ເມືອງ​ໂຂງ ທຳ​ລາຍ​ອາ​ວຸດ​ລ່າ​ເນື້ອ ແລະ ວັດ​ຖຸ​ຕ້ອງ​ຫ້າມ ເກືອບ 500 ລາຍການ

ວັນທີ 27 ຕຸລາ 2023, ເມືອງໂຂງ ແຂວງຈຳປາສັກ ໄດ້ທຳລາຍອາວຸດລ່າເນື້ອ ແລະ ວັດຖຸຕ້ອງຫ້າມຫລາຍລາຍການຄື: ຈັກສະຕິນ 150 ເຄື່ອງ, ປືນແກັບ 296 ກະບອກ, ເຄື່ອງຊ໊ອດປາ 48 ເຄື່ອງ ທີ່ເປັນອັນຕະລາຍ ແລະ ເປັນປະກົດການຫຍໍ້ທໍ້ໃນສັງຄົມ ກໍຄືຊີວິດ ແລະ ຊັບສິນຂອງພົນລະເມືອງ.

ທ່ານ ທອງໃສ ສິມຈະເລີນ ຫົວໜ້າຫ້ອງການກະສິກຳ-ປ່າໄມ້ເມືອງ ກ່າວວ່າ: ນີ້ກໍເພື່ອຄຸ້ມຄອງປົກປັກຮັກສາຊັບພະຍາກອນປ່າໄມ້ ແລະ ສັດນ້ຳ-ສັດປ່າ ແລະ ຜັນຂະຫຍາຍເນື້ອໃນກົດໝາຍວ່າດ້ວຍສັດນ້ຳ ແລະ ສັດປ່າ ສະບັບເລກທີ 07/ສພຊ, ກົດໝາຍວ່າດ້ວຍການປະມົງສະບັບເລກທີ 03/ສພຊ, ຄຳສັ່ງນາຍົກລັດຖະມົນຕີສະບັບເລກທີ 15/ນຍ ແລະ ສະບັນເລກທີ 11/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງປົກປັກຮັກສາ, ພັດທະນາ ແລະ ນຳໃຊ້ປ່າໄມ້, ທີ່ດິນປ່າໄມ້, ຕ້ານ ແລະ ສະກັດກັ້ນການບຸກລຸກທຳລາຍໄປ່ໄມ້, ທີ່ດິນປ່າໄມ້ແລະ ໄຟໄໝ້ລາມປ່າ, ໃຫ້ໄດ້ຮັບຜົນດີ ແລະ ມີປະສິດທິຜົນສູງ.