ຜູ້​ປະກອບ​ການ​ທີ່​ລ້ຽງສັດ​ປີກ​ແບບ​ຄອບຄົວ, ກຸ່ມ ​ແລະ ຟາ​ມ​ໃຫ້​ເຂົ້າ​ໃຈ​ກ່ຽວ​ກັບ​ຄວາມ​ອັນຕະລາຍ​ຂອງ​ພະຍາດ​ໄຂ້ຫວັດ​ສັດ​ປີກ​ສາຍ​ພັນ H5N1 ພ້ອມ​ທັງ​ໃຫ້​ຄວາມ​ຮ່ວມ​ມື​ໃນ​ການ​ປ້ອງ​ກັນ, ​ເຝົ້າ​ລະວັງ ​ແລະ ສະກັດ​ກັ້ນ​ພະຍາດ​ໄຂ້​ຫວັດ​ສັດ​ປີກ​ສາຍ​ພັນ​ດັ່ງກ່າວ​ຢ່າງ​ເຂັ້ມ​ງວດ; 2.) ​ໃຫ້​ພະ​ແນ​ກກະສິກຳ ​ແລະ ປ່າ​ໄມ້​ປະຈຳ​ແຂວງ ນະຄອນຫລວງ​ວຽງ​ຈັນ ຊີ້​ນຳ​ຂະ​ແໜງ​ລ້ຽງສັດ ​ແລະ ການ​ປະມົງ ລົງ​ສົມທົບ​ກັບ​ຫ້ອງການ​ກະສິກຳ ​ແລະ ປ່າ​ໄມ້​ປະຈຳ​ເມືອງ ​ເອົາ​ໃຈ​ໃສ່​ຕິດຕາມ, ກວດກາ, ​ເຝົ້າ​ລະວັງ, ປ້ອງ​ກັນ ​ແລະ ສະ​ກັດ​ກັ້ນ​ພະຍາດ​ໄຂ້ຫວັດ​ສັດ​ປີກ​ຢູ່​ບັນດາ​ຈຸດ​ທີ່​ມີ​ຄວາມ​ສ່ຽງ​ສູງ​ຄື: ດ່ານ​ຊາຍ​ແດນ​ທີ່​ມີ​ການ​ແລກປ່ຽນ, ຊື້-ຂາຍ, ຂົນ​ສົ່ງ​ສັດ​ປີກ ​ແລະ ຜະລິດ​ຕະພັນ​ສັດ​ປີກ, ​ເຂດ​ທີ່​ມີ​ຟາ​ມສັດ​ປີກ, ​ເຂດທີ່​ມີ​ການ​ລ້ຽງສັດ​ປີກ​ແບບ​ຄອບຄົວ​ໜາ​ແໜ້ນ ​ແລະ ຕະຫລາດ​ຊື້-ຂາຍ​ສັດ​ປີກ​ມີ​ຊີວິດ, ​ເຂດ​ທີ່​ມີ​ຝູງ​ນົກຍາງ​ຂາວ ​ເຄື່ອນ​ຍ້າຍ​ຈາກ​ເຂດ​ໜາວ​ມາ​ຢູ່ ຫລື ຜ່ານ​ເຂດ​ໃດ​ໜຶ່ງ​ຂອງ​ລາວ; 3.) ​ໃນ​ສະ​ເພາະ​ໜ້າ​ນີ້, ຂະ​ແໜງ​ລ້ຽງສັດ ​ແລະ ການ​ປະມົງ​ແຂວງ, ນະຄອນຫລວງ​ວຽງ​ຈັນ ຕ້ອງ​ລົງ​ສົມທົບ​ກັບ​ຫ້ອງການ​ກະສິກຳ ​ແລະ ປ່າ​ໄມ້​ເມືອງ ​ເພື່ອ​ຕິດຕາມ, ກວດກາ​ສຸຂະພາບ​ສັດ​ປີກ​ຂອງ​ຕົນ​ຢ່າງ​​​​ໃກ້ຊິດ​ຕາມ​ແຕ່​ລະ​ກໍລະນີ​ດັ່ງ​ນີ້: ​ໃນ​ກໍລະນີ​ທີ່​ມີ​ການ​ຢັ້ງຢືນ​ຜົນ​ການ​ວິ​​ໄຈ​ທາງ​ຫ້ອງ​ວິ​ໄຈ ກວດ​ພົບ​ເຊື້ອ​ພະຍາດ​ໄຂ້ຫວັດ​ສັດ​ປີກ​ສາຍ​ພັນ H5N1 ຫລື ສາຍ​ພັນ​ອື່ນ​ທີ່​ມີ​ຄວາມ​ສ່ຽງ ທີ່​ເປັນ​ເຊື້ອ​ອັນຕະລາຍ​ຮ້າຍ​​ແຮງ, ຕ້ອງ​ສົມທົບ​ກັບ​ຫ້ອງການ​ກະສິກຳ ​ແລະ ປ່າ​ໄມ້​ເມືອງ ​ແລະ ຂະ​ແໜງ​ສາທາລະນະ​ສຸກ​ຂັ້ນ​ທ້ອງ​ຖິ່ນ ດຳ​ເນີນ​ການ​ເຝົ້າ​ລະວັງ​ແບບ​ບຸກ, ສືບສວນ​ສອບ​ສວນ ​ແລະ ນຳ​ມາດ​ຕະການ​ຄວບ​ຄຸມ​ຢ່າງ​ເຄັ່ງ​ຄັດ; ຊຸກຍູ້, ​ແນະນຳ​ປະຊາຊົນ ​ແລະ ຜູ້​ປະກອບ​ການ​ລ້ຽງສັດ​ປີກ ​ໃຫ້​ເອົາ​ໃຈ​ໃສ່​ປະຕິບັດ​ຫລັກການ​ລ້ຽງສັດ​ປີກ​ດ້ວຍ​ລະບົບ​ການ​ປ້ອງ​ກັນ​ຄວາມ​ປອດ​ໄພ​ທາງ​ຊີວະ​ທີ​່ດີ ​ແລະ ປະຕິບັດ​ຕາມ​ຫລັກ​ວິຊາ​ການ​ຢ່າງ​ຖືກຕ້ອງ​ເປັນ​ຕົ້ນ ການ​ອະນາ​ໄມ ​ແລະ ຂ້າ​ເຊື້ອ, ການ​ປ້ອງ​ກັນ ​ແລະ ຈຳກັດ​ ນົກ, ​ແມງ​ໄມ້​ພາຍ​ໃນ​ຄອກ​ສັດ​ປີກ ​ແລະ ບໍລິ​ເວນ​ອ້ອມ​ຮອບ​ຢ່າງ​ເປັນ​ປະຈຳ; ບຸກຄົນ​ທີ່​ເຂົ້າ-ອອກ​ຟາ​ມ ຫລື ຄອກ​ສັດ​ປີກ​ທຸກ​ຄັ້ງ ຕ້ອງ​ເຮັດອະນາ​ໄມ-ຂ້າ​ເຊື້ອ​ເກີບ, ມື ​ແລະ ປ່ຽນ​ຖ່າຍ​ເສື້ອ​ຜ້າ​ກ່ອນ​ໄປ​ສະຖານ​ທີ່​ອື່ນ​ ​ແລະ ບໍ່​ອະນຸຍາດ​ໃຫ້​ບຸກຄົນ​ທີ່​ບໍ່​ກ່ຽວຂ້ອງ ​ແລະ ສັດ​ອື່ນໆ ​ເຂົ້າ-ອອກ​ຄອກ ຫລື ຟາ​ມຢ່າງ​ເດັດຂາດ; ກໍລະນີ​ພົບ​ເຫັນ​ສັດ​ປີກ ຕາຍ​ຢູ່​ໃນ​ຄອກ ຫລື ຟາ​ມ​ໂດຍ​ບໍ່​ຮູ້​ສາ​ເຫດ ຕ້ອງ​ຮີບ​ຮ້ອນ​ລາຍ​ງານ ສັດຕະວະ​ແພດ​ບ້ານ ຫລື ນາຍບ້ານ ພາຍ​ໃນ 24 ຊົ່ວ​ໂມງ ​ແລ້ວ​ລາຍ​ງານ​ຕໍ່​ໃຫ້​ຫ້ອງການ​ກະສິກຳ ​ແລະ ປ່າ​ໄມ້​ປະຈຳ​ເມືອງ ລົງ​ໄປ​ຕິດຕາມ, ກວດກາ, ສືບ​ຫາ​ສາ​ເຫດ​ໃນ​​ເຂດ​ເກີດ​ພະຍາດ​ຕົວ​ຈິງ; ຫ້າມນຳ​​ເອົາ​ສັດ​ປີກ ຫລື ສິ້ນ​ສ່ວນ​ຂອງ​ສັດ​ປີກ​ທີ່​ເຈັບ ຫລື ຕາຍ​ໄປ​ປຸງ​ແຕ່ງ​ເປັນ​ອາຫານ, ຈຳໜ່າຍ​ຊື້-ຂາຍ ຫລື ຖີ້ມລົງ​ຫ້ວຍຮ່ອງ ​ແລະ ສາຍ​ແມ່​ນ້ຳ​ຕ່າງໆ​ຢ່າງ​ເດັດຂາດ; ​ໃຫ້​ຮີບ​ຮ້ອນເຜົາ ຫລື ຝັງ​ສັດ​ທີ່​ຕາຍ​ນັ້ນ​ໂດຍ​ໄວ​ຕາມ​ຫລັກ​ວິຊາ​ການ; ກໍລະນີ​ສົງ​​ໄສສັດ​ປີກ​ເຈັບ ຫລື ຕາ​ຍຍ້ອນ​ພະຍາດ​ໄຂ​້ຫວັດ​ສັດ​ປີກ ​ໂດຍ​ມີ​ອັດຕາ​ການ​ຕາຍ​ສະ​ສົມ​ສູງ​ເຖິງ 40% ​ໃນ​ໄລຍະ​ເວລາ 3 ວັນ ຫລື ພົບ​ຜົນ​ບວກ​ຈາກ​ການ​ທົດ​ສອບ​ແບບ​ດ່ວນ ຕ້ອງ​ທຳລາຍ​ຝູງ​ສັດ​ປີກ​ນັ້ນ​ໂດຍ​ໄວ, ​ໂດຍ​ບໍ່​ໃຫ້​ລໍ​ຖ້າ​ຜົນ​ການກວດ​ວິ​ໄຈ​ຈາກ​ສູນ​ວິ​ໄຈ​ພະຍາດ​ສັດ​ແຫ່ງ​ຊາດ; ​ເຮັດ​ອະນາ​ໄມ-ຂ້າ​ເຊື້ອ​ຄອກ​ສັດ ​ແລະ ບໍລິ​ເວນ​ອ້ອມ​ຮອບ​ຢ່າງ​ທົ່ວ​ເຖິງ ​ແລະ ບໍ່​ໃຫ້​ເຄື່ອນ​ຍ້າຍ​ສັດ​ປີກ​ໃນ​ເຂດ​ນັ້ນ​ໃນ​ວົງ​ລັດສະໝີ 500 ​​ແມັດ; ​ເກັບ​ຕົວຢ່າງ​ສົ່ງ​ໄປ​ວິ​ໄຈ ​ເພື່ອ​ຢັ້ງຢືນ​ພະຍາດ, ຖ້າ​ໄດ້​ຮັບ​ການ​ຢືນຢັນ ພົບ​ເຊື້ອ​ພະຍາດ​ໄຂ້​ຫວັດ​ສັດ​ປີກ​ສາຍ​ພັນ H5N1 ​ໃຫ້​ປະຕິບັດ​ມ​າດຕະການ ຕາມ​ຂໍ້​ຕົກລົງ​ເລກທີ 0046/ກປ, ລົງ​ວັນ​ທີ 16 ມັງກອນ 2012 ວ່າ​ດ້ວຍ​ການ​ຮັບຮອງ ​ແລະ ປະກາດ​ໃຊ້​ມາດ​ຕະຖານ ​ແລະ ຂັ້ນ​ຕອນ​ປະຕິບັດ​ການ​ຄວບ​ຄຸມ​ການລະບາດ​ຂອງ​ພະຍາດ​ໄຂ້ຫວັດ​ສັດ​ປີກ; 4.) ​ໃຫ້​ພະ​ແນ​ກກະສິກຳ ​ແລະ ປ່າ​ໄມ້​ປະຈຳ​ແຂວງ, ນະຄອນຫລວງ​ວຽງ​ຈັນ ​ເພີ່ມ​ທະວີ​ຄວາມ​ຮັບຜິດຊອບ​ໃນ​ການ​ກວດກາ, ຕິດຕາມ, ການ​ເຄື່ອນ​ຍ້າຍ​ສັດ​ປີກ ​ແລະ ຜະລິດ​ຕະພັນ​ສັດ​ປີກ​ເຊັ່ນ: ສົມທົບ​ກັບ​ພາກສ່ວນ​ກ່ຽວຂ້ອງ ຕິດຕາມ​ກວດກາ​ຕາມ​ເສັ້ນທາງ, ດ່ານ​ນຳ​ເຂົ້າ ຫລື ສະຖານ​ທີ່​ລ້ຽງສັດ​ປີກ​ແບບ​ເປັນ​ຟາ​ມ, ກຸ່ມ ຫລື ຄອບຄົວ​ທີ່​ເຫັນ​ວ່າ ມີ​ຄວາມ​ສ່ຽງ​ທີ່​ຈະ​ກໍ່​ໃຫ້​ເກີດ​ການລະບາດ​ພະຍາດ​ໄຂ້ຫວັດ​ສັດ​ປີກ, ພ້ອມ​ທັງ​ມີ​ການ​ແລກປ່ຽນ​ຂ້ໍ​ມູນ​ຂ່າວສານ​ເຊິ່ງກັນ ​ແລະ ກັນເປັນປົກກະຕິ ​ເພື່ອ​ພ້ອມ​ກັນ​ໂຕ້​ຕອບ​ພະຍາດ​ໄຂ້ຫວັດ​ສັດ​ປີ​ກສາຍ​ພັນ H5N1 ຢ່າງ​ທັນ​ການ, ຊີ້​ນຳ​ຂະ​ແໜງ​ລ້ຽງສັດ ​ແລະ ການ​ປະມົງ ສົມທົບ​ກັບ​ດ່ານ​ກວດກາ​ສັດຕະວະ​ແພດ​ຊາຍ​ແດນ ດຳ​ເນີ​ນການ​ປະ​ເມີນ​ຄວາມ​ສ່ຽງ​ກ່ອນ​ການ​ນຳ​ເຂົ້າ​ທຸກ​ຄັ້ງ, ​ໂດຍ​ອະນຸຍາດ​ໃຫ້​ນຳ​ເຂົ້າ​ສັດ​ປີກ ຫລື ຜະລິດ​ຕະພັນ​ສັດ​ປີກ​ມາ​ຈາກ​ແຫ​ລ່ງທີ່​ປອດ​ພະຍາດ ​ແລະ ​ເຊື່ອຖື​ໄດ້, ​ໂດຍ​ມີ​ໃບ​ຢັ້ງຢືນ​ສຸຂະພາບ​ສັດ​ປີກ ຈາກ​ອົງການ​ສັດຕະວະ​ແພດ​ຂອງ​ລັດ​ປະ​ເທດ​ຕົ້ນ​ທາງ; ກໍ​ລະ​ນີພົບ​ເຫັນ​ການ​ນຳ​ເຂົ້າ​ສັດ​ປີກ ຫລື ຜະລິດ​ຕະພັນ​ສັດ​ປີກ​ທີ່​ບໍ່​ຖືກ​ຕ້ອງຕາມ​ກົດໝາຍ ​ແລະ ລະບຽບ​ການ​ໃຫ້​ກວດ​ຢຶດ ​ແລະ ນຳ​ໄປ​ຖີ້ມດ້ວຍ​ການ​ເຜົາ ຫລື ຝັງ, ສ່ວນ​ຄ່າ​ໃຊ້​ຈ່າຍ​ໃນການ​ທຳລາຍ​ແມ່ນ​ມອບ​ໃຫ້​ເຈົ້າ​ຂອງ​ສັດ​ປີກ ຫລື ຜະລິດ​ຕະພັນ​ສັດ​ປີກ​ເປັນ​ຜູ້​ຮັບຜິດຊອບ​ທັງ​ໝົດ, ພ້ອມ​ທັງ​ບັນ​ທຶກ, ກ່າວ​ເຕືອນ, ປັບ​ໃໝ່ ຫລື ດຳ​ເນີນ​ຄະດີ​ຕໍ່​ຜູ້​ທີ່​ລະ​ເມີດ​ລະບຽບ​ກົດໝາຍ​ຕາມ​ກໍລະນີ​ໜັກ ຫລື ​ເບົາ ​ແລະ 5.) ມອບ​ໃຫ້​ກົມ​ລ້ຽງສັດ ​ແລະ ການ​ປະມົງ, ພະ​ແນ​ກກະສິກຳ ​ແລະ ປ່າ​ໄມ້ ປະຈຳ​ແຂວງ, ນະຄອນຫລວງ​ວຽງ​ຈັນ, ຫ້ອງການ​ກະ​ສິກຳ ​ແລະ ປ່າ​ໄມ້​ປະຈຳ​ເມືອງ ​ແລະ ດ່ານ​ສັດຕະວະ​ແພດ, ພ້ອມ​ກັນ​ປະຕິບັດ​ຄຳ​ສັ່ງ​ສະບັບ​ນີ້​ຕາມ​ພາລະ​ບົດບາດ ​ແລະ ຄວາມ​ຮັບຜິດຊອບ​ໃຜລາວ​ຢ່າງ​ເຂັ້ມງວດ, ຜ່ານ​ການ​ຈັດ​ຕັ້ງ​ປະຕິບັດ​ມີ​ຂໍ້​ສະດວກ, ຂໍ້​ຫຍຸ້ງ​ຍາກ​ແນວ​ໃດ ​ໃຫ້​ລາຍ​ງານ​ລັດຖະມົນຕີ​ກະຊວງ​ກະສິກຳ ​ແລະ ປ່າ​ໄມ້​ຮັບ​ຊາບ​ເປັນ​ປົກກະຕິ ​ເພື່ອ​ມີ​ວິທີ​ແກ້​ໄຂ​ທັນ​ການ.

ພະຍາດ​ໄຂ້ຫວັດ​ສັດ​ປີກ​ສາຍ​ພັນ H5N1 ​ແມ່ນ​ພະຍາດ​ສັດ​ທີ​່ຮ້າຍ​ແຮງ, ສາມາດ​ຕິດ​ຕໍ່​ຈາກ​ສັດ​ສູ່​ສັດ ຫລື ສັດ​ສູ່​ຄົນ,​ ມີ​ການ​ແຜ່​ລາມ​ໄວ, ສ້າງ​ຜົນ​ກະທົບ​ທາງ​ລົບ​ຕໍ່​ຊີວິດ, ​ເສດຖະກິດ​ ​ແລະ ສັງຄົມ, ພະຍາດ​ດັ່ງກ່າວ​ລະບາດ​ຄັ້ງ​ທຳ​ອິດ​ຢູ່​ລາວ ​ໃນ​ປີ 2004, ຄັ້ງ​ທີ 2 ​ໃນ​ປີ 2010 ​ແລະ ທ້າຍ​ປີ 2016 ​ເຖິງ​ປັດຈຸບັນ ​ໄດ້​ພົບ​ການລະບາດ​ຂອງ​ພະຍາດ​ໄຂ້ຫວັດ​ສັດ​ປີກ​ສາຍ​ພັນ H5N1 ຄືນ​​ໃໝ່ ຢູ່​ບາງ​ທ້ອງ​ຖິ່ນ​ຂອງ​ລາວ, ມີ​ສັດ​ປີກ​ຕາຍ ​ແລະ ຖືກ​​ທຳລາຍ​ຫລາຍ​ກວ່າ 10.000 ​ໂຕ, ຊຶ່ງ​ເປັນ​ສິ່ງ​ບົ່ງ​ບອກ​ວ່າ ພະຍາດ​ໄຂ້ຫວັດ​ສາຍ​ພັນ​ດັ່ງກ່າວ ຍັງ​ສືບ​ຕໍ່​ເປັນ​ໄພ​ຂົ່ມຂູ່​ຕໍ່​ວຽກ​ງານ​ລ້ຽງສັດ ​ແລະ ຊີວິດ​ຂອງ​ປະຊາຊົນອີກ​ດ້ວຍ.

 

- lattana 1 - ກະຊວງ​ກະສິກຳ ອອກ​ຄຳ​ສັ່ງ​ໃຫ້​​ເພີ່ມທະວີການເຝົ້າ​ລະວັງ ​ແລະ ສະກັດ​ກັ້ນ​ພະຍາດ​ໄຂ້ຫວັດ​ສັດ​ປິກ
- 1 1 - ກະຊວງ​ກະສິກຳ ອອກ​ຄຳ​ສັ່ງ​ໃຫ້​​ເພີ່ມທະວີການເຝົ້າ​ລະວັງ ​ແລະ ສະກັດ​ກັ້ນ​ພະຍາດ​ໄຂ້ຫວັດ​ສັດ​ປິກ

 

error: Content is protected !!